Read Rongmei Naga RIAKDANV KALUAIHMEI 23 Bible Online

RIAKDANV KALUAIHMEI 23 - Rongmei Naga bible

RIAKDANV KALUAIHMEI 23

¹“Kapumc siammei khatni katuang khurou dan ganhpui mei tei RINGHPOUC tuang mei pang khou kazauh nuh mak ge.

²“Nkhahna nac, khatni nkhahna nac kikta tei thu meickin ruh thangc nganvna RINGHPOUC tuang mei pang khou kazauh nuh mak ge.

³“Ammonmei, Moabmei, hamh e thei mi nunc kikta hei meickin ruh thangc nganvna RINGHPOUC tuang mei pang khou kazauh nuh mak ge.

⁴Kalam thu nangniw Izip khou rui guangmei ganv khou tei nangniw khang taektw khatni dui tii mu kan e. Mi phaan tei nangniw ta sianglou khang Beor nac mpouh Balaam ta Mesopotamia tuang kaidai Pethor khou rui kaw kan e.

⁵Tiki RINGHPOUC nangniw Racguangc rui Balaam lat chulou kan mak ge, kumna syang tei suaihiam tiguanhlou kan e, kalam thu kamei rui nangniw ta nzian e.

⁶Kaniw tuang lunggai ta phu ri o mi zaat nei ti hei tingsaengzaeng khang nchu-nzaenghmei nai nuh mak ge khatni kaniw ta tilungcgaylou nuh mak ge.

⁷“Edommei ta karaeng riu; kaniw tei nangniw chana punav riangluaicmei e. Izipmei ta karaeng riu; kaganv akhat khou nangniw kaniw tuang kandic khou lungclou khwan e.

⁸Edommei lev Izipmei tuang kikta hei thu meickin kathumh tangv RINGHPOUC tuang mei pang khou kazauh nuh e.

⁹“Nangniw rui suc-rih ganv khou zypui swna bammei ganv khou, nangniw ta swtanac nimei guay khou tei tinai lak nina e.

¹⁰Nggaanvmei gaanv khat rui kamangchaeng rui katuang khurou dui tatna kapumc tanac e thei, kamei rui zypui paengc thangc patna khou tei bam nina e.

¹¹Tingzyn key pwkhou kamei duilowna neihkey pwkhou zypui khou kamei guang dat nina e.

¹²“Nangniw mpaeng tatmei bamv khang zypui paengc thangc swlou nina e.

¹³Nangniw sip akhat akhat sin nina e, Hei tei rui nangniw kapaengc tatloumei ta tei chaubinlou khang e.

¹⁴Nangniw tuang zypui tei swtanac lak nina e kalam thu nangniw ta gaeklou khang khatni rih tingamlou khang RINGHPOUC nangniw Racguangc nangniw tuang zypui kai khou bam e. RINGHPOUC rui nangniw khou namthei karihlou nuhmei tuang nthan makmei taanv hei khou tei taanc nuh mak ge.

¹⁵“Bangh gaanv khat nang daeng khou pak guanglou e thei kata tei thouc tat dat lak nina e.

¹⁶Kamei rui bam nii niimei kaidai akhat khou kamei bam nuh e, kumna kata tei nangniw sina sw nuh mak ge.

¹⁷“Isaraelmei ntumei ni, nggaanvmei ni gaanv khat na sini Isaraelmei tuang kapumc zuanhmei sw nuh mak ge.

¹⁸Mi kumhmei khou rui ntaanv guangmei syan tei RINGHPOUC nangniw Racguangc khang katlou nuh mak ge. Kapumc zuanhmei taanv ta tei RINGHPOUC rui karaeng e.

¹⁹“Nangniw rui Isaraelmei nchamc khou syan pwni, nap-bi pwni, baih baihmei puatc pwni tipoulou e thei, kathuay akhat na sini laa nuh mak ge.

²⁰Zaatc baihmei khou thu kathuay laa nuh e, tiki Isaraelmei nchamc khou thu laa nuh mak ge. Nangniw rui mi riak guay hei tatna lungc ti thei nangniw guang lungc nimei kandic khou kiu nangniw rui taanhmei kathuicna khou Ravguangc rui suaihiamlou puni.

²¹“Nangniw rui RINGHPOUC khou ramh akhat nrianhlou kan e thei nang rui nrianhloumei tei kasuanh dat ri tho; RINGHPOUC rui hei tei taancloumei ta nkhwan puni the. Hei tei kalaic datmei hei paapc be.

²²RINGHPOUC khou latdyng swloumei hei paapc hamh e,

²³tiki nangniw sw ni twna swlou e thei thu nangniw hei tei taanc pat nina di the.

²⁴“Nangniw meic gaanv khat tuang drakha lau khou tatruanlou pwkhou, nangniw rui tu nii saanv tu nuh e, tiki phungc thu phungc tat nuh mak ge.

²⁵Nang rui meickai lau khou tatruanlou pwkhou nang baanc rui nrutna tu nuh e, tiki baengkhuai rui thu tay nuh mak ge.