Read Rongmei Naga RIAKDANV KALUAIHMEI 24 Bible Online

RIAKDANV KALUAIHMEI 24 - Rongmei Naga bible

RIAKDANV KALUAIHMEI 24

¹“Thowkumhmei gaanv khat rui ntumei akhat ta kaw lana theithangc kalam khou tei nthan makmei asaekc ariwmei zaeng rui kata tei kahaw mak khe. Kumna kamei rui now mumei tuang lat hy lana kakhou tiilouna kata tei kakai khou rui thouc ganc the.

²Mi tangv tei kamei baihmei now sw dat the.

³Mipu tei rui ni kata kahaw mak khe, kumna now mumei lat kamei rui hy lana kakhou tiilouna kakai khou rui kata thouc ganc the. Hamh e thei kagaanv nkhamhmei tei theic kan the.

⁴Mi latbamv kanei khou hei kagaanv reymei tei rui kata kaw dat nuh mak khe; mipui tei mphuam the twna kamei laa nina di the. Kamei rui mipui ta tei kaw dat re thei hei tei RINGHPOUC khang karaengmei tuang di the. RINGHPOUC nangniw Racguangc rui nangniw khang tiiloumei kandic khou tei mi kumhmei si kanmei paap hei nangniw taanc lak nina e.

⁵“Thowkumhmei rui now kawlou rapna rihmei khou hamh e thei baihmei charuangc taanv khou kazauh lak nina e; kai khou bamna kanow ta tineihla bam diu khang rui kata tingkwm akhat duh thangc taanv titaanc lak nina e.

⁶“Nang rui meic gaanv khat khang ramh tipouloumei ganv khou, katuang nap tak bammei napriak tauc tei sindaancna laa lak nina e. Kakai kaikhunc ta titu ringc nuh khang kaphianh bammei chaeng tei laa nuh mak ge.

⁷“Thowkumhmei Isaraelmei nchamc ta nymna kabangc tisw e thei hamh e thei kata bangh khang zuanclou e thei kumhmeipu ta tei swluai nina e. Heikumna nangniw pang khou rui simei ta sw nthan pat nina e.

⁸“Nangniw khou sisihmei meicgic tuang ravpuat nai e thei, Levimei amuh nunc rui taanc o twmei tei nangniw taanc nina e; kumna taanc o twna ai rui kaniw khou tiilou kanmei tei nangniw piu nina e.

⁹Nangniw Izip thangc rui guangmei chaeng khou RINGHPOUC nangniw Racguangc rui Miriam khou taanclou kanmei tei ningtow o.

¹⁰“Nang rui meic akhat khang ramh akhat tipouloumei ganv khou kamei rui pheybaan sindaancloumei tei kainung thangc gutna laa lak nina e.

¹¹Kamei rui laa patmei ta kaizaengc khou nkhwan bam nina e.

¹²Kamei tei lungcsimei e thei, hei tei zingbangc thu tii dat nina e;

¹³hei tei kamei baanvzip kan khang tingzyn pum tii dat nina e. Kum e thei kamei neihla puni khatni RINGHPOUC nang Racguangc rui nang ta pianlou puni.

¹⁴“Niakloumei bangc ta pwni nangniw chana punav bam pwni hamh e thei nangniw tuang kaidai khou tatruanloumei nggin pwni lungcsi lungcroumei ta guatna tiryanra riu.

¹⁵Tingmik phy tei tingmik pum neih key makmei hu khou tii raph rap nina e; kakhang hei tei kage nai the kumna kamei hei tei chakna bam e. Nang rui kakhang tii timak ge thei kamei rui RINGHPOUC khou poulou puni kumna nangniw mi nwan tei phungc puni.

¹⁶“Kanac nunc khuay zaeng rui kapui kapu ta swluai nuh mak ge, khatni kapui kapu khuay zaeng rui kanac nunc ta swluai nuh mak ge; nkhuaipui mei na ta tei swluai nina e.

¹⁷“Gin nunc khatni kapui kapu maekmei nac nunc khang sw nimei dam tei tii mak khang sw riu. Amaypui tuang pheybaan tei sindaancna laa nuh mak ge.

¹⁸Nangniw Izip khou bangh swna bam khwan e kumna RINGHPOUC nangniw Racguangc rui nangniw ta nyng tiswloumei tuang e twmei ningtow o; mi zaeng rui ai rui nangniw khou mi latzan hei tiimei tuang e.

¹⁹“Nangniw lautay pwkhou napchu puanc amucloumei tei laa thau dat ri tho; nangniw rui taanhmei katana khou tei RINGHPOUC nangniw Racguangc rui suaihiamlou diu khang hei tei gin-ga nunc, nruna nac nunc, khatni swmmaypui nunc khang ganclou nina e.

²⁰Nangniw Olive thai tei rei guay tang e thei, rei nsaekcloumei tei laa dat ri tho; hei tei gin-ga, nruna nunc, khatni swmmaypui nunc khang e.

²¹Nangniw tuang drakhathai tei rei guay tang e thei hei tei rei kanei dat ri tho; ganclou duhmei drakhathai tei thu gin-ga nunc, nruna nunc, khatni swmmaypui nunc khang e.

²²Nangniw Izip khou bangh sw bam khwan e twmei amuc riu, hei zaeng rui ai rui mi latdanv hei nangniw khang tiimei tuang e.