Read Rongmei Naga RIAKDANV KALUAIHMEI 25 Bible Online

RIAKDANV KALUAIHMEI 25 - Rongmei Naga bible

RIAKDANV KALUAIHMEI 25

¹“Isaraelmei gaanv nei latzankai kuna akhat tei nkhuai the.

²Nkhuaimeipu ta tei bai khang latzan keylou e thei, latzanpouc tei rui kata tizip nkhumlouna tikathamv nina e. Kakhuay theilayna builwang sing tei nai the.

³Kata tei kathamv liang 40 nganv kathamv nuh e, mi khou tei suangc mbu nuh mak ge. Mi khang tei suangc mbu e thei kata charuangc khou tizak tu di the.

⁴“Nap Nii bammei guaituamchic ta tei kamwang karak nuh mak ge.

⁵“Kaikhunh akhat na khou chana gaanv nei lungc kariu bammei kak khou gaanv khat tei kanac mpouh maekna theic kan e thei kanow tei meickai thangc mic tat dat nuh mak ge. Kata tei kakhauh dat nimei tei kachana tuang thouc e.

⁶Nareimeipu tei theic kanmeipu nac tei e twna laa nina e, kumna Isaraelmei khou kariang kaluaic taek mak khang e.

⁷“Theic kanmeipu chana tei rui kata kakhauh dat nii mak pw e thei, kachana now tei rui kaidai tuang kapy swmei nunc khou tatna kumna sa nina e, ‘Agaanv chana rui kathouc taanclou nii mak khe; kamei rui kachana kikta tei Isarael khou tinailou zih the.’

⁸Khoutei kaidai tuang kapy swmei nunc rui kata kaw guangna sa nina e. Khoutei nganvna kamei rui kakhauh lak ge tw pw e thei,

⁹kachana now tei kaidai tuang kapy swmei nunc hu khou tei kahu khou guangna, mipu tuang phaythuapc tei akhat luak pat lana, kazaw khou nteih nsuklou lana kumna sa nina e, ‘Kachana kikta tinailou zihmei khou swlou nimei kiu mi hei the.’

¹⁰Kakai kaikhunc ta tei ‘Kaphaythuapc luak ganhmei kai’ twna Isaraelmei khou thay bam puni.

¹¹“Nggaanvmei gaanv nei adapna bam khou gaanv khat pu now tei rui kagaanv ta guang nkhavna gaanv khat pu tuang khurou thaek ge thei,

¹²mi kumhmeipui ta tei zauc nzianlou dat nuh mak khe; kabaanc tei dan tap nina e.

¹³“Nang khau khou karith kazaat kanei kanei nthaanmei lev nritmei nai nuh mak ge.

¹⁴Nangniw kai khou kadath ndatmei kazaat kanei nthyammei khatni daihmei nai nuh mak ge.

¹⁵Nchumhmei tuang duh khatni ndath ryan sin nina e, kum e thei RINGHPOUC nangniw Racguangc rui tiiloumei kandic khou lungc saengcna lungc puni.

¹⁶Meic-guatpui mei ta RINGHPOUC karaeng e.

¹⁷“Nangniw Izip thangc rui guangmei ganv khou Amalekmei rui nangniw khou swloumei tei ningtow o.

¹⁸Kaniw rui Ravguangc ta ping makna nangniw tatna bammei ganv khou thei biak thangc rui adow the kumna thei thangc ngam makna bammei nunc ta swluai ngam the.

¹⁹Kumhpui zaeng rui, mi kandic tei RINGHPOUC nangniw Racguangc rui nangniw khang tiilouna nangniw daeng khou bammei zauczihmei guay khou rui giuga makna lungc pwkhou, Amalekmei guay ta tei swluai ngam nina e. Kaniw ta tei gaanv khat na rui sini ningtow bam dat mak kan di tho. Mi hei amuc riu!