Read Rongmei Naga RIAKDANV KALUAIHMEI 26 Bible Online

RIAKDANV KALUAIHMEI 26 - Rongmei Naga bible

RIAKDANV KALUAIHMEI 26

¹“RINGHPOUC nangniw Racguangc rui nangniw khang tiiloumei kandic khou tei guang lungc pwkhou kiu,

²Nangniw rui tay guangmei phunling guay tuang rey liangmei tei nangniw kathuicna rui nggiuh khou louna kalummei bamv thangc tei phungc guang nina e.

³Mi ganv khou phungc bammei amuh khou tei guangna kumna sa nina e, ‘RINGHPOUC rui aniu khang tii ni twna aniu pupouc nunc khou nrianhloumei kandic khou tei aniu guang bam the twmei aseic hei ai rui RINGHPOUC nang Racguangc khou sa ndauhmei tuang e.’

⁴“Amuh tei rui mi giuc tei nangniw khou rui laa lana RINGHPOUC nangniw Racguangc tuang ravchapaeng mav khou tei lou puni the.

⁵Khoutei RINGHPOUC hu khou nangniw mi lat hei sa kaluaih nina e: ‘Apu-apouc Aramianmeipu tei kakai kalau maekna ruan tat bam khwan e khatni kakai kaikhunc phungcna Izip khou key lungclou khwan e. Kaniw mi thangc tei keymei ganv khou tei kaniw meic katit na khwan e, tiki kaniw tei daihmei tancbauhmei zaat akhat guanh khwan the.

⁶Izipmei nunc rui aniu ta sina sw khwan the kumna aniu ta bangh swna taanv titaanc khwan the.

⁷Hei khou tei, RINGHPOUC, aniu pupouc Racguangc khou nkhavlou khang kauc thau khwan the. Kamei rui hei tei chulou the khatni aniu tuang ryanra ryanriu kaguayna tei how the.

⁸Katuang daihmei ngamv khatni pumtan paan rui kamei rui aniu ta Izip khou rui kanpatlou the. Kamei rui charyn charynmei sw nchinmei taanv mpeyna taanclou the, khatni meic pingmei tuang mpeyna tipatlou the.

⁹Kamei rui aniu ta mi bamv khou tei nduangh guanglouna mi kandic gaymei ramv hei tiilou the.

¹⁰Kumhpui zaeng rui ntaw hei kamei rui akhang tiiloumei rey liangmei phunling tei ai rui RINGHPOUC kakhou phungc guangmei tuang the.’ “Khoutei nggiuh tei RINGHPOUC mav khou lou keyna khou tei kalum tho.

¹¹RINGHPOUC nangniw Racguangc rui tiiloumei nangniw khatni nangniw kaikhunc guay khang tiiloumei phunling phunlu guay khang thuancku tho. Nangniw pang khou lungc bammei Levimei khatni gin nunc tei ni mi ngai khou tei kazauh kan diu.

¹²“Nangniw pang khou lungc bammei Levimei nunc, gin-ga nunc, nkhu-nruna nunc, swmmaypui nunc tei tu nggu zangv ngguna lungc kan khang tingkwm kathumh pum nangniw phunling kadam ruh tuang akhat tei kaniw khang tii nina e. Hei tei nangniw taanc pwkhou,

¹³RINGHPOUC khou heikumna sa nina e, ‘Nthanmei tuang kadam ruh tuang akhat na sini akai khou nsaekclou mak khe; nang tuang latdanv theilayna ai rui hei tei Levimei nunc, gin nunc, nkhu-nruna nunc, khatni swmmaypui nunc khang tii ngam kan the. Kadam ruh tuang tii nimei lam khou nang rui tiiloumei latdanv tei ai akhat na sini piu makmei tuang hamh e thei amucmei tuang maek ge.

¹⁴Ai latlu bammei ganv khou hei tei katit na sini tu mak ge; ai nthan makmei ganv khou hei tei ai akai khou rui laa pat mak ge; hei tei ai akhat na sini theihmei khang kat mak ge. Ai nang lat piu the, RINGHPOUC, kadam ruh tuang lam khou nang rui tiimei latdanv guay tei ai taanc the.

¹⁵Nang bamv tingkauh nthanmei khou rui zauc keylouna nang mei Isaraelmei nunc ta suaihiamlou o; nang rui aniw pupouc nunc khou nrianhloumei theilayna aniw khang tiiloumei guaihnoudui lev nkhuaihdui luanghmei ramc khou hei nang rui suaihiamlou o.’

¹⁶“Mi latdanv guay hei piu khang aseic hei RINGHPOUC rui nangniw khang latdanv tii the; kumna nangniw lung kapwm rui mi guay tei piu chuyna piu o.

¹⁷RINGHPOUC hei nangniw Racguangc e twna aseic nangniw sa pat kan the; kalat piu khang, katuang latdanv guay ngaek khang, khatni kamei rui tiimei latdanv guay piu khang nangniw latdyng sw kan the.

¹⁸Aseic hei RINGHPOUC kamei rui nrianhloumei kumcna nangniw ta kamei nunc swna laalou the; khatni katuang latdanv guay piu khang kamei rui nangniw khou latdanv tii the.

¹⁹Kamei rui damcloumei zaatc kaguayna pang khou rui kamei rui nangniw ta tidaic lianglou puni. Kumna nangniw rui kazanc tisaengc tidaiclou puni. Kamei rui nrianhlou kanmei kumcna nangniw hei kamei nunc sw puni.”