Read Rongmei Naga RIAKDANV KALUAIHMEI 27 Bible Online

RIAKDANV KALUAIHMEI 27 - Rongmei Naga bible

RIAKDANV KALUAIHMEI 27

¹Khoutei Mousi khatni Isaraelmei tuang kapy nunc rui meic nunc khou tei sa the, “Ai rui aseic nangniw khang tiiloumei latdyn guay hei piu nina e.

²Nangniw rui Jordan kaanpatna RINGHPOUC nangniw Racguangc rui tiiloumei kandic khou tei gutpui nungc, ntauh daihmei asaekc suamc thauna hei tei sw ndiaulou nina e,

³kumna mi tauc guay khou tei mi latdanv khatni latdyn guay hei hylou nina e. RINGHPOUC nangniw pupouc Racguangc rui nrianhloumei kandic gaymei guaihnoudui khatni nkhuaihdui luanghmei ramc khou tei gut pwkhou,

⁴mi tauc guay kiu Ebal Chyng khou ai rui aseic dincloumei kumcna suamc thaulouna sw ndiau nina e.

⁵Ntanh kahilou makmei ntauh rui khou tei ravchabamv kasiamhlou nina e.

⁶RINGHPOUC nangniw Racguangc khang sw nimei ravchabamv tei hianloumei tauc rui sw lak nina e. Khoutei rawna khaeng nina e.

⁷Khoutei nangniw khang laana alamvpuatkat tei tuna RINGHPOUC nangniw Racguangc hu khou neihlana thuancku nina e.

⁸Sw ndiauloumei tauc khou tei Ravguangc tuang latdanv guay tei nthanna hylou nina e.”

⁹Mi tangv tei Mousi lev Levimei amuh nunc tei rui Isaraelmei nunc khou sa the, “Ai rui samei hei rimh rimna nking o, Isaraelmei nuncle. Aseic hei nangniw RINGHPOUC nangniw Racguangc tuang mei sw the;

¹⁰kumhpui zaeng rui kalat piu o khatni ai rui aseic tiiloumei latdanv guay hei ngaek go.”

¹¹Mi nungc kahak tei Mousi rui Isaraelmei nunc khou sa the,

¹²nangniw Jordan kaanpat pwkhou, meic nunc khou suaihiam kauc pat pwkhou kabangc khoumei kaikhwang nunc hei Gerizim Chyng khou ding bam nina e: Simeon, Levi, Juda, Isakar, Josep, khatni Benjamin.

¹³Kumna syang kauc patpui ganv khou kabangc khoumei kaikhwang nunc rui Ebal Chyng khou ding nina e: Reuben, Gad, Aser, Zebulun, Dan, khatni Naphtali.

¹⁴Levimei nunc rui kabangc khoumei lat guay hei khwan ranvna kauc pat nina e:

¹⁵“‘Thing, ntauh hamh e thei ntanh rui ravmaengc kasiamhna nkamhna kalum bampui mei khou tei Ravguangc syang keylou kan diu; kalam thu RINGHPOUC ravmaengc kalummei ta karaeng e.’ “‘Amen!’ twna meic nunc rui daw nina e.

¹⁶“‘Kapui-kapu ta chakhwang sw makpui mei khou tei Ravguangc syang keylou kan diu.’ “‘Amen!’ twna meic nunc rui daw nina e.

¹⁷“‘Kainingmei tuang ramvrei swkalaihpui mei khou tei Ravguangc syang keylou kan diu.’ “‘Amen!’ twna meic nunc rui daw nina e.

¹⁸“‘Miktiatmei ta chaeng dinc mbianghloupui mei khou tei Ravguangc syang keylou kan diu.’ “‘Amen!’ twna meic nunc rui daw nina e.

¹⁹“‘Gin nunc, swmmaypui nunc, khatni nruna nunc khou kaniw tuang dam tei tilaatow makpui mei khou tei Ravguangc syang keylou kan diu.’ “‘Amen!’ twna meic nunc rui daw nina e.

²⁰“‘Kapu now khou tatlouna kapu zaw swkasicpui mei khou tei Ravguangc syang keylou kan diu.’ “‘Amen!’ twna meic nunc rui daw nina e.

²¹“‘Khouringh lev ntu-nahpui mei khou tei Ravguangc syang keylou kan diu.’ “‘Amen!’ twna meic nunc rui daw nina e.

²²“‘Katanpui khou tatloupui mei khou tei Ravguangc syang keylou kan diu!’ “‘Amen!’ twna meic nunc rui daw nina e.

²³“‘Kanowpui khou tatloupui mei khou tei Ravguangc syang keylou kan diu.’ “‘Amen!’ twna meic nunc rui daw nina e.

²⁴“‘Nkamhna meicdowpui mei khou tei Ravguangc syang keylou kan diu.’ ‘Amen!’ twna meic nunc rui daw nina e.

²⁵“‘Meic akhat rui niak tina kakhuay maekmei ta swluaipui mei khou tei Ravguangc syang keylou kan diu.’ ‘Amen!’ twna meic nunc tei rui daw nina e.

²⁶“‘Ravguangc tuang latdanv khatni latdyn guay tei piu makpui mei khou tei Ravguangc syang keylou kan diu.’ ‘Amen!’ twna meic nunc rui daw nina e.