Read Rongmei Naga RIAKDANV KALUAIHMEI 28 Bible Online

RIAKDANV KALUAIHMEI 28 - Rongmei Naga bible

RIAKDANV KALUAIHMEI 28

¹“Nangniw rui RINGHPOUC nangniw Racguangc lat piuna ai rui aseic nangniw khang tiimei latdanv guay hei lungh gutna piu e thei nangniw ta kandih nam ruc khou kauh liangmei zaat tiswlou puni.

²Nangniw RINGHPOUC nangniw Racguangc lat piu e thei mi suaihiam guay hei nangniw khang sw puni:

³“RINGHPOUC rui nangniw tuang kaidai khatni laupuk guay khou suaihiamlou puni.

⁴“RINGHPOUC rui nangniw tunapuan tikingckiuclou puni, nap-bi ti-nthuihlou puni khatni kiruai tii geiclou puni.

⁵“Nangniw tuang buanh khatni ntyan kanimei kuak khou tei tikambuilou puni.

⁶“Nangniw tat patmei ganv khou khatni guang datmei ganv khou suaihiamlou puni.

⁷“Nangniw tuang zauczihmei rui nangniw ta adow khang guang pwkhou RINGHPOUC rui nangniw ta rih tingamlou puni. Kaniw kabamv akhat na khou rui guangmei tei luangrac chanei swna pak tat kan puni.

⁸“RINGHPOUC Ravguangc rui suaihiam guang khang latdanv tiilouna nangniw tuang saamc guay nap rui padik puni. Nangniw rui taanc ruaihmei kathuic khou tichingkhiuhlou puni. Kamei rui nangniw khang tiiloumei kandic khou tei nangniw ta suaihiamlou puni.

⁹“Nangniw rui RINGHPOUC nangniw Racguangc lat piuna katuang latdanv guay taanc bam ti thei, katuang latdyng theilayna kamei rui nangniw ta katuang mei nunc tiswlou puni.

¹⁰Kum pwkhou RINGHPOUC rui kamei khang nangniw ta kadahlou the twmei kandih nam ruc khou lungc bammei maansei guay rui thay puni, kumna kaniw rui nangniw ta ping puni.

¹¹RINGHPOUC rui nangniw khang, kamei rui nangniw pupouc nunc khou nrianhloumei kandic khou tei nangniw tunapuan geicna, nap-bi khatni khouringh khounah geicna tiilou puni.

¹²Kamei rui tingpuk thangc rui tingdui geicna kaganv khou tii guangna nangniw tuang taanv guay khou tei suaihiamlouna, nangniw rui zaatc mpeyna khang nzanh pat puni. Nangniw thu zaatc baihmei khou rui pou bam dat lak khe.

¹³RINGHPOUC nangniw Racguangc rui nangniw ta zaatc pang khou kapy tiswlou puni, meic thei laymei na tiswlou lak ge. Ai rui aseic tiiloumei RINGHPOUC tuang latdanv guay hei lungh gutna piuna lungc ti thei nangniw kaganv kathuicna lungcgay chingkhiuhna lungc bam puni.

¹⁴Ai rui aseic nangniw khou tiiloumei latdanv guay hei akhat na sini zuanhpui tuang sw riu khatni rav baihmei ta kalumna kathei lay tat nuh mak ge.

¹⁵“Nangniw rui RINGHPOUC nangniw Racguangc lat piu makna ai rui aseic tiiloumei latdanv khatni latdyn guay hei piu nthuihna piu bam mak ge thei, mi simei guay hei nangniw khou guanglou puni:

¹⁶“RINGHPOUC rui nangniw tuang kaidai guay khatni laupuk guay khou tei sianglou puni.

¹⁷“Nangniw tuang buanh khatni ntyan kanimei kuak khou tei sianglou puni.

¹⁸“RINGHPOUC rui nangniw tunapuan, nap-bi, khatni khouringh khounah tiraulou puni.

¹⁹“Nangniw rui tatpatmei ganv khou khatni guang datmei ganv khou RINGHPOUC rui sianglou puni.

²⁰“Nangniw rui simei taanv taancna RINGHPOUC ta ganc pat re thei, nangniw rui taanhmei taanv guay khou tei amaanmei, kaguakcmei khatni kunghmei rana tiguang puni, kumna nangniw ta asaanh makna swkamut kamailou puni.

²¹Ravpyan rihpyan kathiak kathiak swna tiguangna nangniw rui guang lungc nimei kandic khou tei meic lunghmei maekna ganclou puni.

²²RINGHPOUC rui nangniw khou naengvmei ravpuat, puamhmei khatni ravmanhmei tiguang puni; ting kaenghmei khatni mpwan suhmei tiguangna nangniw tuang nap-bi swmutlou puni. Nangniw theic ngam mak saanv mi ryanra ryanriumei hei nangniw khou nai bam puni.

²³Ting riu dat lak khe, khatni nangniw tuang kandic tei ntanh kumc tanc puni the.

²⁴Ting phaan mbut khatni syniang pwanzingh tiguangna nangniw ta swkamut kamailou puni.

²⁵“Nangniw ta zauczihmei nunc baanc khou tiilou puni. Nangniw rui kaniw ta kabiak akhat na thangc rui adow puni tiki nangniw thu luangrac chanei pak tat puni kumna nangniw khou patloumei tei how pwkhou kandihmei guay rui ping puni.

²⁶Nangniw theiclou pwkhou nruay khatni khouringh rui nangniw zanc guang tu puni. Hei tei alay ganclou nimei meic nai dat lak khe.

²⁷RINGHPOUC rui Izipmei ruc khou tiguang kanmei tei kumcna nangniw khou ni asuh tiguang puni. Nangniw pumc tei asuh rui padik puni. Nangniw pumc tei asuhkaengv rui padik puni, khatni nthakmei tei tigay dat ngam ni tuang hamh the.

²⁸RINGHPOUC rui nangniw ta ti-mbalou puni; nangniw mik titiatlou puni khatni tikaguakc kasuakclou puni.

²⁹Nangniw miktiatmei kumcna kalaanv ganv khou sini kathamna tat puni, kumna nangniw chaeng thay dat pu lak khe. Nangniw rui taanhmei taanv guay tei kathai nthai dat pu lak khe. Nangniw ti hei raina khatni asutna lungc puni the, nangniw ta nkhavlou nimei nai dat lak khe.

³⁰“Nangniw now khang thanvluailoumei tei meic baihmei rui kaw kan puni. Nangniw rui swloumei kai khou tei nangniw lungctow mak puni. Nangniw rui lingcloumei drakha tei nangniw kathai tu tow mak puni.

³¹Nangniw tuang guaic tei nangniw hu khou rui dowluai puni tiki nangniw tutow lak ge. Nangniw hu khou rui nangniw tuang kuanniam nunc tei zay tat kan puni, kumna hei tei tiiguang dat ni tuang hamh the. Nangniw tuang lauziu guay tei zauczihmei khang tii kan puni, nangniw ta nkhavlou nimei nai dat lak khe.

³²Nangniw hu khou rui nangniw nac mpouh aluh guay ta tei bangh ta kumcna gin nunc khang tii pat puni. Nangniw nac nunc tei guang datmei ta tingmik pum phaengcna nangniw mik phaengc ha ngam bam sini guang dat ni tuang hamh the.

³³Nangniw rui ryanrana taanc patloumei guay tei zaatc baihmei rui tu puni. Nangniw panty khou rairiumei hamhna baihmei ariw dat lak khe.

³⁴Nangniw ryanra langvmei rui mba puni the.

³⁵Swgay dat lakmei suhmei asuh rui nangniw tan khou padik puni the; nangniw py khou rui phay nganv asuh rui padik puni the.

³⁶“RINGHPOUC rui nangniw ta khatni nangniw tuang guangc ta nangniw pupouc nunc rui sini lungclou makmei kandic khou titat puni. Hei khou tei thing ntauh rui kasiamhmei rav nunc ta kaniw kalum puni.

³⁷RINGHPOUC rui nangniw ta zinphaklou nimei kandic guay khou tei, nangniw ruc khou patloumei khang tei meic nunc hahlahla puni the; khatni kaniw rui nangniw ta sinnui sinnu puni the.

³⁸“Nangniw rui mpeyna lingclou puni, tiki katit na laa dat puni, kalam thu nkav rui tu ngam kan ni de.

³⁹Nangniw rui drakhaluai lingclouna makuat bam sini nangniw kathai rei tow lak ge, kadui ni zangv tow lak ge; kalam thu kaluai tei karik rui tu ngam kan ni de.

⁴⁰Nangniw tuang kandic tei Olive bang lingc padiklou bam sini nangniw Olive thauc laatow lak ge; kalam thu Olive thai guay tei nzw ngam kan ni de.

⁴¹Nangniw nac mpouh, aluh nai geic puni tiki kaniw ta tei rih nym tat ngam kan ni de.

⁴²Nangniw tuang thingbang khatni napbang guay tei ramhrik rui tu ngam kan ni de.

⁴³“Nangniw kandic khou bammei zaatc baihmei nunc tei nangniw ruc khou kauh ku hay hay puni the tiki nangniw thu mphumhkey khith khit puni the.

⁴⁴Kaniw tuang syandui nangniw khang tipou puni tiki nangniw thu kaniw khang tipoupat lak khe, nkhamh khou kaniw rui kapy, nangniw rui kamai sw puni the.

⁴⁵“Mi syang guay hei nangniw khou guang puni kumna nangniw ta swmutlou mak saanv nangniw khou bam puni, kalam thu RINGHPOUC nangniw Racguangc tuang latdyn khatni latdanv guay tei nangniw piu mak ge.

⁴⁶Mi guay tei nangniw khang khatni nangniw tounac guay khang Ravguangc tuang latzan sw nchinmei sw puni the.

⁴⁷RINGHPOUC rui nangniw ta kalam kaguayna khou suaihiamlou the tiki nangniw neihla zaenggayna kasiamruai sw mak ge.

⁴⁸Kumhpui zaeng rui RINGHPOUC rui nangniw khou thouc guang pw nimei zauczihmei nunc siamruai nangniw sw puni the — nangniw ndaapc puni the, tari puni the, paliuc puni the, maek turana puni the. Nangniw ta swmutlou mak saanv RINGHPOUC rui nangniw ta rai kasicna rai puni the.

⁴⁹Kandih tintou thangc bammei kalat kalw thay makmei zaat ta RINGHPOUC rui nangniw ruc khou phungc guang puni the. Kaniw tei mouc samc key kumc key puni the.

⁵⁰Kaniw tei meic nzina gaanv khat na khou sini gaanvthaih ta ni alauc ta ni zauc nzianlou dat pu lak khe.

⁵¹Kaniw rui nangniw tuang nap-bi khatni kiruai guay tu kan puni khatni theihmei nganvna nangniw kaniw siamruai sw puni. Kaniw rui nangniw khang nap-bi, drakhadui, Olive thauc, guaih, lauziu akhat na sini nsaekclou dat lak khe; kumna nangniw theic puni the.

⁵²RINGHPOUC Ravguangc rui tiiloumei kandic khou naimei kaidai guay tei kaniw rui adow puni, khatni nangniw rui lwm bammei kauhmei raengc guay tei bow key puni.

⁵³“Nangniw tuang kaidai guay tei dingbin pwkhou nangniw ndaapc langvna RINGHPOUC nangniw Racguangc rui tiiloumei nangniw nac nunc ta nganvna nangniw tu puni.

⁵⁴Meicdaihmei swna lungc guangmei nganvna tu khang maeklangv pwkhou kachana, kamei nzianna kaw bammei kanow, nkhamh khou kanac nunc ta nganv daek lak ge.

⁵⁵Nangniw tuang zauczihmei rui nangniw kaidai dingbinmei ganv khou tei nang rui tu bammei zanc tei meic gaanv khat na khang sini tiipat nituang hamh the.

⁵⁶Nangniw pang khou ramthaymeipui khatni meicdaihmei sw bammei, meicdaihmei swpui zaeng rui kandih khou katan rui khat sini niilou makpui mei tei nganv kamei rui tu bammei zanc tei kagaanv khang, kanac mpouh, aluh khang nganv tii nituang hamh the.

⁵⁷Kamei ngana puanc tang pwkhou kapumc khou rui patmei ngana khatni nahphey tei nganvna tii lak khe kalam thu kaidai tei zauczihmei rui ding bin pwkhou tu khang maeklangvna kamei karana nkamhna tu puni the.

⁵⁸“Mi buk khou hyloumei Ravguangc tuang latdanv guay hei nangniw piu chuyna piu mak ge thei khatni meicpingmei RINGHPOUC nangniw Racguangc zanc ta chakhwang swna lungh mak ge thei,

⁵⁹meic pingmei ravpuat nangniw khou, nangniw tou nac nunc khou mpeyna nthukmei khatni gaydat ru lakmei ravpyan RINGHPOUC rui tiguang puni.

⁶⁰Nangniw Izip kandic khou how kanmei meicpingmei ravpuat guay tei kamei rui nangniw khou tiguang dat puni, kumna nangniw gay dat ni tuang hamh the.

⁶¹Mi Ravguangc tuang latdanv khatni latdyn hyloumei buk khou hei hylou makmei ravpuat khatni ravpyan zaat kaguay ni kamei rui tiguang puni.

⁶²Nangniw hei tingpuk khou naimei gaanchuangcna zu lungc pat bam sini, nangniw meic katit na ringc nsaekclou puni, kalam thu nangniw RINGHPOUC lat piu mak khe.

⁶³Nangniw ta kamei rui tilungcgayloumei khou khatni tilungckingc lungckiucloumei khou neihlamei kumc, nangniw ta swmaan dat khang ni neihlana swmaan puni. Nangniw gut lungc nimei kandic khou rui nangniw ta phuai ganclou puni.

⁶⁴“RINGHPOUC rui nangniw ta zaatc pang khou kandih tintou nganvna zinphaklou puni, kumna nangniw khatni nangniw pupouc nunc rui kalum bam makmei thing ntauh rui kasiamhmei rav ta nangniw hei khou tei kalum puni.

⁶⁵Nangniw khang kabamv akhat na khou sini nchu-nzaenghmei nai dat lak khe, nangniw tuang e twmei bamv ni nai dat lak khe. RINGHPOUC rui nangniw khang lunghgeihmei khatni theidwan khang rigwnmei maekmei twmei hei tipadiklou puni the.

⁶⁶Nang panty tei kaganv kathuicna khou pingna lungc puni the. Zingbangc kalaanv pingmei rui padikna lungc puni the. Theihmei ta ping tanh tanna lungc puni the.

⁶⁷Nangniw rui howmei kathuicna khou tei pingna nangniw buc paduph dupna lungc puni the. Lauthwan pat re thei tingzyn guang zaihmei ta laa nii puni, tingzyn key e thei lauthwan patdat zaihmei ta laa nii puni.

⁶⁸Nangniw Izip thangc tat dat ni tuang hamh the twna salou bam sini RINGHPOUC rui nangniw ta rungh khou rui Izip thangc thouclou dat puni. Khoutei nangniw rana nangniw ta zauczihmei nunc khang bangh swna zuanc puni, tiki meic gaanv khat na rui sini nangniw ta liulou nii ni tuang hamh e.”