Read Rongmei Naga RIAKDANV KALUAIHMEI 29 Bible Online

RIAKDANV KALUAIHMEI 29 - Rongmei Naga bible

RIAKDANV KALUAIHMEI 29

¹Isaraelmei lev twna Moab kandic khou latdyng sw o twna RINGHPOUC rui Mousi khou tiiloumei lat kiu mi hei e. Mi hei Sinai Chyng khou sw kanmei latdyng khou tei haaplou datmei tuang e.

²Mousi rui Isaraelmei guay ta kaw guang kaduaina kaniw khou kumna sa the, “RINGHPOUC rui Izipmei guangc khou, katuang meicdaihmei nunc khou khatni katuang kandic kapwm khou swlou kanmei tei nangniw how the.

³Si sihmei ntaamhmei, charynmei, khatni sw nchinmei tuang azuh RINGHPOUC rui swlou kanmei tei nangniw how the.

⁴Tiki nangniw how kanmei guay tuang kabac tei nangniw ta tithaylou kan mak he.

⁵RINGHPOUC rui nangniw ta tingkwm 40 tazikramv khou zay tat the, tiki nangniw tuang pheybaan ni phaythuapc ni kaek mak ge.

⁶Nangniw khang ntyan ni drakhadui ni maek khwan the, khoutei kamei hei nangniw Racguangc e twmei dinclou khang nangniw khang kage naimei guay tei kamei rui tiilou the.

⁷Aniu rui mi bamv khou hei guang pwkhou, Heshbonmei guangc Sihon lev Bashanmei guangc Og rui aniu ta adow khang pat the. Tiki kaney ta aniu rui ngamlou the.

⁸Aniu rui kaney tuang kandic tei laana Reuben kaikhwang, Gad kaikhwang khatni Manase kaikhwang kapaek akhat khang nzanhlou the.

⁹Nangniw rui taanhmei guay khou ngam khang mi latdyng tuang lat guay hei piu chuyna piu nina e.

¹⁰“Nangniw aseic hei nangniw kapy nunc, meicdaihmei nunc, gaanvdaih nunc khatni baih baihmei nunc ni RINGHPOUC hu khou ding bam the.

¹¹Nangniw nac nunc, now nunc khatni nangniw pang khou lungc bammei nangniw khang thing riamlou bammei khatni dui zulou bammei nunc ni ding bam the.

¹²RINGHPOUC nangniw Racguangc rui nangniw lev latdyng sw khang rui nangniw khou hei dingna bam the,

¹³kumna nangniw pupouc Abraham, Isak khatni Jakob khou Ravguangc kamei rui nrianhloumei kumcna ntaw RINGHPOUC rui nangniw ta kamei swna laalou diu khang e.

¹⁴Mi latdyng swloumei hei nangniw khou na hamh e.

¹⁵Kamei rui mi latdyng swmei hei aseic mi bamv khou kahu khou ding bammei nangniw guay khatni guang nimei nangniw kikta guay khang ni e.

¹⁶“Izip khou tuang panty tei akumh cho khatni kandih baih baihmei ramc khou tatruanloumei tei akumh cho twmei nangniw thay the.

¹⁷Kaniw tuang thing, ntauh, daandi, kachaekc rui kasiamhmei chanymei ravmaengc guay tei nangniw how the.

¹⁸Khou hei ding bammei nggaanvmei, ntumei, kaikhunh khatni kaikhwang kathuicna RINGHPOUC nangniw Racguangc ta ganclouna zaatc baih baihmei rav nunc ta kalum tat mak khang ramh thay lo. Hei tei nkhucmei kakhai padikmei thingbang thau pat nimei maan kumc puni the.

¹⁹Mi lat guay hei chu nganv lana, meicliamna kanyng ning swna lungc bam sini ramhsw bam ni tuang hamh e twna mi bamv khou ding bammei nangniw ningmaanv mak khang sw lo. Hei tei rui nangniw meic guayna ta — meicsimei ta ni, meicgaymei ta ni swmaan puni.

²⁰Mi kumhpui mei ta RINGHPOUC rui kuaklou ni tuang hamh e. Mi phaan, RINGHPOUC tuang lungpuam karuc khou chuangc thauna kata tei swmutsutlou mak saanv mi buk khou hyloumei syang guay hei karuc khou keylou puni, khatni kazanc tei tingpuk bangc khou rui thutmaanlou puni.

²¹RINGHPOUC tuang latdyn buk khou hyloumei syang guay tei karuc khou tikeylouna Isaraelmei guayna khou sw nchinmei tuang sw bam puni.

²²“RINGHPOUC rui nangniw kandic khou ryanramei tiguangloumei tei lungc guang nimei kin guay khatni kandih duh thangc bammei zaatc baihmei nunc rui nganvna how bam puni.

²³Ramvpuk guay tei maipu khatni ntey rui padikna nsaramv swna bam puni; khou tei ramhkhat sini lingclou ni tuang hamh e, pucbwan na sini thau ni tuang hamh e. Nangniw tuang kandic hei RINGHPOUC rui kalungpuamcna swmaan kanmei Adma khatni Zeboiim kandic khou naimei Sodom lev Gomora kaidai kumc puni the.

²⁴Khoutei kandihmei guay rui kumna thanv puni the, ‘Tabui sw tina RINGHPOUC rui mi kumhmei hei mi kandic khou swlou bam tu cho? Tabui sw tina kalung heidi puamc putu cho?’

²⁵Khoutei daw nimei thu, ‘Mi hei RINGHPOUC tuang mei nunc rui kaniw pupouc nunc Ravguangc lev twna latdyng sw kanmei tei swbak tina e. Mi latdyng tei RINGHPOUC rui kaniw ta Izip khou rui nduangh patloumei ganv khou rui swlou kanmei tuang e.

²⁶RINGHPOUC rui kaniw ta kalum nuh mak ge twna saloumei, kaniw pupouc nunc rui nganv kalum guang makmei rav nunc ta kaniw kalum tina e.

²⁷Kum tina RINGHPOUC rui kalungpuamcna kalatdanv buk khou hyloumei syang guay kaniw kandic khou tikeyloumei tuang the.

²⁸RINGHPOUC lungpuam chuangc thauna kamei rui kaniw ta kaniw tuang kandic khou rui kamaan phuk patna zaatc baih baihmei kandic khou gancloumei tuang e, kumna aseic hei kaniw mi khou tei bammei tuang e.’

²⁹“RINGHPOUC aniu Racguangc rui ndauh pat makmei nai di he; tiki kamei rui katuang Riakdanv thu ndauhlou the, kumna aniu khatni aniu kikta guay thu hei tei tingsaengzaeng piu bam nina the.