Read Rongmei Naga RIAKDANV KALUAIHMEI 3 Bible Online

RIAKDANV KALUAIHMEI 3 - Rongmei Naga bible

RIAKDANV KALUAIHMEI 3

¹“Mi tangv tei, aniu dihpy biak, Bashan ramv biak ngangh the. Khoutei guangh Og rui katuang mei guay ta nduanghna aniu ta adow khang Edrei kaidai daeng khou pat the.

²Khoutei RINGHPOUC rui akhou sa the, ‘Og ta ping riu. Ai rui kata, kamei nunc ta, khatni katuang kandic guay ta nangniw khang tii puni the. Heshbon khou bammei Amormei guangc Sihon khou swloumei kumcna kakhou ni swlou o.’

³“Kumna RINGHPOUC rui Bashanmei guangc Og khatni kamei nunc ta aniu baanc khou tiilouna aniu rui kaniw guayna ta swluai ngam the.

⁴Katuang kaidai guay tei ni aniu rui laa ngam the — aniu rui laa makmei kaidai akhat na sini maek khe. Kaguayna kaidai 60 twmei thu Bashanmei guangc Og rui sinmei Argob ramv kapwm tei laa ngam the.

⁵Mi kaidai guay tei raengh kauhmei raenglouna, raenghmun kaikhamv taanna bammei kaidai guay e. Raengh raeng makmei namv ni mpeyna nai khwan e.

⁶Guangh Sihon khou swlou kanmei kumcna aniu rui kaidai guay tei swkamut kamaina nggaanvmei, ntumei alauc kaguayna ta swluai ngam the.

⁷Aniu rui kaniw tuang khouringc guay khatni kaniw tuang puat guay laa the.

⁸“Jordan neihpat khou naimei ramv, Arnon nzaengc Arnon duibaek khou rui Hermon Chyng nganvmei hei mi ganv khou tei rui mi Amormei guangc nei khou rui laamei tuang e.

⁹(Hermon Chyng ta Sidonmei rui Sirion khatni Amormei rui Senir twna kaw e.)

¹⁰Aniu rui Bashanmei guangc Og tuang ramv guay twmei thu Chyng nzaengc khou naimei kaidai guay, Gilead khatni Bashan ramv guay, neihpat thangc Saleka lev Edrei kaidai nganv laa ngam the.”

¹¹(Guangh Og hei Rephaim zaat nkhamhmei di the. Katuang laeng tei, chowbuk chakiu saengc padeih daihmei ntauh laeng e. Hei tei Amormei tuang kaidai Rabba khou nai bam di he.)

¹²“Aniu rui mi kandic tei laa pwkhou, Aroer kaidai khou rui dihpy biak Arnon duithuak daeng khou naimei ramv khatni Gilead tuang chyngramv kalangv akhat, mi tuang kaidai guay lev kazauhna Reuben khatni Gad kaikhwang kanei khang ai rui nzanhlou the.

¹³Nsaekcloumei Gilead ramv guay, Og rui sinlou khwanmei Bashan kandic, twmei thu Argob ramv kaguay tei ai rui Manase kaikhwang kapaek akhat khang tiilou the.” (Bashan tei Rephaimmei tuang ramv twna thay bam khwan e.

¹⁴Manase kaikhwangmei Jair twmeipu rui Argob tuang ramv kapwm, twmei thu Bashan tei Geshur lev Maaka ramvrei nganv laa the. Kamei rui namv guay zanc tei kazanc khou phuaklou the, kumna ntaw ni Havvot Jair tuang namv twmei thayna bam geic he.)

¹⁵“Ai rui Gilead tei Manase kaikhwangmei Makir khang tiilou the.

¹⁶Gilead khou rui Arnon duithuak kanei kak khou naimei ramv tei Reuben lev Gad kaikhwang khang tiilou the. Mi duithuak chung tei kaniw tuang dihba ramvrei the. Kaniw tuang dihpy ramvrei tei Jabbok duithuak the. Mi langv akhat tei Ammonmei tuang ramvrei ni the.

¹⁷Neihkey ramvrei rui Jordan duithuak Galili khou rui Theihmei duipui nganv tei the. Neihpat thangc rui Pisga Chyngphay nganv e.

¹⁸“Mi ganv khou tei ai rui kaniw khou kumna dinclou khwan e: ‘Mi Jordan neihpat biak ramv hei RINGHPOUC aniw Racguangc rui nangniw khang tiiloumei tuang the. Nangniw tuang rihphyan guay ta tei rihpwan piu lana Isaraelmei kaikhwang baihmei guay hu khou hei Jordan paengc thangc thouc patna kaniw tuang ramv laa khang nkhavlou titho.

¹⁹Nangniw nownac nunc khatni nangniw tuang kiruai guay (nangniw kiruai geic e twmei ai thay e) tei ai rui nangniw khou tiiloumei kaidai guay khou tei ganclou duc tho.

²⁰RINGHPOUC rui nangniw puchaic nunc khang tiiloumei Jordan neihkey ramv hei laa kan mak saanv kaniw ta nkhavlou tio. RINGHPOUC rui nangniw ta giuga makna tilungc keyloumei kumcna kaniw ta ni giuga makna tilungclou mak saanv nkhavlou nina e. Mi tangv tei thu ai rui nangniw khang tiiloumei ramv khou hei guang dat nuh the.’

²¹“Mi tangv tei ai rui Joshua khou sa the: ‘RINGHPOUC nangniw Racguangc rui guangh Sihon lev Og khou taanclou kanmei tei nang how kan the. Nangniw rui gut nimei kandic guay khou ni kamei rui hei tei kumcna swlou muay puni.

²²Kaniw ta nangniw ping riu, kalam thu RINGHPOUC nangniw Racguangc rui nangniw khang adowlou puni.’

²³“Mi ganv khou tei ai ranvna kumna huayney the,

²⁴‘He Kauh Liangmei RINGHPOUC, nang rui daihmei charynmei taanv taanclou pw nimei tei ntaw thu kabangbi na lyanloumei tuang di he twmei ai thay e. Nang rui taanc kanmei taanvdaih guay tei taanc ngammei rav baihmei tingpuk kandih khou maek ge!

²⁵He RINGHPOUC, ata ni Jordan duithuak paengc tikaan patna kandih gaymei, kandih gaymei chyngramv, khatni Lebanon chyngbut guay ta tei tihowlou o.’

²⁶“Tiki nangniw zaeng rui RINGHPOUC rui ata kalungpuamc the kumna nkinglou mak khe. Nkingloumei phaan kamei rui sa the, ‘Biu the! Hei tei satow dat ri tho!

²⁷Pisga Chyng twan khou tei ku lana dihpy dihba, neihpat neihkey zauc o. Nang rui phaengc howmei guay tei zauc mincna zauc tho, kalam thu nang thu Jordan duithuak tat kaan ngam ni tuang hamh the.

²⁸Joshua khou kamei rui dinclou nimei guay tei dinclou titho. Kalung tei sw ntiplou titho, kalam thu nang rui howmei ramv guay hei laa khang kamei rui Isaraelmei ta nduangh gut puni the.’

²⁹“Kumna aniu nzaengc khou Bethpeor paengc khou bamlou the.”