Read Rongmei Naga RIAKDANV KALUAIHMEI 30 Bible Online

RIAKDANV KALUAIHMEI 30 - Rongmei Naga bible

RIAKDANV KALUAIHMEI 30

¹“Syang lev suaihiam kak khou nangniw kadah khang ai rui ntaw nangniw khou tiilou the. Mi guay hei nangniw ruc khou patlou pwkhou, RINGHPOUC nangniw Racguangc rui nangniw ta zinphakloumei zaatc pang khou nangniw lungc bam pwkhou ai rui nangniw kadah khang tiiloumei hei ningtow puni.

²Nangniw khatni nangniw kikta guay rui RINGHPOUC khou hanc guang datna ai rui aseic nangniw khang tiimei latdanv guay hei nangniw lung kapwm rui piu pw e thei,

³RINGHPOUC nangniw Racguangc rui nangniw ta zauc nzianlou dat puni. Kamei rui nangniw ta zinphakloumei zaatc nunc khou tei rui kamei rui nangniw ta phungc guanglou dat puni, kumna kamei rui nangniw ta tilungcgay chingkhiuhlou dat puni.

⁴Duc liangmei kandic kwn thangc nangniw ta zinphaklou pwsini, RINGHPOUC nangniw Racguangc rui nangniw ta khuam kaduai datna nangniw ta phungc guanglou dat puni,

⁵kumna nangniw pupouc nunc lungcloumei kandic tei nangniw laa dat puni. Kamei rui nangniw ta nangniw pupouc nunc ta suangc tilungcgaylou puni khatni meicsing ti-mbulou puni.

⁶Nangniw lung kapwm rui kata nzian khang RINGHPOUC nangniw Racguangc rui nangniw khang khatni nangniw tounac nunc khang latpiumei lung tiilou puni, kumna nangniw mi kandic khou tei lungc bam puni.

⁷Mi syang guay hei nangniw ta zauczihmei nunc, nangniw ta karaengna rairiumei nunc ruc khou keylou dat puni.

⁸Kumna nangniw kalat piu dat puni khatni ai rui aseic nangniw khou tiiloumei latdanv guay hei nangniw ngaek dat puni.

⁹Nangniw rui taanhmei kaguayna khou RINGHPOUC rui tilungcthaulou puni; nangniw nac nunc khatni khouringh khounah kingckiuc pat puni, khatni nangniw laupuk khou nap-bi thuih puni. Kamei rui nangniw pupouc nunc ta tilungcgaylou niimei kumcna nangniw ta ni tilungcthaulou nii puni.

¹⁰Tiki nangniw kalat piu nina e khatni kamei rui dincloumei guay hyloumei buk khou naimei latdanv guay hei ngaek nina e. Nangniw lung kapwm rui kakhou ngalanc guang nina e.

¹¹“Ai rui aseic nangniw khou tii bammei latdanv guay hei nangniw khang kungc langvmei khatni nangniw haamv tangc lakmei tuang hamh e.

¹²Mi hei tingpuk kauh thangc naimei tuang hamh e. ‘Aniu chuna piu khang thow rui kuna hei tei aniu khang laa key nina cho?’ twna nangniw thanv bam khang hamh e,

¹³khatni hei tei duipui paengc thangc nai kanmei tuang hamh e. ‘Aniu chuna piu khang thow rui duipui paengc thangc tatna aniu khang phungc guang nina cho?’ twna thanv bam khang ni hamh e.

¹⁴Mi hei nangniw daeng khou nai bam rap di the. Nangniw hei tei thay the khatni sa kaluaih dat bam nuh the. Kumhpui zaeng rui nangniw hei tei piu nina e.

¹⁵“Simei lev gaymei khatni theihmei lev ringhmei kak khou nangniw rui kapah khang aseic hei ai rui nangniw khou tiilou the.

¹⁶Ai rui aseic nangniw khou tiiloumei RINGHPOUC nangniw Racguangc tuang latdanv guay tei nangniw piu e thei, khatni katuang latdanv guay ngaek ge thei, nangniw lungc thau puni khatni zaatc daihmei sw puni. Nangniw guang lungc nimei kandic khou tei RINGHPOUC nangniw Racguangc rui nangniw ta suaihiamlou puni.

¹⁷Tiki nangniw lat liamna kalat chu nii mak ge thei khatni tat mbianghna rav baihmei ta kalum tat kan e thei,

¹⁸nangniw ta swmutlou puni — ntaw hei ai rui nangniw khou kadyloumei hei the. Nangniw guang lungc nimei Jordan paengc ramv khou tei nangniw lungc saengc ni tuang hamh e.

¹⁹Ntaw nangniw rui theihmei lev ringhmei, Ravguangc suaihiam lev Ravguangc syang kak khou nangniw rui kahawmei kadah tho, kumna nangniw rui kadah kanmei tuang sakhi khang tei tingpuk lev kandih ta kauc tho. Ringhmei ta kadah o.

²⁰RINGHPOUC nangniw Racguangc ta nzian o, kalat piu o khatni kakhou na bam o, kum e tw e thei nangniw pupouc Abraham, Isak, khatni Jakob khou tii ni twna nrianhloumei kandic khou tei nangniw khatni nangniw tounac nunc lungc saengcna lungc bam puni.”