Read Rongmei Naga RIAKDANV KALUAIHMEI 31 Bible Online

RIAKDANV KALUAIHMEI 31 - Rongmei Naga bible

RIAKDANV KALUAIHMEI 31

¹Mousi rui Isaraelmei nunc khou kumna sa dat re,

²“Ai ntaw thu tingkwm 120 tangc the, kumna ai nangniw tuang chaengzaypouc sw tanh tan bam ngam pulak khe. Hei na hamhna ai hei Jordan kaan pat ni tuang hamh e twna RINGHPOUC rui salou the.

³RINGHPOUC nangniw Racguangc rui nangniw hu khou kaanpat reylou puni. Kamei rui mi zaat nunc ti hei nangniw hu khou swmutlou puni, kumna nangniw kaniw kandic tei laa puni. RINGHPOUC rui samei kumcna Joshua hei nangniw tuang kapy sw puni the.

⁴RINGHPOUC kamei rui Amormei guangc nei Sihon lev Og ta rih ngamlouna kaney kandic swmutloumei kumc kamei rui mi zaatc nunc ti hei swmutlou puni.

⁵RINGHPOUC rui nangniw ta mi nunc ta tei tingamlou puni, ai rui nangniw khou saloumei kahakmei tei nangniw rui kaniw ruc khou taanclou puni.

⁶Nangniw lung ding o khatni lwmgay o. Kaniw ta ping riu. Nangniw Racguangc RINGHPOUC kamei kahak rui nangniw ta tat nchamclou puni. Kamei rui nangniw ta mpatlou zat lak ge.”

⁷Hei tangv tei Mousi rui Joshua ta kaw guangna Isaraelmei nunc hu khou tei kumna sa the, “Nang lung ding o khatni bauc o; kaniw pupouc nunc khou RINGHPOUC rui nrianhloumei kandic khou tei mi mei nunc hei rui gut laa khang nang rui kapy sw puni the.

⁸RINGHPOUC kamei kahak rui nang ta zaylou puni khatni nduanghlou puni. Kamei rui nang ta mpatlou zat lak ge, kumna rouh riu khatni ping riu.”

⁹Kumna Mousi rui Ravguangc tuang Riakdanv guay tei hykeylouna RINGHPOUC tuang Latdyng Khuk puanc tat bammei Levimei amuh nunc khou khatni Isaraelmei kapy nunc khou tiilou kan the.

¹⁰Kamei rui kaniw khou kumna latdanv tii the, “Tingkwm chanei luai guangmei kathuic, powra kuakloumei kwm tei guang dat pwkhou Chaengkai Ngai — khou mi hei kauc ranvna pac o.

¹¹Isaraelmei nunc tei RINGHPOUC nangniw Racguangc ta kalum khang kalummei bamv khou guang pwkhou mi hei kaniw khou pac o.

¹²Meic katana rui chu lana RINGHPOUC nangniw Racguangc ta champouh thay khang khatni kamei rui nchamloumei piu chuyna piu kan khang rui nggaanvmei guay, ntumei guay, alauc guay, khatni nangniw kaidai guay khou lungc nchamc bammei zaatc baihmei guay ta ni kaw guang o.

¹³Kumna RINGHPOUC nangniw Racguangc tuang latdanv tei chu zat makmei nangniw tounac nunc ni kumna chu tow puni. Jordan paengc thangc kaniw rui guang lungc nimei kandic khou tei kaniw lungcbam saanv kaniw kalat piu thay khang ncham bam khang e.”

¹⁴Hei tangv tei RINGHPOUC rui Mousi khou sa the, “Nang ringh saengc bam ni tuang hamh the. Joshua ta kawna pheykai khou tei nduangh guang tho, ai rui kakhou nchamlou puni the.” Mousi lev Joshua tei kalummei pheykai thangc tat the.

¹⁵Khoutei RINGHPOUC kamei muangh tiangc swna kalummei pheykai chaengmun khou dingna lyanlou the.

¹⁶RINGHPOUC rui Mousi khou sa the, “Asaanh makna nang nang pu nangpouc nunc lev theic puni the, kumna nang theic kan pwkhou meic nunc tei lat piu ni tuang hamh the khatni ai lev kaniw kak khou sw kanmei latdyng tei kaniw swbak puni the. Kaniw ata ganclouna kaniw gut pu nimei kandic tuang rav baihmei nunc ta kalum puni the.

¹⁷Hei tei pat pwkhou, ai kaniw ta lunghpuamh puni the: ai rui kaniw ta ganclou puni the, kaniw khou rui azaw nkamh puni the, kumna kaniw ta swmutlou puni the. Meicpingmei tuang swkamut kamaimei azuh kaniw ruc khou guang puni. Ravguangc ai rui kaniw ta ganclou tina mi guay hei kaniw ruc khou guanglou bam tuang the twmei mi ganv khou kiu kaniw thay pat puni.

¹⁸Mi ganv khou kiu ai rui kaniw ta nkhavlou dat lak khe. Kalam thu kaniw simei taanv taanc the khatni rav baihmei ta kalum tat kan the.

¹⁹“Ntaw thu, mi lu hei hylou tho. Mi hei kaniw ruc khou sakhi swna bam khang e. Mi hei Isaraelmei nunc khou nchamlou tho.

²⁰Ai rui kaniw pupouc nunc khou nrianhloumei theilayna mi kandic guaihnoudui lev nkhuaihdui luanghmei khou tei ai rui kaniw ta nduangh guanglou puni the. Kaniw tu nii zangv niimei taektw kaguayna nai puni the, khatni khou tei kaniw amanvna lungc bam puni the. Tiki kaniw rav baihmei ta kalum tat kan ni de. Kaniw ata ganc pat puni khatni atuang latdyng swbak puni.

²¹Kumna meicpingmei tuang swkamut kamaimei tuang mpeyna kaniw ruc khou guanglou puni. Tiki mi lu hei thu suan bam puni, khatni mi rui kaniw ruc khou sakhi sw bam puni. Ntaw, ai rui kaniw khang nrianhloumei kandic khou tei kaniw ta nduangh guanglou mak khou rui sini kaniw kakhanh bammei tei ai thay the.”

²²Mi nungc kahak tei Mousi rui mi lu tei hylouna Isaraelmei nunc khou nchamlou the.

²³Mi khou tei RINGHPOUC rui Nun nac Mpouh Joshua khou sa the, “Lungning ding o khatni bauc o. Ai rui kaniw khang nrianhloumei kandic khou tei nang rui Isaraelmei nunc ta tei nduangh guanglou puni de, khatni ai nang ta lamluailou puni de.”

²⁴Mousi rui Ravguangc tuang Riakdanv tei katit na sini nsaekclou mak khang zauc mincna buk khou hylou the.

²⁵Kamei hei tei luai pwkhou RINGHPOUC tuang Latdyng Khuk puanhmei Levimei amuh nunc khou sa the,

²⁶Mi Ravguangc tuang Riakdanv buk hei laana RINGHPOUC nangniw Racguangc tuang Latdyng Khuk daeng khou lou tho. Kumna hei tei kamei nunc ruc khou sakhi swna nai bam khang e.

²⁷Kaniw adih nu tanhmei khatni meicliammei nunc cho twmei ai thay e. Ai ringc bam khou kaniw rui RINGHPOUC lat liamna lungc kan the, ai theic kanmei tangv kaniw liam ranv puni he.

²⁸Nang rui khwang tuang kapy guay khatni meicdaihmei guay ta ahu khou kaw guang kaduai o, ai rui mi guay hei kaniw khou raclou puni. Tingpuk kandih ta kaniw ruc khou sakhi sw khang ai rui kaw e.

²⁹Ai theic kanmei tangv meic nunc hei sithau puni the kumna ai rui kaniw khou nchamloumei tei laa mak puni the. Kumna guang nimei ganv khou kaniw ryanra ryanriumei ariw puni the, kalam thu RINGHPOUC kamei rui taanh riu twna samei tei kaniw taancna RINGHPOUC ta tilunghpuamc puni the.

³⁰Isaraelmei kapwmna rui nking bam khou Mousi rui lu kasaanv saengh tei sa key the.