Read Rongmei Naga RIAKDANV KALUAIHMEI 32 Bible Online

RIAKDANV KALUAIHMEI 32 - Rongmei Naga bible

RIAKDANV KALUAIHMEI 32

¹“He tingpuk kandihle, ai rui samei lat hei nkinglou o, ai rui sa patmei hei nking diangcna nkinglou o.

²Ai rui dinclou nimei lat hei tingthw riu key kumc key puni the khatni zikdui kumc chungclou puni the. Alat guay hei thingbwan khou riu keymei tingthw kumc puni the, ramhbwan khou nzaengna riu keymei ting kumc puni the.

³Ai rui RINGHPOUC zanc ta kauc ndauh ni, khatni kamei nunc rui kahym tei rac ndauh ni.

⁴“RINGHPOUC hei tanhmei gaekloumeipu e, kachaeng hei nthuih e khatni nzih e; nang Racguangc hei suai zat mak ge khatni nchumh e; nchumh nzihmei na tei kamei taanc e.

⁵Tiki nangniw thu lwm nuh mak ge, kamei nunc sw khang biuh mak ge, paapcmei khatni meic guatmei zaat re.

⁶Nangniw rui RINGHPOUC khou swlou nimei kiu mi hei di the na cho, nangniw mpangmei, sigay thay makmei nuncle? Kamei hei nangniw pu e, nangniw ta damcloumei kaipouc e, kamei rui nangniw ta zaatc akhat tiswlou the.

⁷“Reynungc, tat kanmei ganv ta tei kakhanh o; tabui pat kan tu cho twmei nangniw pupouc nunc khou thanv o, tat kanmei pary tei gaanvthaih nunc rui dinclou puni.

⁸Kauh Liangsingmeipu rui zaatc guay khang kakandic dic khang nzanhlou the; zaatc nunc tei tabui tabui khou lungc nina cho twmei dinglou the. Kamei rui zaatc kathuicna khang katuang katuang rav tiilou the,

⁹tiki Jakob kikta guay ta thu kakhang kadahlou the.

¹⁰“Kaniw tazikramv khou ruan tat bammei ta kamei ariw the, ramvkaengv, mpwan rui kathamv kykaeng bammei tazikramv khou. Kamei rui kaniw ta gaeklou the khatni makavlou the, kamei rui kaniw ta kamiknac ta gaek kumc gaeklou the.

¹¹Kanac nunc ta samc nchamloumei mouckauh kumc, laamv ntyng patlouna kasw ruc khou giuga makna tibamlouna, RINGHPOUC rui Isaraelmei ta bow mak khang gaeklou e.

¹²RINGHPOUC karana rui kamei nunc ta zaylou e, rav baihmei rui nkhavlou mak ge.

¹³“Kamei rui kaniw ta chyng kauhmei bamv khou tibamlou the ramvpuk khou thau patmei guay tei titulou the, kumna ramvpuk khou thau patmei guay tei kaniw tu the. Khow tauhramv khou nkhuaihdui nai the taukaengv ramv khou Olive bang kathaw gayna thau the.

¹⁴Guaihkui ziuhkui guay rui kanoudui mphamhna tiipat the; gay liangmei lauziu, ziuh khatni guaih bangh nruaih pat the, gay liangmei gehu tu the, gay liangmei drakhadui zangv the.

¹⁵“RINGHPOUC tuang mei nunc tei lungcgay thau laki, kaniw tu nuaih chuth chutlou lana meicliam the. Kaniw ta damcloumeipu Ravguangc ta kaniw ganc the, khatni tancbauhmei kanloumeipu ta ganc pat the.

¹⁶Kaniw ravmaengc kalumna RINGHPOUC ta timamavlou the; khatni simei taanv taancna kalung tipuamclou the.

¹⁷Rav kaling hamhmei khang kaniw kat the, kaniw pupouc nunc rui thay zat makmei rav nunc khang kat the, Isaraelmei rui kalat piu bam zat makmei rav nunc khang.

¹⁸Kaniw kaniw Racguangc ta amuc kan the, tancbauhmei kaniw ta kanloumeipu ta, kaniw khang ringhmei tiiloumeipu ta.

¹⁹“Hei tei RINGHPOUC rui how pwkhou, kalungpuamc the kumna kanac mpouh aluh nunc ta tei ganc pat the.

²⁰Kamei rui sa the, ‘Ai kaniw ta nkhavlou dat lak khe,’ ‘Mi kalung tanhmei, lwm nuh makmei nunc khou tei, kaniw khou tabui pat puni cho ai zauc puni the.

²¹Kaniw tuang ravmaengc nunc rui alung tipuamc the, kachangh hamhmei rav nunc tei rui, kaniw tuang rav nunc rui ata timamav the. Hei zaeng rui zaatc akhat sini sw makmei zaat ta sinswna ai rui kaniw lung tipuamclou puni the; mpangmei zaat rui kaniw lung tipuamc puni the.

²²Alungpuam mai kumc chuangc thau puni the, kumna kandih khou naimei guay ta rawmut puni the. Hei tei taruaih ramc nganv chuangc tangc puni, luanghbut maan guay rawmut puni.

²³“‘Ai rui kaniw khou luaimei nganv thay makmei ryanra ryanriumei tiguang puni, kumna atuang pailu kaniw ruc khou sin puni the.

²⁴Kaniw ndaapcna khatni ravmancna theic puni; meic pingmei ravpyan khou rui kaniw theic puni. Kaniw ta sw kasic khang ai rui nwmbangc khouringc tiguang puni, kakhay tanhmei nrui ni tiguang puni.

²⁵Chaengdai chaengdai khou suc-rih rui theihmei tiguang puni, kaikhunh kaikhunh khou ping kadunhmei tiguang puni. Chabwan chanaw guay theic puni; ngasatna khatni gaanvsuh gaanvthaih ta ni nsaekc lak ge.

²⁶Ai rui kaniw ta zinphak pat khang kakhanh kan ni the, maansei pang khou rui ningtow dat mak khang swmutsutlou puni the.

²⁷Amei nunc ta kaniw rui zaw tisilou the, twna kaniw ta zauczihmei nunc ta ai tisalou lak ge, kaniw ta swpiak keymei tei ai rui de.’

²⁸“Isaraelmei hei kabah thay makmei zaat akhat re, kaniw khou ningting akhat na sini maek ge.

²⁹Kaniw ta tabui zaeng rui zaw tisilou tu cho twmei kaniw thay mak ge; tabui sw kan tu cho twmei kaniw thay mak ge.

³⁰Meic 1000 ta gaanv khat na rui 10,000 ta gaanv nei na rui tabui sw tina ngam tu cho? RINGHPOUC kaniw Racguangc rui kaniw ta ganclou the; tancbauhmei kaniw Racguangc rui kaniw ta mpatlou the.

³¹Kaniw ta zauczihmei nunc tei kaniw tuang rav tei suan e, Isaraelmei Racguangc kumcna tanh mak ge twmei thay e.

³²Kaniw ta zauczihmei nunc tei Sodom lev Gomora kumc tanac the, nkhucmei khatni kakhay naimei thai nthaimei drakhaluai kumc the,

³³nrui khay khou rui kasiamhmei zouc kumc the.

³⁴“Kaniw ta zauczihmei nunc rui taanc kanmei tei RINGHPOUC ningtow bam e; kaniw ta dandi tii khang karyn tanghmei ta nkhwan bam e.

³⁵RINGHPOUC rui khwm khangc pwkhou; kaniw bowmei ganv guang puni; kaniw amaan nimei ganv ana the.

³⁶RINGHPOUC rui kamei nunc ta kanlou dat puni, kaniw tei pumtan maek khe twmei how pwkhou. Kasiamruai swmei nunc ta kamei rui suaihiamlou dat puni, kaniw tei ngangv bam maek khe twmei how pwkhou.

³⁷Hei khou tei RINGHPOUC rui kamei nunc khou kumna thanv puni, ‘nangniw rui lwm bammei tancbauhmei rav nunc tei tabui thangc tat kanna cho?

³⁸Nangniw tuang puatkat khouringh thav rui nangniw rui kaniw ta makuat the, nangniw rui kakhang drakhadui the. Ntaw kaniw guangna nangniw ta nkhavlou kan dam bu cho? kaniw rui nangniw ta guang nkhavlou pudamc bu cho?

³⁹“‘Ai, khatni ai na hei, Ravguangc e; baihmei rav thu kaling hamh e. Ai rui swluai e khatni tiringclou e, ai rui tizamhlou e khatni tigaylou dat re, ai rui taanhmei tei meic gaanv khat na rui sini thingc ngam mak ge.

⁴⁰Ai ringc bammei suai makmei Ravguangc, abaanc zaythauna latdyng sw e,

⁴¹atuang karangmei baengsaeng katingna latzan sw puni the. Ata zauczihmei nunc ta ai khwm khangc puni, kumna ata karaengmei nunc ta dandi tii puni.

⁴²Atuang pailu twan khou kaniw zei nzuk taph tap bam puni, khatni ata akhangvmei guay ta atuang baengsaeng rui swluai puni. Ata adowmei gaanv khat na ta sini ai nsaekclou dat lak khe; zamhmei khatni kang bammei guay sini theic puni the.’

⁴³“He zaatc nuncle, nangniw RINGHPOUC tuang mei nunc ta thuanc o. Kaniw ta swluaimei kaguayna ta tei kamei rui dandi tii e. Kamei rui kata zauczihmei nunc ruc khou khwm khangclou e khatni kamei nunc tuang paap kuaklou e.”

⁴⁴Isaraelmei nunc rui chu kan diu khang Mousi lev Nun nac mpouh Joshua rui mi lu hei salou the.

⁴⁵Mousi rui Ravguangc tuang latdyn tei meic nunc khou tei dinclou tang pwkhou,

⁴⁶kamei rui sa the, “Aseic ai rui nangniw khou tiiloumei latdanv guay hei nangniw piu nina e. Ravguangc rui nchamloumei hei nangniw nac nunc ni piu chuyna piu bam khang rui mi guay tei kaniw khou dinclou nina e.

⁴⁷Mi lat guay hei nsa karaeng lat hamh the; mi hei nangniw tuang panty rap di the. Mi guay hei piu e thei nangniw guang lungc pw nimei Jordan paengc kandic thangc tei nangniw panty lungsingna lungc puni.”

⁴⁸Mi tingmik kahak tei RINGHPOUC rui Mousi khou sa the,

⁴⁹“Jeriko kaidai paengc khou naimei Moab kandic tuang Abarim thangc tei tat tho; kumna Nebo Chyng khou tei kuna ai rui Isaraelmei nunc khang tii pw nimei Kanaan kandic tei phaengc zauc tho.

⁵⁰Nang chaic Aron rui Hor chyng khou theiclou kanmei kumcna nang ni mi chingc khou tei theiclou puni the.

⁵¹Kalam thu nangney gaanv neimei ai lwm nuh makmei taanv Isaraelmei nunc hu khou taanclou the. Nangney Zin tuang tazikramv khou Kades kaidai daeng khou Meriba dui daeng khou bammei douc tei, meic nunc hu khou nangney rui azaw tisilou the.

⁵²Nang mi kandic tei duh thangc rui phaengc how puni, tiki ai rui Isaraelmei nunc khang tii nimei kandic khou tei thu gut ni tuang hamh the.”