Read Rongmei Naga RIAKDANV KALUAIHMEI 33 Bible Online

RIAKDANV KALUAIHMEI 33 - Rongmei Naga bible

RIAKDANV KALUAIHMEI 33

¹Mi guay hei Ravguangc mei, Mousi rui kamei theic nimei hu khou Isaraelmei nunc khang suaihiamloumei tuang e.

²RINGHPOUC Sinai Chyng khou rui guang the; kamei neih kumcna Edommei ruc khou pat the kumna Paran Chyng khou kamei nunc ruc khou ganclou the. baanchara 10,000 kathei lay e, kabaanc zat thangc maibwang kazauhna.

³RINGHPOUC rui kamei nunc ta nzian e, kamei nunc ta gaeklou e. Kumna aniu kaphaypav bangc khou nkhum key e khatni kalatdanv guay piu e.

⁴Mousi rui tiimei latdanv guay tei aniu piu e, aniu zaat khang kungcliangmei lanv swmei tei.

⁵Isaraelmei kaikhwang guay khatni kapy guay guang kariu pwkhou RINGHPOUC rui guangh sw e.

⁶Reuben khwang lam khou Mousi rui kumna sa e: “Reuben kaikhwang tei meic raw bam sini lungc mut dat zat mak kan diu.”

⁷Juda khwang lam khou kumna sa e: “He RINGHPOUC, kaniw rui nkhavlou khang kauhmei tei nkinglou o; kaniw ta baihmei khwang guay tei lev tikariulou dat ro. He RINGHPOUC kaniw khang adowlou o, kaniw ta zauczihmei nunc khou rui kaniw ta nkhavlou o.”

⁸Levi khwang lam khou kamei rui kumna sa e: “He RINGHPOUC, Urim khatni Thummim khou rui nang chwn kaniw khou ndauhlou o nang tuang lat piu chuymei bangc Levimei nunc khou; nang rui kaniw ta Massa khou nchanv zauc the, kumna Meriba tuang dui bamv khou kaniw tei nchumhmei e twmei thay the.

⁹Kaniw rui kaniw puipu, chana punav khatni nah nunc ta nzianmei suangc nang ta nzian mbumei lyanlou the. kaniw nang tuang latdanv guay piu the, khatni nang tuang latdyng tei ngaek chuyna ngaek the.

¹⁰Kaniw rui nang nac nunc ta nang tuang Riakdanv piu khang nchamlou puni; kaniw rui nang tuang ravchapaeng khou khaengna bam puni.

¹¹He RINGHPOUC, kakai khwang hei tanc thau khang nkhavlou o; kaniw rui taanhmei ta pianlou o. kaniw ta zauczihmei guay ta swmaanlou o; tithaulou dat ri tho.”

¹²Benjamin kaikhwang lam khou kamei rui kumna sa e: “Mi hei RINGHPOUC rui nzianmei khatni gaek bammei khwang e; kamei rui kaniw ta neihmaryn gaeklou e, khatni kamei kaniw pang khou lungclou e.”

¹³Josep khwang lam khou kamei rui kumna sa e: “RINGHPOUC rui kaniw ramv khou tei suaihiam ting riulou pw diu khatni kandic bangc thangc rui dui tiku pw diu.

¹⁴Kaniw kandic khou tei neih rui ti-mincloumei tingthai tiilou diu, kakwm kaganv kathuic khou gay liangmei thai nthai geicna nthai diu,

¹⁵kaniw tuang chyngbut guay tei ndeihmei tingthai rui padik diu.

¹⁶Kaniw tuang kandic kapwm tei gaymei twmei guay rui padik diu, RINGHPOUC, chuangc bammei thingphwam khou rui kachucloumeipu tuang ramgai paan rui suaihiamlou diu. Mi suaihiam guay hei Josep khwang khou guanglou diu, kalam thu kamei hei kachana pang khou kapy khwan e.

¹⁷Josep khou guaituamchic pumtan nai the, nwmbangc guaituamchic tuang chei nai the. Kachei tei Manase tuang 1000 khatni Ephraim tuang 10,000 e. Hei tei rui kamei rui zaatc nunc ta khai the, kumna kaniw ta kandih tin nganv nun tangclou the.”

¹⁸Zebulun lev Isakar khwang lam khou kamei rui kumna sa e: “Zebulun tei duipui khou lanvguanhmei khou daicthau kan diu, khatni Isakar tuang lanv hei kakai khou mbu thau kan diu.

¹⁹Kamei rui gin nunc ta kaniw tuang chyng khou kaw guanglou e khatni khou tei nchumhna khaeng bam nuh khang tiilou e. kaniw tei kaniw lanv duipui khou rui khatni duipui tin sypung khou rui laa e.”

²⁰Gad khwang lam khou kamei rui kumna sa e: “Ravguangc ta thuanc o, kaniw tuang ramvrei tidaicloumeipu ta. Baanhpwam siat ganh khang, pygic siat ganh khang Gad tei kamangliangpui kumc nchwan bam e.

²¹Kandih gay liangmei ramv tei kaniw khang laa the; kapy swmei tuang dam kaniw khou tiilou the. Kaniw RINGHPOUC tuang latdyn khatni latdanv guay piu the. Isaraelmei tuang kapy guay guang kariupui ganv khou.”

²²Dan khwang lam khou kamei rui kumna sa e: “Dan hei kamangliangpui e, kamei hei Bashan khou rui kachakc pat the.”

²³Naphtali khwang lam khou kamei rui kumna sa e: “RINGHPOUC tuang gaymei zauzian paan rui Naphtali khou suaihiam geicna tiilou the. Kaniw ramv hei Galili Zeiclat khou rui dihba ramv tang e.”

²⁴Aser khwang lam khou kamei rui kumna sa e: “Baihmei khwang nunc suangc Aser khou suaihiam tiilou geicliang the. Kamei hei kachana nunc rui kahawmei sw diu o, kumna kakandic khou tei Olive thingbang thau padik diu o.

²⁵Katuang kaidai guay ntanh raengckat rui mbangh thingclou diu o kamei kaganv thuic tinggiu makna bam diu o.”

²⁶He Isaraelmei nuncle, rav baihmei akhat na sini nangniw Racguangc kumhmei maek ge, nangniw ta nkhavlou khang kamei tingpuk thangc rui guang e, katik kahym daicna muangh khou tuangcna guang e.

²⁷Ravguangc hei kaganvthuic nangniw ta gaekloumeipu sw guang the, katuang nganv makmei baancpwam rui nangniw ta kakalou the. Nangniw tat gut pwkhou kamei rui nangniw ta zauczihmei nunc ta alay ganclou puni, kumna kaniw ta swmutlou khang nangniw khou salou the.

²⁸Kumna Jakob tounac nunc nchu-nzaenghna lungc bam puni, nap-bi khatni drakhadui padikmei kandic khou tinggiupui tuang maekna lungc bam puni tingpuk tuang zikdui rui chaiclou bammei kandic khou.

²⁹He Isarael, nangniw adih dwan gay cho! Nangniw kumhmei meic baihmei maek ge, RINGHPOUC rui kanloumei zaat re. Nangniw ta gaeklou khang khatni rih tingamlou khang RINGHPOUC kamei kahak hei nangniw tuang nggih khatni baengsaeng e. Nangniw ta zauczihmei nunc tei zauc nzianlou khang guang ney puni, kumna nangniw kaniw ta niibin puni.