Read Rongmei Naga RIAKDANV KALUAIHMEI 34 Bible Online

RIAKDANV KALUAIHMEI 34 - Rongmei Naga bible

RIAKDANV KALUAIHMEI 34

¹Mousi tei Moab tuang nzaengc khou rui Nebo Chyng, Jeriko tuang neihpat biak thangc naimei Pisga Chyng twan khou ku the. Hei khou tei RINGHPOUC rui Kanaan kandic kapwm tei lyanlou the: Gilead kandic dihpy biak thangc Dan kaidai nganv;

²Naphtali tuang ramv kapwm; Ephraim khatni Manase tuang ramv; Juda tuang ramv neihkey biak thangc Mediterranean duipui nganv;

³Juda tuang dihpy ramv langv; Zoar khou rui Jeriko tadanv bang kaidai tanghmei nzaengc guay lyanlou the.

⁴Hei khou tei RINGHPOUC rui Mousi khou sa the, “Mi kandic hei ai rui Abraham, Isak, khatni Jakob khou kaniw kikta khang tii puni twna nrianhloumei kandic kiu the. Ai rui nang ta mi hei tihowlou the, tiki nang ta thu tiguang tangc lak khe.”

⁵Kumna RINGHPOUC rui kum puni twna saloumei kumcna Mousi, RINGHPOUC bangcpu tei Moab kandic khou theiclou kan the.

⁶RINGHPOUC rui kata Moab tuang nzaengc khou, Bethpeor kaidai paengc khou mbeihlou kan the, tiki aseic nganvna kata mbeihloumei bamv tei thay mak ge.

⁷Mousi kamei katingkwm 120 tangcna theic kan the; kamei kapumtan kachac mak ge khatni kamik how si zat mak ge.

⁸Isaraelmei nunc tei Moab nzaengc khou zaeng 30 huay the.

⁹Nun nac mpouh Joshua tei ningting rui padik the, kalam thu Mousi rui kata kaphaan lyn khang kadahlouna baanh sungclou the. Isaraelmei nunc tei Joshua lat piu the khatni kaniw khang Mousi khou rui tii guangmei latdanv guay kaniw ngaek the.

¹⁰Mousi kumhmei muhzwng akhat na sini Isarael khou lungc guang mak khwan e; RINGHPOUC rui kakhou thu zaw lev zaw puanc adyangna kachuclou khwan e.

¹¹Izipmei guangc, katuang meicdaihmei nunc, khatni mi kandic kapwm khou tei taanc lyanlou khou Ravguangc rui tiguangmei charynmei taanv khatni sw nchinmei taanv guay Mousi rui taanc kanmei tei muhzwng gaanv khat na rui sini taanc kan mak ge.

¹²Mousi rui Isaraelmei mikzaw khou taanc kanmei daic kanmei meicpingmei taanv guay tei muhzwng baihmei akhat na rui sini taanc kan mak ge.