Read Rongmei Naga RIAKDANV KALUAIHMEI 4 Bible Online

RIAKDANV KALUAIHMEI 4 - Rongmei Naga bible

RIAKDANV KALUAIHMEI 4

¹Mousi rui meic nunc khou sa the, “Ai rui nangniw khou dinclou bammei latdanv guay hei piu o, kum e thei nangniw ringcna RINGHPOUC nangniw pupouc Racguangc rui nangniw khang tiiloumei kandic khou tei lungc bam puni.

²Ai rui nangniw khou tii kanmei latdanv khou tei ramhkhat na sini haaplou nuh mak ge khatni ramhkhat na sini laa ganc nuh mak ge. Ai rui nangniw khang tii kanmei RINGHPOUC nangniw Racguangc tuang latdanv tei piu o.

³Peor Chyngbut khou RINGHPOUC rui taanc kanmei tei nangniw how kan the. Kamei rui Baal ta kalummei guay ta tei hei khou tei swluai kan the,

⁴tiki RINGHPOUC nangniw Racguangc khou lwmloumei guay thu aseic nganvna ringc bam e.

⁵“RINGHPOUC aRavguangc rui samei theilayna ai rui nangniw khou latdanv guay tei nchamlou kan the. Nangniw rihngam gutna lungc nimei kandic khou kiu hei tei piu o.

⁶Mi guay tei piu chuyna piu o, kumna nangniw hei adih ningtyng cho twmei mi hei rui zaatc baihmei nunc khou lyanlou puni. Mi latdanv guay hei kaniw chu pwkhou, ‘Mi zaatc daihmei zaat hei tabui ningting khatni kabah thaymei nai tu cho!’ twna kaniw rui sa puni.

⁷“Zaatc baihmei akhat na khou sini adih daihmei zaat bam kandiu, RINGHPOUC aniu Racguangc kumcna kaniw rui kage naimei ganv khou kaniw daeng khou heidi anana bammei rav maek ge. Nkhavlou khang aniu rui kawmei kathuic kamei rui daw lou e.

⁸Zaatc baihmei akhat na khou sini, adih daihmei zaat bam kandiu, ai rui aseic nangniw khou dincloumei latdanv kumc nzihmei latdanv kaniw khou maek ge.

⁹Nangniw mik rui how kanmei tei amuc mak khang khatni nangniw lung rui panty nganvna muc dat mak khang nangniw du rui lungh gutna piu o. Hei tei nangniw tounac nunc khou tithaylou o.

¹⁰‘Meic nunc tei kaniw ringc bam saanv alat piu khang khatni ata ping thay kan khang kaniw rui kaniw nac nunc khou nchamlou khang ai rui nang khou sa nimei lat tei kaniw ni chu kan khang meic nunc ta tei khuam kaduai o,’ twna RINGHPOUC rui samei theilayna nangniw Sinai Chyng khou RINGHPOUC aniu Racguangc hu khou ding bammei nunc lam tei nangniw nac nunc khatni nangniw tou nunc khou dinclou o.

¹¹“Muangh rui gumzingh zing bammei khatni maibwang tingpuk chuangc tangc bammei chyng phay khou tei nangniw akumhna guang ding kan tu cho twmei nangniw nac nunc khou dinclou o.

¹²Akumhna mai khou rui nangniw ta kachuc kan tu cho, khatni kalwn thu how mak tiki kakhwan thu chu twna akumhna nangniw khou dinclou kan tu cho twmei kaniw khou raclou o.

¹³Kamei lev nangniw kak khou latdyng sw kanmei tei ngaek khang nangniw tabui sw nina cho twmei kamei rui dinclou the — mi kiu thu kamei rui ntauhpaek kanei khou tei hyloumei latdanv ruh tei nangniw piu nina e.

¹⁴Nangniw rui gut lungc nimei ramc khou tei piuna lungc nimei riakdanv guay nangniw khou dinclou o twna RINGHPOUC rui khou tei akhou sa the.

¹⁵“Sinai Chyng khou RINGHPOUC rui nangniw ta mai khou rui kachuc khou tei, nangniw kalwn how kan mak ge. Kumhpui zaeng rui nangniw ramh thay nina e,

¹⁶nangniw tabui tabui ravmaengc hamh e thei nangniw maengc luihmei kasiamhna nangniw rana ti-mphuam mak khang ramh thay o,

¹⁷khouringh maengc, kauh samhmei nruay maengc,

¹⁸kandih khou tuihmei khouringc maengc, dui khou naimei khav-ga maengc kasiamh mak khang ramh thay o.

¹⁹Nangniw rui tingpuk khou howmei bw, neih, gaanchuangcna guay ta kalum nuh mak ge. RINGHPOUC nangniw Racguangc rui mi guay hei zaatc baihmei khang kaniw kalum khang tiilou kan the.

²⁰Tiki nangniw hei thu chuangc bammei maimangh kumhmei Izip kandic khou rui kanpatloumei nunc di the. Aseic nangniw katuang mei sw bammei kumcna nangniw ta kamei tiswlou khang kamei rui nangniw ta phungc patlou the.

²¹Nangniw zaeng rui RINGHPOUC nangniw Racguangc rui ata lunghpuamc the kumna nangniw khang tiiloumei kandih gaymei ramc khou tei ai Jordan duithuak kaanna gut nuh mak khe twna sa the.

²²Ai thu mi kandic khou hei theiclou puni the kumna mi duithuak hei kaan ngam ni tuang hamh the, tiki nangniw thu kaanpat lana kandih gaymei ramc khou tei lungc puni the.

²³RINGHPOUC nangniw Racguangc lev sw kanmei latdyng tei amuc mak khang sw o. Kalatdanv tei piuna ravmaengc akhat na sini kasiamh mak khang sw o,

²⁴kalam thu RINGHPOUC nangniw Racguangc hei chuangc bammei maibwang e; kamei thu mamavmei Racguangc de.

²⁵“Nangniw mi kandic khou tei tingsaengcna lungc guangmei tangv khatni nangniw tounac nunc lungc guangmei tangv nganvna tabui bui maengc pwni kalum khang kasiamhna paapc taanh riu. Mi hei RINGHPOUC mikzaw khou si kanmei tuang the, kumna mi hei rui kalung tipuamc puni.

²⁶Aseic hei ai rui tingpuk kandih ta nangniw ruc khou sakhi khang kaw the twmei thu, ai rui samei hei nangniw piu mak ge thei, nangniw mi kandic khou lungc bam ngam ni tuang hamh e. Nangniw rui gut lungc pw nimei Jordan paengc thangc hei nangniw lungcsaengc ngam ni tuang hamh e. Nangniw ta swmutsutlou puni.

²⁷RINGHPOUC rui nangniw ta zaatc pang khou zinphaklou puni, khoutei nangniw meic asaekcna ta meicsaek swna ganclou puni.

²⁸Khoutei nangniw maansei baanc rui kasiamhmei rav, thing tauh tuang rav, how thay mak, chu thay mak, namh thay makmei rav nunc ta nangniw kalum puni.

²⁹Khou kiu nangniw RINGHPOUC nangniw Racguangc ta phu puni, kumna nangniw lung kapwm khatni du kapwm rui kata phu tithei, nangniw kata phutow puni.

³⁰Nangniw ryanramei khou keylou pwkhou khatni mi guay hei nangniw khou guanglou pwkhou, katang thangc nangniw RINGHPOUC khou hanc guang dat puni kumna kalat piu dat puni.

³¹Kalam thu RINGHPOUC nangniw Racguangc hei zauzian thaymei Racguangc e. Kamei rui nangniw ta ganclou lak ge khatni swmaan lak ge, khatni kamei nangniw pupouc nunc lev sw kanmei latdyng tei kamei amuc lak ge.

³²“Tat kanmei ganv tei kathai o, nangniw ta puanclou makmei hu khou, Ravguangc rui kandih nam ruc khou maansei damclou rap khou tei rui thauna zauc zauc o. Kandih kapwm khou phu zauc o, mi kumhmei daihmei taanv tei kahu nungc ni taanclou kanmei tuang nai the cho? Mi kumhmei hei thowkumhmei rui chuloumei nai the cho?

³³Nangniw ta kumna rav rui maibwang khou rui kachucloumei chu lana ringc bammei thowkumhmei nai bu cho?

³⁴RINGHPOUC nangniw Racguangc rui Izip khou swloumei kumcna, thowkumhmei rav rui zaatc akhat ta zaatc akhat baanc khou rui asut patna kamei tiswloumei nai the cho? Nangniw hu kahak khou katuang pumtan baantan daihmei tei lyanlou kan the; kamei rui ravpyan rihpyan khatni suc-rih tiguang the, kamei rui charyn charynmei sw nchinmei taanv taanclou the, meicping meicpingmei tuang tipat the.

³⁵Kamei na hei Ravguangc e, rav baihmei maek ge twmei lyan khang, RINGHPOUC rui nangniw khou lyanloumei tuang the.

³⁶Kamei rui nangniw ta nchamlou khang kamei rui tingkauh thangc rui kakhwan nangniw ta tichulou the, kumna mi mbaanv kandic khou hei kamei rui nangniw ta katuang nthanmei mai tihowlou the, kumna kamei rui nangniw ta mi khou tei rui kachuclou the.

³⁷Kamei rui nangniw pupouc nunc ta nzianmei zaeng rui, kamei rui nangniw ta kadahlou the, kumna katuang ngamv daihmei paan rui kamei kahak rui nangniw ta Izip khou rui nduangh patlou the.

³⁸Aseic nangniw tuang kandic swna bammei kandic khou hei nangniw ta nduangh guanglouna nangniw khang tii khang rui, nangniw tat gut pwkhou, nangniw suangc daihmei khatni tancbauhmei zaat nunc ta kamei rui alay ganclou the.

³⁹Kumhpui zaeng rui RINGHPOUC hei tingpuk khou khatni kandih khou Ravguangc e twmei aseic hei ningtow o kumna mi hei amuc zat riu. Rav baihmei maek ge.

⁴⁰Ai rui aseic nangniw khou tiiloumei latdanv guay hei piu o, kum e thei nangniw khang khatni nangniw tounac nunc khang gay turana puni. Tingsaengzaeng nangniw tuang sw diu khang RINGHPOUC nangniw Racguangc rui nangniw khang tiiloumei kandic khou hei nangniw lungc bam puni.”

⁴¹Mi tangv tei Mousi rui Jordan duithuak paengc neihpat biak thangc kaidai kathumh kadah pat the.

⁴²Zauczihmei hamhna maanvna meic swluaimei nunc duploupui bamv khang e, maanvpui mei tei mi kumhmei kaidai akhat khou paklouna duak nuh e.

⁴³Reuben kaikhwangmei khang, tazikramv chyng nzaengc khou naimei Bezer kaidai, Gad kaikhwangmei khang Gilead ramv khou naimei Ramot kaidai, khatni Manase kaikhwangmei khang Bashan ramv khou naimei Golanv kaidai hei guay hei the.

⁴⁴Mousi rui Ravguangc tuang latdanv guay tei tiilouna Isaraelmei nunc ta nchamlou the.

⁴⁵Kaniw rui Izip kandic khou rui patmei ganv khou tei mi guay hei Mousi rui Isaraelmei nac guay khang dincloumei riakdanv the,

⁴⁶Jordan duithuak paengc khatni Bethpeor phaengc achowmei bamv khou Amormei guangc Heshbon kaidai sinmeipu Sihon tuang ramv khwan e. Mousi khatni Isaraelmei nunc rui kata zaw tisilou kan the.

⁴⁷Isaraelmei rui Bashanmei guangc Og tuang ramv khatni Jordan neihpat biak thangc bammei Amorimei guangc nei tuang ramv laa the.

⁴⁸Mi ramv hei Arnon duithuak tin khou naimei Aroer kaidai khou rui thauna Sirion chyng twmei thu Hermon Chyng nganv the.

⁴⁹Mi ramv tei Jordan neihpat ramv dihba tuang Theihmei duipui khou rui neihpat biak thangc Pisga Chyngphay nganv the.