Read Rongmei Naga RIAKDANV KALUAIHMEI 5 Bible Online

RIAKDANV KALUAIHMEI 5 - Rongmei Naga bible

RIAKDANV KALUAIHMEI 5

¹Mousi rui Isaraelmei guay ta tei kaw guang kaduaina kaniw khou sa the, “He Isaraelmei nuncle, ai rui aseic tii nimei latdanv guay hei nking o. Nangniw mi guay hei lungh gutna ncham o khatni piu o.

²Sinai Chyng khou RINGHPOUC aniu Racguangc rui aniu lev latdyng akhat sw kan the.

³Hei tei aniu pupouc nunc na swmei tuang hamh the; aseic ringcna bammei aniu guay lev twna sw the.

⁴Mi Sinai Chyng khou tei RINGHPOUC rui mai khou rui zaw lev zaw puanc adana salou khwan e.

⁵Nangniw mai ta tiping pw nimei zaeng rui khatni nangniw chyngbut khou tei ku nuh makmei zaeng rui ai hei RINGHPOUC lev nangniw kak khou dingna RINGHPOUC rui samei tei nangniw khou dinclou khang RINGHPOUC lev nangniw kak khou ai ding bam khwan e. “RINGHPOUC rui sa the,

⁶‘Ai hei, nangniw ta Izip khou rui bangh sw bammei khou rui thuak patloumeipu, nangniw tuang Racguangc RINGHPOUC tei e.

⁷“‘Ata hamhna rav baihmei ta kalum lak nina e.

⁸“‘Tingkauh khou pwni, kandih khou pwni, dui lungc khou pwni, kandih bangc khou pwni, tabui bui maengc sini, nangniw kalum khang ravmaengc kasiamh lak nina e.

⁹Ravmaengc akhat na hu khou sini nangniw nkhum key lak nina e, hamh e thei kalum lak nina e, kalam thu ai hei RINGHPOUC nangniw tuang Racguangc e; rav baihmei ta kalummei ta ai akhaengv ngam mak ge. Ata karaengpui mei ta thu ai rui kata ni, kakikta ta ni meickin kathumh padeih nganvna dandi tii puni.

¹⁰Tiki ata nzianpui mei khatni alat piupui mei ta thu meickin ching ching khou nganvna ai rui nzianlou puni.

¹¹“‘Azanc hei ramhzi mak khou sinsw lak nina e, kalam thu azanc ta ramhzi mak khou sinswpui mei ta tei RINGHPOUC nangniw tuang Racguangc ai rui dandi tii puni.

¹²“‘Sabbathneic hei ngaek nina e, RINGHPOUC nangniw tuang Racguangc rui latdanv tiimei kumcna mi hei nthanna ngaek nina e.

¹³Zaeng charuk tei nangniw tuang taanv taanc nina e,

¹⁴tiki chaneimei tingmik tei thu akhou katgutlou kanmei nthaekcmei tingmik ge. Mi nungc hei thu nangniw ni, nangniw nac nunc ni, nangniw tuang bangc nunc ni, nangniw tuang kiruai guay ni, nangniw kandic khou lungc bammei zaatc baihmei guay ni taanvtaanc lak nina e. Nangniw tuang ty-bangh guay ta ni zaeng ti-nthaekc nina e.

¹⁵Nangniw Izip khou bangh sw bam khwan e, kumna RINGHPOUC nangniw tuang Racguangc ai rui apumtan rui nangniw ta thuak patloumei tuang e twmei ningtow o. Hei zaeng rui Sabbathneic hei nangniw ngaek nina e twna ai rui latdanv tiimei tuang e.

¹⁶“‘RINGHPOUC nangniw tuang Racguangc ai rui latdanv tii kanmei tei kumcna, ‘nang pui nang pu ta chakhwang sw o. Kum e thei nangniw khang ramh guayna gay tu rana lungcriu puni khatni ai rui tiiloumei kandic khou hei nangniw panty lungsingna lungc puni.

¹⁷“‘Meicbiw meicdow riu.

¹⁸“‘Lungcmaanv lungcmow riu.

¹⁹“‘Kaihouc lauguat riu.

²⁰“‘Saraamcna meickai ta nkham riu.

²¹“‘Meickai now ta kahaw riu; meickai tuang kai, ramv dui, ty-bangh, kiruai, kuanniam, khatni baih baihmei guay ta ni kahaw riu.’

²²“Nangniw rui Sinai Chyngbut khou guang kaduai bam khou tei RINGHPOUC rui tiimei latdanv guay kiu mi hei the. Kamei rui khwan ranvna mai khatni muangh khou rui samei tei mi latdanv guay hei the; baihmei hamh e. Kamei rui mi guay tei ntauhpaek kanei khou hylouna akhang tii the.

²³“Chyngbut kapwm tei mai chuangcna bammei ganv khou tei khatni zinghmei khou rui khwan tei chu pwkhou nangniw tuang kapy nunc khatni kaikhwang guay tuang kapy nunc akhou guangna

²⁴sa the, ‘RINGHPOUC kamei rui mai khou rui sa pat khou tei katik kahym aniu khou lyanlou the! Ravguangc rui kachucloupui mei sini ringc bam nuh de twmei aseic hei aniu how the.

²⁵Tiki tabui sw khang aniu theiclou bam nina cho? Mi meic pingmei mai tei rui aniu ta swmutlou puni the. RINGHPOUC aniu Racguangc rui samei tei aniu chu dat re thei thu aniu suai makna theic puni the.

²⁶Ringhmei Racguangc rui mai khou rui sa patmei tei chu lana ringc bam nuhmei nai dina cho?

²⁷Mousile, tat dat lana RINGHPOUC aniu Racguangc rui samei guay tei nking tho, kumna guang datna kamei rui nang khou tabui salou bu cho twmei aniw khou dinclou o. Aniw nkingna piu ni.’

²⁸“RINGHPOUC rui hei tei chu pwkhou, kamei rui akhou sa the, ‘Mi mei nunc hei rui sa bammei tei ai chu the, kumna kaniw sa bammei tei nchumh the.

²⁹Kaniw heikumna ning tanh tan e thei adih gay ni cho! kaniw rui ata chakhwang swna lungc tanh tanna alatdanv guay hei piu bam e thei kaniw khang khatni kaniw kikta guay khang ramh guayna gay turana guang puni.

³⁰Kaniw tuang pheykai thangc hanc dat khang nang tatna kaniw khou sa titho.

³¹Tiki Mousi nang thu, khou hei adaeng khou bam nina e, kum e thei ai rui atuang latdanv khatni latdyn guay nang khou tiilou puni. Ai rui kaniw khang tiiloumei kandic khou lungc pwkhou piuna bam khang hei tei kaniw khou dinclou titho.’

³²“Isaraelmei nuncle, RINGHPOUC nangniw Racguangc rui tiimei latdanv guay tei piu nthuih khang sw lo. Katuang latdanv akhat na sini piu makmei tuang sw la riu.

³³Hei tei kaguayna piu nina e, kum e tw e thei nangniw khang ramh guayna gay turana puni khatni nangniw laa nimei kandic khou tei nangniw tingsaengcna lungc puni.