Read Rongmei Naga RIAKDANV KALUAIHMEI 6 Bible Online

RIAKDANV KALUAIHMEI 6 - Rongmei Naga bible

RIAKDANV KALUAIHMEI 6

¹“Mi latdanv guay hei RINGHPOUC nangniw Racguangc rui nangniw khou dinclou khang akhou tiiloumei tuang the. Nangniw gutna lungc nimei kandic khou tei mi guay hei piu diu khang the.

²Nangniw mi kandic khou tei panty lungsingna bam khang rui, nangniw ringc bam saanv, nangniw lev nangniw tounac nunc RINGHPOUC nangniw Racguangc ta chakhwang champouh sw o khatni katuang latdanv guay tei piu o.

³Isaraelmei nuncle, mi guay tei nkingna lungh gutna piu o! Kum e tw e thei nangniw khang ramh guayna gay turana puni, kumna nangniw zaatc daihmei akhat sw puni kumna RINGHPOUC, nangniw pupouc Ravguangc rui nrianhloumei theilayna guaihnoudui lev nkhuaihdui rui luanghmei ramc khou tei lungc bam puni.

⁴“Isaraelmei nuncle, mi hei ningtow o! RINGHPOUC — khatni RINGHPOUC na hei — aniu Racguangc e.

⁵RINGHPOUC nangniw Racguangc ta nangniw lung kapwm, nangniw bumaengc kapwm, khatni nangniw pumtan kapwm rui nzian nina e.

⁶Ai rui aseic nangniw khou latdanv tiiloumei hei nangniw lungc khou ry tiph tiplou o.

⁷Mi guay tei nangniw nac nunc khou nchamlou o, nangniw rui kai khou bam khou, ruan tatbam khou, zip bam khou khatni zip thau datpui ganv khou mi lam khou raclou o.

⁸Nangniw ningtow bam khang nangniw baancpwam khou ntalou o khatni nangniw sanpiang khou thaengclou o.

⁹Nangniw kai kaimun tiangc khou khatni kai raengcmun khou mi guay tei hylou o.

¹⁰“RINGHPOUC nangniw Racguangc rui nangniw pupouc Abraham, Isak, khatni Jakob khou nrianhloumei kumcna, nangniw rui kasiamhlou makmei daihmei khatni lungcgaymei kaidai mpeyna naimei kandic tei kamei rui nangniw khang tii pwkhou

¹¹Kai guay khou tei nangniw rui lou makmei puat rui padik puni the, khoutei nangniw rui chaulou makmei duikhunc nai geic puni the, khatni nangniw rui lingclou makmei drakha pikwan khatni Olive pikwan nai geic puni the. RINGHPOUC rui nangniw ta mi kandic khou kiu nduangh gutlouna nangniw rui tu nii zangv niimei guay nangniw khang nai pwkhou,

¹²nangniw bangh swna bammei, Izip kandic khou rui nangniw ta kanloumeipu RINGHPOUC ta nangniw amuc mak khang ramh thay o.

¹³RINGHPOUC nangniw Racguangc ta ping o, kata na siamruai swna kalum o, khatni kazanc khou na nangniw latdyng sw o.

¹⁴“Rav baihmei ta kalum nuh mak ge, nangniw daeng khou bam nkuay bammei zaatc baihmei akhat na tuang rav ta sini kalum nuh mak ge.

¹⁵Nangniw rav baihmei ta kalum ti thei, RINGHPOUC tuang lungpuam nangniw ruc khou mai kumcna guang puni kumna nangniw ta sw mutsutlou puni, kalam thu RINGHPOUC nangniw Racguangc, nangniw lev tat nchamc bammeipu hei rav baihmei ta kalummei ta khat sini akhaengvlou ngam mak ge.

¹⁶“Nangniw Massa khou sw kanmei kumcna, RINGHPOUC nangniw Racguangc ta nchanv riu.

¹⁷Kamei rui nangniw khang tii kanmei latdanv guay tei lungh gutna piu o.

¹⁸RINGHPOUC mikzuat khou gay e khatni nchumh e twmei guay tei taanc o, kum e thei nangniw khang ramh katana gay turana puni. RINGHPOUC rui nangniw pupouc khou nrianhloumei kandic gaymei ramc tei nangniw laa puni,

¹⁹khatni kamei rui nrianhloumei kumcna nangniw rui nangniw ta zauczihmei nunc ta alay ganc ngam puni.

²⁰“Tabui swna RINGHPOUC aniu Racguangc rui mi latdanv guay hei piu khang latdanv tii bam tu cho? twna thei thangc nangniw nac nunc rui thanv pwkhou,

²¹kaniw khou kumna salou o, ‘Aniw Izipmei bangc sw bam khwan e, kumna RINGHPOUC rui aniw ta kangamv daihmei paan rui kanpatlou the.

²²Izipmei nunc khou, Izipmei guangc khou khatni guangh tuang meicdaihmei nunc khou kamei rui charynmei taanv khatni meicpingmei tuang taanclou kanmei ta aniw mik kahak rui how the.

²³Kamei rui aniu pupouc nunc khou tii ni twna nrianhloumei theilayna Izip khou rui kanpatlouna aniu ta mi bamv khou phungc guanglou the.

²⁴Aseic hei aniu rui lungctow bammei kumc aniu zaat ta makavlouna tilungcgaylou bam khang RINGHPOUC aniu Racguangc rui kata pingna latdanv guay hei piuna bam khang tiilou the.

²⁵Ravguangc rui aniu khang tiimei latdanv guay tei piu ti thei kamei rui aniu ta pianlou puni.