Read Rongmei Naga RIAKDANV KALUAIHMEI 7 Bible Online

RIAKDANV KALUAIHMEI 7 - Rongmei Naga bible

RIAKDANV KALUAIHMEI 7

¹“‘Nangniw rui gut lungc pw nimei kandic khou tei RINGHPOUC nangniw Racguangc rui nangniw ta nduangh guanglou puni, kumna mi khou tei rui kamei rui zaatc mpeyna ta alay ganclou puni. Nangniw gut pwkhou, nangniw zaat suangc daihmei zaat khatni ngamv naimei zaatc chanei: Hittimei, Girgasmei, Amormei, Kanaanmei, Perizimei, Hivimei, khatni Jebusimei ta alay ganclou puni.

²RINGHPOUC nangniw Racguangc rui mi zaat nunc ti hei nangniw baanc khou tiilou pwkhou khatni nangniw rui kaniw ta ngam pwkhou, nangniw rui kaniw kaguayna ta swluai ngam nina e. Kaniw ta champanv khanv nuh mak ge khatni kaniw ta zauc nzianlou nuh mak ge.

³Kaniw tei lev nowkaw nahlaa kary nuh mak ge,

⁴kalam thu hei tei sw e thei kaniw rui nangniw nac nunc ta RINGHPOUC khou rui zaypatna rav baihmei ta tikalum puni. Hei tei sw e thei RINGHPOUC rui nangniw ta lunghpuamcna matat akhat na khou rui sw mutsutlou puni.

⁵Hei zaeng rui, kaniw tuang ravchabamv guay ta, diangcra tho, kaniw tuang kalum bammei ntauh guay tei swbak paruatlou tho, kaniw tuang ravpui Ashera maengc tei dowbau key tho, kumna kaniw tuang ravmaengc guay tei mai ntei ganc tho.

⁶Nangniw heikumna sw nina the kalam thu nangniw hei RINGHPOUC nangniw Racguangc tuang e. Kandih khou lungc bammei zaatc kapwmna pang khou rui kamei rui nangniw ta katuang nkunpui mei nunc sw khang kadahlou the.

⁷“‘Nangniw hei kandic nam ruc khou zaatc daic liangmei e twna RINGHPOUC rui nangniw ta nzian tuang hamh e, khatni kadah tuang hamh e, nangniw hei kandih nam ruc khou nthyam liangmei zaat de.

⁸Tiki RINGHPOUC rui nangniw ta nzian e khatni kamei rui nangniw pupouc khou swlou kanmei latdyng tei ngaek nii e. Hei zaeng rui katuang daihmei pumtan rui nangniw ta kanlouna nangniw Izipmei guangc bangc sw bammei khou rui tiduaklou the.

⁹RINGHPOUC nangniw Racguangc na hei Ravguangc e khatni kamei hei lwmlou nuhmeipu e twmei amuc riu. Kata nzianmei khatni kalatdanv piumei nunc ta meickin ching ching khou nganvna kalatryan tei ngaek puni khatni taek makna nzian bam puni,

¹⁰tiki kata karaengmei nunc ta dandi tii khang kamei rouh lak ge.

¹¹Hei zaeng rui, nangniw khou nchamloumei tei nangniw piu o; aseic hei ai rui nangniw khou tiiloumei latdanv guay tei lungh gutna piu o.

¹²“Nangniw rui mi latdanv guay hei chulouna mi guay tei piu chuyna piu ti thei, kamei rui nangniw pupouc nunc khou nrianhlou kanmei kumcna, RINGHPOUC nangniw Racguangc rui nangniw khou swlou kanmei latdyng tei ngaek bam puni khatni nangniw ta taek makna nzianlou bam puni.

¹³Nangniw lungckingc lungckiucna nangniw tunapuan geicna lungh khang kamei rui nangniw ta nzianlou puni khatni suaihiamlou puni; nap-bi, drakhadui, khatni Olive thauc nthuih diu khang kamei rui nangniw tuang laupuk khou suaihiamlou puni; kamei rui nangniw khang guaih bangh khatni lauziu kingckiucna lungc pat khang suaihiamlou puni. Nangniw khang tii ni twna nangniw pupouc nunc khou kamei rui nrianhloumei kandic khou kiu kamei rui mi guay hei nangniw khang tii puni.

¹⁴Kandih khou lungc bammei zaatc baihmei akhat na sini nangniw kumcna suaihiam geicna laatowmei zaat nai ni tuang hamh the. Nangniw khatni nangniw tuang kiruai akhat na sini katu kanapuan maekmei nai lak khe.

¹⁵RINGHPOUC rui nangniw ta ravpyan rihpyan guay khou rui gaeklou puni, khatni nangniw Izip kandic khou how kanmei meicpingmei ravpyan guay tei akhat na sini nangniw ruc khou tiguanglou lak ge, tiki kamei rui mi guay tei nangniw ta zauczihmei guay khou tipatlou puni.

¹⁶RINGHPOUC nangniw Racguangc rui nangniw baanc khou tiiloumei zaatc kathuic ta tei swmaan o, khat na sini zauc nzianlou riu. Kaniw tuang rav nunc ta ni kalum nuh mak ge, hei tei nangniw phaysuy nimei phacbamv sw puni.

¹⁷“Mi zaat nunc hei nangniw khang suangc meic geic e kumna nangniw rui kaniw ta alay ganc ngam ni tuang hamh e twna kakhanh riu.

¹⁸Kaniw ta ping riu; RINGHPOUC nangniw Racguangc rui Izipmei guangc khatni kamei nunc ruc khou taanclou kanmei tei ningtow o.

¹⁹Nangniw mik kahak rui how kanmei meicpingmei tuang ravpyan guay, charynmei khatni hahlahlamei taanv khatni RINGHPOUC nangniw Racguangc rui nangniw ta tiduakloumei daihmei ngamv khatni pumtan kaguay ta tei ningtow o. Kamei rui Izipmei nunc ta sw mutloumei tei kumcna, nangniw rui ping bammei nunc ti hei ni kamei rui sw mutlou puni.

²⁰Kamei rui laynaengv tanhmei ravpuat tiguang puni, ringcna bammei khatni nkamh tat bammei nunc ta nganv swluaiparylou puni.

²¹Kumna mi mei nunc ti hei ping riu. RINGHPOUC nangniw Racguangc hei nangniw lev bam e; kamei hei daihmei meicpingmei Racguangc e kumna kati hei ping nimei tuang e.

²²Nangniw tat gut pwkhou khith khitna kamei rui mi zaat nunc ti hei alay ganclou puni. Nangniw rui mi zaat nunc ti hei kadyng akhat na khou rui sw mutsutlou ngam ni tuang hamh e, kum e tw e thei nwmbangc khouringc geic thauna nangniw lungc ping puni de.

²³RINGHPOUC rui nangniw ta zauczihmei nunc ta nangniw baanc khou louna kaniw ta sw mutlou mak saanv kaniw ta tipinglou puni.

²⁴Kamei rui kaniw tuang guangc nunc ta nangniw baanc khou lou puni. Nangniw rui kaniw ta swluai puni, kumna kaniw ta amuc kan puni the. Meic gaanv khat na rui sini khaam dat ngam ni tuang hamh the, kaniw kaguayna ta nangniw rui sw mutlou puni.

²⁵Kaniw tuang ravmaengc guay tei mai ntei ganc o. Ravmaengc khou naimei daandi ta pwni kachaekc ta pwni kahaw riu, kumna mi guay tei nangniw laa riu. Nangniw hei tei laa e thei, nangniw theic puni, kalam thu RINGHPOUC rui ravmaengc kalummei ta karaeng e.

²⁶Mi ravmaengc akhat na ta sini nangniw kai khou phungc guang nuh mak ge, phungc guang e thei kaniw khou keylou nimei syang tei nangniw ruc khou ni keylou puni. Nangniw rui mi racmaengc nunc ta tei karaengna ganc pat nina e, kalam thu mi nunc tei RINGHPOUC tuang syang keyloumei nunc di the.