Read Rongmei Naga RIAKDANV KALUAIHMEI 8 Bible Online

RIAKDANV KALUAIHMEI 8 - Rongmei Naga bible

RIAKDANV KALUAIHMEI 8

¹“Nangniw ringc bam khang, lungckingckiucna bam khang, khatni RINGHPOUC rui tii ni twna nangniw pupouc nunc khou nrianhloumei kandic tei laa khang rui, ai rui aseic nangniw khang tiimei latdanv guay hei piu chuyna piu bam o.

²Nangniw lung thay khang khatni mi latdanv guay hei nangniw piu puni di ny twmei thay khang, nangniw ta nchanv khang ryanra sih sihmei azuh tiguangna RINGHPOUC nangniw Racguangc rui mi tatkanmei tingkwm 40 hei tazikramv tat kaanna chaengsaeng hei akumhna zaylou kan tu cho twmei ningtow o.

³Kamei rui nangniw ta tindaapclou the, kumna nangniw pupouc nunc khatni nangniw sini kahu nungc tutow zat makmei manna tei titulou the. Maansei hei ringh khang taektw khou na ngangvlou nina hamh e, tiki RINGHPOUC rui saloumei lat khou tei ngangvlou nina e twmei nangniw khou dinclou khang rui kamei rui mi hei kabah tithaylou tuang e.

⁴Mi tingkwm 40 khou nangniw tuang pheybaan kaek kan mak ge khatni nangniw tan tat puamc kan mak ge.

⁵Pu rui kanac nunc ta riapmei kumcna RINGHPOUC nangniw Racguangc rui nangniw ta sw ntwnloumei tuang e khatni riaploumei tuang e twmei ningtow o.

⁶Hei zaeng rui, RINGHPOUC kamei rui latdanv tiimei tei kumcna taanc o: katuang latzan latdanv theilayna lungc o kumna kata ping o.

⁷RINGHPOUC nangniw Racguangc rui kandih gaymei — duithuak, duipuakkai padikmei, khatni kandih bangc thangc duiriang pang khou rui nzaengc khou chyng khou duipuak seh semei kandic khou nangniw ta nduangh guang puni the.

⁸Mi kandic khou tei gehu, sipian drakhathai, tadutthai, puc-heithai, Olive khatni nkhuaihdui mphamhna pat re.

⁹Mi bamv khou tei nangniw ndaapc dat lak khe khatni ramh gaat dat lak khe. Mi kandic tuang ntauc guay khou tei ntanh nai e khatni mi kandic tuang chyngbut guay khou tei rui kuanri chaupat puni.

¹⁰Nangniw tu nii zangv niimei kaguayna tei mi khou tei nai puni the, kumna RINGHPOUC nangniw Racguangc ta kamei rui nangniw khang kandih gaymei tiiloumei khang rui nangniw thuancku nii puni the.

¹¹“RINGHPOUC nangniw Racguangc ta amuc mak khang kasiath thay o; ai rui aseic nangniw khou tiiloumei kalatdanv guay hei akhat na sini piu makna ganclou gay mak ge.

¹²Nangniw rui tu nii zangv niimei guay tei nai pwkhou khatni kaigay saamhgay swlou pwkhou,

¹³nangniw tuang guaih bangh khatni lauziu pang, nangniw tuang daandi kachaekc, khatni nangniw tuang lanv kaguayna geic thau pwkhou, nangniw daihlwn sw thauna

¹⁴nangniw bangh swna bammei Izip kandic khou rui nangniw ta kanpatloumeipu RINGHPOUC nangniw Racguangc ta amuc mak khang ramh thay o.

¹⁵Kakhay tanhmei nrui khatni ravga rui padikmei daic kanmei tazikramv khou tei nangniw ta kamei rui zaykaanlou the. Mi dui maekmei ramv khou tei kamei rui taudaic khou rui nangniw khang dui tipuakpatlou the.

¹⁶Nangniw pupouc nunc rui tutow zat makmei manna kamei rui nangniw khang tazikramv khou tei tiilou the. Nkhamh pwkhou suaihiam kamei rui nangniw khang tiilouna tiniamhkeylou khang rui nangniw ta nchanv khang ryanramei azuh tipatlou the.

¹⁷Kum e thei, nangniw rana pumtan khatni ngamv khou rui nangniw lungcgay thaumei tuang e twna nangniw ning riu.

¹⁸Nangniw lungcgay thau diu khang tiiloumei ngamv hei RINGHPOUC nangniw Racguangc rui e twmei ningtow o. Kamei rui nangniw pupouc nunc khou swlou kanmei latdyng tei kamei aseic nganvna ngaek bammei zaeng rui kamei rui mi hei taanclou tuang e.

¹⁹Nangniw rui RINGHPOUC nangniw Racguangc ta amuc e thei khatni rav baihmei ta kalumna siamruai sw e thei ai rui nangniw ta swmutlou puni twmei aseic latdyng keyloumei tuang e.

²⁰Nangniw RINGHPOUC lat piu mak ge tw e thei, nangniw tat gut pwkhou zaatc baihmei nunc ta sw mutlou nimei tei kumcna nangniw ta ni sw mutlou puni e.