Read Rongmei Naga RIAKDANV KALUAIHMEI 9 Bible Online

RIAKDANV KALUAIHMEI 9 - Rongmei Naga bible

RIAKDANV KALUAIHMEI 9

¹“Nking o, Isaraelmei nuncle! Aseic hei nangniw Jordan duithuak kaanpatna nangniw zaat khang suangc daihmei khatni tanhmei zaat nunc rui lungc bammei kandic tei nangniw laa puni the. Kaniw tuang kaidai guay tei daic e, kaniw tuang raengc guay tei tingpuk tung tangc e.

²Mi khou tei lungc bammei nunc tei saengc daic e khatni tanc e; kaniw tei liantuangh nunc e, khatni kaniw hu khou meic gaanv khat na sini ding chaek ngam mak ge twmei nangniw chu the.

³RINGHPOUC nangniw Racguangc rui chuangc bammei mai kumcna nangniw hu khou tatlou puni twmei ntaw thu nangniw mik rui how puni the. Kamei rui nrianhlou kanmei kumcna kaniw ta alay gancna katumcna kaniw ta sw mutsutlou khang, nangniw tat gut pwkhou kamei rui kaniw ta ngamlou puni the.

⁴“RINGHPOUC nangniw Racguangc rui kaniw ta nangniw khang nthau ganclou pwkhou, nangniw rui mi kandic tei laa biuc tina kandih tei laa khang nangniw ta phungc guangmei tuang e twna nangniw kakhanh riu. Kiuc hamh e, mi zaat nunc tei meicgay timakna nangniw khang RINGHPOUC rui mi zaat nunc ta tei alay ganclou nipui tuang e.

⁵Kaniw kandic tei RINGHPOUC rui nangniw khang tiimei hei nangniw hei meicgayna nchumhmei taanc bam tina tiimei tuang hamh e. Kaniw tei meicgay timakmei zaeng rui khatni kamei rui nangniw pupouc nunc, Abraham, Isak, khatni Jakob khou swlou kanmei latdyng ngaek khang kamei rui kaniw ta alay ganc nipui tuang e.

⁶Nangniw laa biuc tina RINGHPOUC rui mi ramv gaymei hei nangniw khang tii nina hamh e. Kiuc hamh e, nangniw hei kanu tanhpui mei nunc de.

⁷“RINGHPOUC nangniw Racguangc ta nangniw rui akumhna tazikramv khou kalung tipuamc kan tu cho twmei amuc riu. Nangniw Izip mpatlou nungc tei rui thauna mi khou hei guang tanghmei nganvna nangniw rui kalat liam kan the.

⁸Sinai Chyng khou nganvna nangniw rui RINGHPOUC lung tipuamc kan the, nangniw ta swluai mutlou biuc tilunghpuamc kan the.

⁹RINGHPOUC rui nangniw lev swmei latdyng tei hyloumei ntauhpaek nei tei laa khang ai chyngbut khou tei ku the. Ramhtu ramhzangv makna mi khou tei ai zaeng 40 zingbangc 40 bamlou the.

¹⁰Ravguangc tuang baanczung rui hyloumei ntauhpaek kanei RINGHPOUC rui akhang tii the. Nangniw chyngbut khou tei guang kariu bammei nungc tei kamei rui mai khou rui sa patmei latdanv guay tei mi khou tei nai the.

¹¹Ngguay, mi tingmik 40 zingbangc 40 tangv tei kamei rui latdyng tei hyloumei ntauhpaek kanei tei RINGHPOUC rui akhou tii the.

¹²“Hei tangv tei RINGHPOUC rui akhou sa the, ‘Chyngbut khou hei rui katumcna key dat tho, nang rui Izip khou rui nduangh patmei nunc tei paapc taanc bam the. Ai rui kaniw ta taanc o twna saloumei khou tei rui kaniw tat mbiangh kan the, kumna kaniw ravmaengc kasiamh kan the.’

¹³“RINGHPOUC rui akhou sa dat re, ‘Mi mei nunc hei adih kanu tanc cho twmei ai how the.

¹⁴Ata khaam dat ri tho. Kaniw ta meic gaanv khat na rui sini ningtow dat bam mak khang ai rui kaniw ta sw mutlou khang ai ning the. Mi tangv kiu nang ta kaniw suangc daihmei khatni tanhmei zaatc akhat tuang pupouc tiswlou puni.’

¹⁵“Kumna ai rui karih dat lana latdyng tei hyloumei ntauhpaek kanei tei puancna chyngbut khou tei rui key dat the. Chyngbut khou tei rui maibwang pat the.

¹⁶RINGHPOUC nangniw Racguangc rui nangniw khang tiiloumei latdanv tei nangniw piu mak khe, kumna guaituamchic launa maengc kasiamh lana nangniw kahu khou paapc taanc the twmei ai how the.

¹⁷Kumna khou tei nangniw hu khou ai rui ntauhpaek tei ndat keyna siauc paruat lou the.

¹⁸Mi tangv tei ai tu mak zangv makna kalaanv 40 zingbangc 40 RINGHPOUC hu khou azaw sow changrwnna bam khwan e. Nangniw rui RINGHPOUC hu khou paapc taancna kalung tipuamcloumei zaeng rui ai hei tei taanhmei tuang e.

¹⁹RINGHPOUC kareic patna lunghpuamc bammei ta tei ai ping the, kalam thu nangniw ta sw— mutlou biuhmei lungpuam kamei puamcna bam the; tiki ai rui samei RINGHPOUC rui chulou dat re.

²⁰RINGHPOUC rui Aron ta ni swluai biuc rapmei lungpuam puamc the, kumna ai khou tei Aron khang ni huayney the.

²¹Nangniw rui taancloumei paap tuang puat — guaituamchic launa maengc tei ai rui puancthauna mai khou phaiclou the. Hei tei ai rui swpuat paruatlou lana, kabuay sow patlouna, chyng thangc rui luangc keymei duithuak khou tei mi buay tei phaiclou kan the.

²²“Nangniw Tabera, Massa, khatni Kibrot Hattaava khou bam khou tei nangniw ni RINGHPOUC nangniw Racguangc lung tipuamclou the.

²³Kamei rui nangniw khang tii bammei kandic tei guangna laa tho twna Kades Barnea khou bam khou kamei rui nangniw ta latdanv tiina thouh khou tei, nangniw kalat liam the, nangniw kata lwm mak khe khatni kalat piu mak khe.

²⁴Ai nangniw ta thay rap khou tei rui thauna, nangniw RINGHPOUC lat liam rap guang the.

²⁵“Hei zaeng rui mi zingbangc 40 kalaanv 40 tei ai RINGHPOUC hu khou sow nkhum keyna bam khwan e, kalam thu kamei rui nangniw ta swmaan khang kalung ding kan the twmei ai thay the.

²⁶Khoutei ai kumna huayney the, ‘He Ngamparymei RINGHPOUC, nang tuang pumtan daihmei rui kaniw ta Izip khou rui kanduaklouna nduangh patmei, nang mei nunc ta sw mutlou rio.

²⁷Nang bangc Abraham, Isak, khatni Jakob ta ningtowlou o, kumna mi mei nunc nu ramtan, meic nunc ramsi, khatni kaniw paap ti hei chaklou rio.

²⁸Kum ti thei nang rui kaniw khang nrianhloumei kandic khou tei nang rui nang mei nunc ta nduangh guanglou ngam mak khe twna Izipmei nunc rui sa puni the. Nang rui kaniw ta karaeng lana kaniw ta swluai khang tazikramv khou nduangh pat tuang di the twna kaniw sa puni the.

²⁹Tabui tabui pwni, mi mei nunc hei nangmei nunc khang kadahloumei nang tuang pumtan baantan daihmei paan rui Izip khou rui nduangh patloumei nunc e.’