Read Rongmei Naga JAHON 1 Bible Online

JAHON 1 - Rongmei Naga bible

JAHON 1

¹Thaurey khou Latkaeng nai bam khwan e; Latkaeng tei Ravguangc khou nai bam khwan e; kumna Latkaeng tei Ravguangc khwan e.

²Thaurey khou rui Lat tei Ravguangc khou nai bam khwan e.

³Ramh katana kapaan rui pat khwan e; nai bammei katana hei kamei kazauh makna patmei khat sini maek ge.

⁴Kakhou ringhmei nai e;[1] mi ringhmei hei rui maansei ta tigaanclou the.

⁵Gaanhmei hei zinghmei khou gaanc bam e; kumna zinghmei rui mi ti hei zingc liam ngam mak ge.

⁶Ravguangc rui ndiu guangmeipu gaanv khat nai e; kazanc Jahon twna kaw e.

⁷Meic guay chuna lwm khang, mi gaanhmei lam khou hei dinclou khang kamei guang tuang e.

⁸Kamei thu gaanhmei kiu hamh e; gaanhmei lam khou hei dinclou khang kamei guang tuang e.

⁹Meic guay ta tigaancloumei gaanhmei ling kiu mbaanv khou guang khwan e.

¹⁰Lat tei mbaanv khou bam khwan e; tiki kapaan rui damcloumei mbaanv hei rui kata thay mak khe.

¹¹Kamei kakandic khou guang khwan e; tiki kamei nunc rui kata laalou mak khe.

¹²Tiki kata laaloumei guay, kakhou lwmloumei guay ta mu Ravguangc nac sw khang kamei rui ngamv tiilou the.

¹³Kaniw Ravguangc nac swmei hei zei rui, meic pumc rui khatni maansei rui kahawmei rui hamh e; Ravguangc rui de.

¹⁴Latkaeng tei meic pumc chaguanhna, zauzian khatni nchumhmei padikna aniu pang khou lungclou the. Aniu katik kagunc, kapu Nac Mpouh akhat namei tik gunc how the.

¹⁵Jahon rui kalam khou salou the. “‘Athei khou guangmeipu hei akhang suangc daic e, kalam thu ai puanh mak khou rui kamei nai bam khwan the,’ twna ai samei tei kamei hei the,” twna Jahon rui kauc the.

¹⁶Kakhou zauzian padikna naimei khou tei rui aniu khang zauzian ruc khou zauzian tiilou the.

¹⁷Riakdanv hei Mousi khou rui tii guang e; tiki zauzian lev nchumhmei hei Jisu Khrista khou rui guang e.

¹⁸Ravguangc ta howmei meic gaanv khat na sini maek he; tiki kapu pamv khou bammei akhat namei Nac Mpouh tei rui Ravguangc ta ndauhlou the.

¹⁹Jerusalem khou bammei Jihudimei kapy nunc rui ndiuloumei amuh nunc khatni Levimei nunc rui, “Nang thow cho?” twna Jahon khou thanv khwan e.

²⁰Kamei nkamh tuang maekna, “Ai thu Messia[2] hamh e,” twna ndaw sa the.

²¹“Kum e thei, nang thow cho? Elija cho?” twna kaniw rui thanv the. “Ai Elija hamh e,” twna Jahon rui daw the. Khoutei, “Nang muhzwng kiu cho?”[3] twna kaniw rui thanv the. “Kiuc hamh e,” twna kamei rui daw the.

²²“Kum e thei, nang thow cho? Aniw ta ndiuloumei nunc khou salou dat khang, nang thow cho twmei aniw khou dinclou o,” twna kaniw rui kakhou sa the.

²³“Ai hei, ‘Poubauhmei guang pw the, kakhang chaeng sw tho!’ twna tazikramv khou kauc bammei kiu the,” twna muhzwng Isaia rui saloumei ta pancna Jahon rui daw the.

²⁴Pharisimei nunc rui ndiu guangmei nunc[4] tei rui,

²⁵“Nang Messia ni hamh, Elija ni hamh, Muhzwng kiu ni hamh e thei, tabui swna nang duiluplou bam tu cho?” twna thanv the.

²⁶Jahon rui mundawna, “Ai rui thu dui rui duiluplou the; tiki nangniw thay makmeipu gaanv khat nangniw pang khou ding bam e.

²⁷Kamei athei khou guang e; tiki ai thu katuang phaythuapc riang rih khang na sini biuhpui mei hamh e.”

²⁸Mi nunc rui guangna lat thanvmei hei, Jahon rui duilup bampui bamv, Jordan tuang neihpat thangc naimei Bethani khou e.

²⁹Nthuanh thauna, Jisu kadaeng khou guangmei ta how lana, Jahon rui sa the, “Zauclo, Ravguangc Lauziu Nac, kandihmei paap laa gancloumeipu!

³⁰‘Akhang suangc daihmeipu athei khou guang e, ai puanh mak khou rui kamei nai bam khwan the,’ twna ai rui sameipu kiu kamei hei the.

³¹Ai kata thay mak khwan e, tiki ai guangna dui rui duiluploumei hei, kata Isaraelmei khou ndauh pat khang the.”

³²Jahon rui sa the, “Bumaengh akhouhna kumcna tingkauh thangc kakhou keylou kanmei ta ai how the.

³³Ai kata thay mak khwan e, tiki ‘Gaanv khat khou, Bumaengh kauh thangc rui keyna bamlou kanmei ta nang how puni. Bumaengh Nthanmei rui luplou nimeipu kiu mi pu tei the,’ twna, dui rui luplou khang ata ndiuloumeipu rui akhou sa the.

³⁴Hei tei ai how the, mi zaeng rui, kamei hei Ravguangc Nac Mpouh the twmei ai nangniw khou sa tu the.”

³⁵Nthuanh thauna Jahon kaziap gaanv nei lev mi khou tei ding bam dat khwan e.

³⁶Mi khou tei Jisu tat bammei ta how lana, “Zauclo, Ravguangc Lauziu Nac tei!” twna kamei rui sa the.

³⁷Kaziap nei tei hei tei chu lana, Jisu thei lay tat kan the.

³⁸Jisu thei ziangrih patna kaney kathei lay tat bammei ta how lana, “Nangney tabui tuang phu bam tu cho?” twna thanv the. “Rabbi, nang tabui khou bam tu cho?” twna kaney rui ni thanv the. (Rabbi twmei kabac thu, Dinhpouc twna e.)

³⁹“Guang o, how puni,” twna Jisu rui sa the. Kumna kaney lay guangna Jisu bammei bamv tei how the; kumna mi nungc tei kadaeng khou bamlou the. Hei tei tingzyn ganvdak padeih zaengc khwan the.

⁴⁰Kaney khou gaanv khat thu Simon Pitar kainac Andriu khwan e.

⁴¹Kamei kachaic Simon ta ariwpui lev, “Aney Messia (Khrista twna e) ta ariw the,” twna sa the.

⁴²Kumna kamei rui kachaic ta Jisu daeng khou nduangh guang the. Khoutei Jisu rui kata zaucna, “Nang hei Jahon nac mpouh Simon e, tiki nang ta Kepha (mi kabac thu Pitar twna e) twna kaw puni the,” twna sa the.

⁴³Nthuanh thauna, Jisu Galili thangc tat ni the twna ning the. Khoutei kamei Philip ta ariw lana, “Athei lay o,” twna kakhou sa the.

⁴⁴(Philip hei Andriu lev Pitar ramc Bethsaidamei e.)

⁴⁵Philip Nathanael ta ariw lana, “Riakdanv buk khou Mousi rui hyloumei khatni muhzwng nunc rui ni hyloumeipu ta kiuc aniw ariw the. Kamei hei Josep nac Nazarethmei Jisu hei the,” twna sa the.

⁴⁶Khoutei, “Nazareth khou rui ramh gaymei pat ngam puni di nah cho?” twna Nathanael rui sa the. Kum tina, “Guangna zauc o,” twna Philip rui sa the.

⁴⁷Kumna Nathanael kadaeng khou guangmei ta how lana, Jisu rui kalam khou mi kumcna sa the, “Zauclo, rouhsimei maekmei, Isaraelmei ling kiu!”

⁴⁸“Nang ata akumhna thayna cho?” twna Nathanael rui sa the. “Philip rui nang ta kaw mak khou, nang tadut bang bangc khou bam bam khou tei, ai nang ta how the,” twna Jisu rui kakhou daw the.

⁴⁹“Rabbi, nang hei Ravguangc Nac Mpouh the! Nang hei Isaraelmei guangc the!” twna Nathanael rui mundaw the.

⁵⁰Mundawna Jisu rui kakhou sa the, “Nang tadut bang bangc khou bam bam khou tei ai nang ta how the, twna sapui zaeng khou na rui nang lwm tu cho? Mi khang suangc daih daihmei ni nang how puni he.

⁵¹Ai rui nangniw khou kaling siakna sapui tuang e: tingpuk laanc patna Ravguangc baanchara Meic Nac Mpouh ruc khou key key ku ku bammei ta nang how puni.”