Read Rongmei Naga JAHON 11 Bible Online

JAHON 11 - Rongmei Naga bible

JAHON 11

¹Bethanimei kazanc Lazaras twna kawmeipu nnau bam khwan e. Bethani hei Meri khatni kaswanrey Martha ramc e.

²(Mi Meri hei Jisu phay khou mwndui thauc teylouna kasam rui thut phuiloumeipui tei e; nnau bammei Lazaras hei kapuningc e.)

³“Poubauhmei, nang nzianmeipu tei nnau bam e,” twna kakai swanrey nei rui Jisu khou tithay guang the.

⁴Hei tei chu pwkhou, Jisu rui sa the, “Mi nnau bammei hei theih khang hamh e; Ravguangc hym tidaih khang de, kumna mi paan hei rui Ravguangc Nac Mpouh hym ndaw khang e.”

⁵Jisu Martha kai swanrey nei khatni Lazaras ta nzian e.

⁶Tiki mi chamv tei chumei tangv kamei bammei bamv khou tei zaeng neih nei bam keylou dat di he.

⁷Mi tangv tei, “Aniu Judia thangc tat dat di kho,” twna Jisu rui kaziap nunc khou sa the.

⁸Khoutei, “Rabbi, ntaw Jihudimei nunc nang ta ntauh kwamluai khang phu bam khou, nang mi thangc tei tat dat khang raengc bam tu haih cho?” twna kaziap nunc rui daw the.

⁹Jisu rui sa the, “Kalaanv dak hei ganvdak ruhna kanei nai tu hamh nah cho? Kalaanv tatmei thu phay kalanv mak ge. Kalam thu mbaanv tuang gaanhmei riw rui kamei how de.

¹⁰Tiki kamei zingbangc tat re thei, kaphay kalanv e, kalam thu kakhang gaanhmei maek khe.”

¹¹Khoutei, “Aniu champanv Lazaras zip kan the, ai tatna kata nchyang thaulou dat puni,” twna Jisu rui sa the.

¹²“Poubauhmei, kamei zip kan e thei, gay dat kan ni the,” twna kaniw rui daw the.

¹³Jisu rui samei thu Lazaras theic the twmei tuang e; tiki kaniw rui thu kamei zip bam changh tina khuangh e twna ning the.

¹⁴Khoutei Jisu rui ndauh phauna sa the, “Lazaras theic the,

¹⁵tiki ai mi khou tei bam makmei hei nangniw khang rui ai neihla e. Kalam thu nangniw lwm khang the. Aniu kadaeng thangc tat di kho.”

¹⁶Naphinhmei kawmei Thomas rui, “Aniu ni kamei lev theiclou nchamc khang tat di kho,” twna kapammei ziap guay khou sa the.

¹⁷Jisu guang tangc pwkhou, Lazaras ta mbeihloumei zaeng padeih tangc the tw bam khwan the.

¹⁸Bethani hei Jerusalem khou rui mail kanei sini tangh mak ge.

¹⁹Kum tina Martha kaney Meri ta swmlou khang Judiamei meic mpeyna guang bam khwan e.

²⁰Martha tei Jisu guang e twmei chu lana, kata ariw khang pat the; tiki Meri thu kai khou bam kan de.

²¹Martha rui Jisu khou sa the, “Poubauhmei, nang bam tu khwan e thei, apuningc theic lak ni tuang e!

²²Tiki ntaw ni nang rui ney neymei Ravguangc rui tiilou puni de twmei ai thay e.”

²³“Nang puningc ringcthau dat puni de,” twna Jisu rui kakhou sa ti khou,

²⁴“nkhamhpui nungc, theihmei guay ringcthau dat pwkhou kiu, ringc dat puni twmei ai thay e,” twna Martha rui sa the.

²⁵Khoutei Jisu rui kakhou sa the, “ringcthau datmei khatni ringhmei kiu ai hei the. Akhou lwmpui mei tei, kamei theic sini ringc puni;

²⁶ringcna akhou lwmpui mei tei thu, theic dat zat lak khe. Nang mi hei lwm daih?”

²⁷“Ngguay, Poubauhmei! Nang hei mbaanv khou guang punimei, Ravguangc Nac Mpouh Khrista kiu the twmei ai lwm e,” twna kamei rui daw the.

²⁸Mi hei salou lana, Martha kaswanrey Meri ta kaw khang tat kan the, kumna, “Dinhpouc guang bam e, kumna kamei nang ta kaw bam e,” twna suaina salou the.

²⁹Meri hei tei chu pwkhou, dingthauna, kaluak kalat kadaeng thangc pat the.

³⁰(Jisu namv khou guang tangh mak he, Martha rui kata ariwmei bamv khou tei bam di he.)

³¹Meri chadi chadana tat pat kanmei tei how lana, swmlou khang guang bammei nunc tei ni kathei lay pat the. Kalam thu kamei tarou thangc kap tat ni lana khuangh e twna kaniw ning the.

³²Meri Jisu daeng khou guang tangcna kata how rappui lev, kamei kaphaypav daeng khou khuksun keyna, “Poubauhmei, nang bam khwan e thei apuningc theic lak ni tuang e!” twna sa the.

³³Meri kap bammei ta, khatni kadaeng khou bammei guay ni kap bammei ta how lana Jisu kalung mpeyna kabiu the.

³⁴“Kata tabui thangc mbeihlou kan tu cho?” twna Jisu rui thanv the. “Poubauhmei, guangna zauc tho,” twna kaniw rui sa the.

³⁵Jisu kap the.

³⁶“Zauclo, kamei Lazaras ta adih nzian cho!” twna meic nunc tei rui sa the.

³⁷Tiki meic gaanvsaekc rui thu, “Kamei mik tiatmei ta tiraklou ngam e thei, Lazaras ta titheih mak khang thu ngam mak khe nah cho?” twna sa the.

³⁸Jisu kalung mpeyna kabiuna tarou thangc tat the. Hei tei kamun khou ntauh rui daengc thingcloumei khowlang e.

³⁹“Ntauh hei laa ganc tho!” twna Jisu rui sa the. Theihmeipu tanpui Martha rui, “Poubauhmei, zaeng padeih tangc the. Namh si puni di the,” twna sa the.

⁴⁰“Nangniw lwm e thei, nangniw Ravguangc tuang hym how puni twna ai nangniw khou sa mak nah cho?” twna Jisu rui kakhou sa the.

⁴¹Kaniw rui roukhamtauc tei laanc pat the. Khoutei Jisu tingkauh thangc zauc thauna sa the, “He apu, nang rui alat chulou bammei khang rui nang ta thuancku e.

⁴²Nang rui alat chulou tanh tan bam de twmei ai thay e, tiki nang rui ata ndiu guangmei tuang e twmei mi khou bammei guay hei lwm khang, kaniw khang rui ai mi hei sa tuang e.”

⁴³Kamei mi hei salou lana kauc ranvna, “Lazaras, pat tho!” twna sa the.

⁴⁴Lazaras tei kaphay kabaanc pheynuaih rui kasiatclouna khatni kazaw pheyzai rui duamlouna pat the. Khoutei, “Kata riclouna titat ti tho,” twna Jisu rui sa the.

⁴⁵Meri daeng khou guang bammei nunc tei Jisu rui taancloumei tei how lana kaniw meic mpeyna Jisu khou lwmlou the.

⁴⁶Tiki kaniw gaanvsaekc thu Pharisimei nunc daeng thangc tatna, Jisu rui taancloumei tei kaniw khou poulou the.

⁴⁷Khoutei Pharisimei nunc khatni amuh daihmei nunc pei kawna sa the, “Aniu tabui tuang sw kho cho? mi pu hei rui sw-nchinpui taanv mpeyna swna bam the.

⁴⁸Aniu rui kata mi kumcna mpatlou bam ti thei, meic guayna kakhou lwm ngam kan pungh di the. Kumna Rommei guangna aniu tuang nthanmei bamv khatni aniu zaat ta swmaan ngam pungh di the!”

⁴⁹Kaniw pang khou gaan khat, mi kwm tei Tingkuh sw bammei, kazanc Kaiapha kawmeipu rui sa the, “Nangniw ramhkhat na sini thay mak khe!

⁵⁰Zaatc kapwm ta swmaanmei suangc, meic gaanv khat rui meic guay khang theicloumei rui nangniw khang gaeng e twmei nangniw thay mak nah cho?”

⁵¹Mi hei kamei kachwnphuakh khou rui sa tu hamh e; tiki mi kwm tei kamei tingkuh sw bammei thei layna, Jisu Jihudimei zaat khang theiclou puni twna dinc kasuakcloupui tuang e.

⁵²Kaniw khang na hamh e, zinphak tat kanmei Ravguangc nac nunc ta pumh akhat na khou khuam guang kariulou dat khang e.

⁵³Mi nungc tei rui thauna Jihudimei kapy nunc tei Jisu ta swluai khang kaphianh thau the.

⁵⁴Kum tina Jisu Judia khou, meic pang khou ndauhna tat dat mak khe, kumna tazikramv daeng thangc naimei Ephraim twna kawmei kaidai thangc tatna mi khou tei kaziap nunc lev bam kan the.

⁵⁵Kaanpatpui Ngai ana guang ti thena, nngay hu khou pumh sw nthanmei thouc sw khang namv namv thangc rui Jerusalem khou ngangh geic the.

⁵⁶Kum tina kaniw Jisu ta phu the, kumna kaniw Ravkai khou ding kaduaina, “Kamei nngay khou thu guang pw lak khe ni? Nangniw akumhna ning bo?” twna khat khat khou sa the.

⁵⁷Mi ganv khou tei, Jisu ta nym khang, kamei bammei bamv thay thaymei rui dinclou nina e, twna amuh daihmei nunc khatni Pharisimei nunc rui latdanv patlou bam khwan e.