Read Rongmei Naga JAHON 12 Bible Online

JAHON 12 - Rongmei Naga bible

JAHON 12

¹Kaanpatpui Ngai khang zaeng charuk nai khou, Jisu Bethani khou guangna kamei rui tiringcthauloumei Lazaras kai khou bam khwan e.

²Kaniw rui kakhang zingbangc naptw khang chamdaanvlou the. Martha rui siamruai sw bam khwan e, tiki Lazaras tei thu tuzangv khang Jisu lev dungc bammei pang khou lay kazauh bam khwan e.

³Meri rui kamanv kunghmei mwnduithauc liter kapaek doumei haan laana Jisu phay khou bunlouna kasam rui thutlou the. Mi namh gaymei thauc rym tei rui mi kainung kapwm tei padik the.

⁴Jisu ziap gaanv khat, kata zuanctu nimeipu Juda Iskariot rui sa the,

⁵“Mi hei daandi syanpaek[21] phay thumh khang zuanc lana lungcsimei nunc khang tii damc bu cho!”

⁶Kamei mi hei samei hei lungcsimei nunc khang kadanna sa tu hamh e, tiki kamei thu kaihouhmei e. Kamei meic geihmei tuang syankhau phungc lana, mi khou tei rui kakhang num laa raph rap bam lana e.

⁷Khoutei Jisu rui sa the, “Kata sw kaguakclou ti riu! Katuang naimei tei ata mbeihmei nungc khang lou kan dio.

⁸Lungcsimei nunc thu nangniw lev bam nchamc tanh tan bam puni de, tiki ai thu nangniw daeng khou bam tanh tan ni tu hamh e.”

⁹Jisu Bethani khou bam e twmei meic kangdai tei chu lana, kaniw mi thangc tei tat the. Jisu zaeng khou rui na hamhna, Jisu rui tiringcthauloumei Lazaras ta zauh khang ni e.

¹⁰Kum tina amuh daihmei nunc kaphianhna Lazaras ta ni swluai khang sw the.

¹¹Kalam thu kazaeng khou rui Jihudimei mpeyna kaniw lat laa makna, Jisu khou lwmlou the.

¹²Nthuanh thauna, nngay khang guang bammei meic kangdai tei Jisu Jerusalem khou guang pu the twmei chu the.

¹³Kaniw tadanv kuang puancna, “Hosanna! Poubauhmei zanc khou guangmeipu, Isaraelmei guangc ti hei suaihiamlou o,” twna kaucna kata ariw khang pat the.

¹⁴Jisu kuanniam launa akhat ariwna mi khou tei tuangc the. Mi hei,

¹⁵“Ping riu, he Zaion kaidai! Nang guangc guang the, kuanniam launa khou tuangcna guang the.” twna Nthanmei Latrik khou hylou bammei tei the.

¹⁶Kaziap nunc tei mi ganv khou tei thu mi kabac tei thay mak khwan e; tiki Jisu ta hymdaihmei khou tiringcthaulou dat pwkhou, Nthanmei Latrik rui sa bammei hei Jisu lam khou the twmei khatni kaniw mi hei Jisu khang swlou tuang the twmei ningtow the.

¹⁷Jisu rui Lazaras ta tarou khou rui kaw patna, tiringcthaulou datmei ganv khou bammei nunc rui mi lam khou tei meic nunc khou raclou the.

¹⁸Jisu rui mi sw-nchinmei taanv hei kakhou taanclou e twna chu lapui zaeng rui, meic kangdai tei Lazaras ta ariw khang guang tuang e.

¹⁹Khoutei Pharisimei nunc rui khat khat khou sa the, “Zauc tho nangniw rui sw bammei hei nsa di the! Kandih kapwm kathei lay kan the!”

²⁰Mi ngai khou hei kalum khang guangmei pang khou Grikmei gaanvsaekc kazauh khwan e.

²¹Galili ramv tuang Bethsaida kaidaimei Philip daeng khou kaniw guangna, “Haicpouc, aniw Jisu ta ariw nii e,” twna sa the.

²²Philip rui hei tei Andriu khou salou tina, kaney tatna Jisu khou salou the.

²³Jisu rui kaniw khou mundawna sa the, “Meic Nac Mpouh ta kahym tidaiclou nimei ganv guang the.

²⁴Ai rui nangniw khou kaling siakna sa tuang e: Gehu thw akhat tei kandih khou keyna theiclou mak ge thei, mi thu tei mbu pat mak ge, tiki hei tei theiclou e thei kathai mpeyna nthai the.

²⁵Thow pw ni karingcpaan ta nzavpui mei tei hei tei maan puni; thow pw ni mi mbaanv khou karingcpaan ta nzav makpui mei tei ringcsuangmei ringcpaan laa puni.

²⁶Thow pw ni asiamruai sw nii tw e thei kamei athei lay nina e, kumna ai bampui bamv khou tei asiamruai swpui mei tei ni bam puni. Asiamruai swpui mei ta tei aPu rui chakhwang swlou puni.

²⁷“Ntaw alung katuakc the—ai tabui lat sa kho cho? ‘Apu mi ganv hei akhou tiguanglou rio!’ twna sa kho cho? Hamh e; mi khang rui ai guang tu the.

²⁸Apu nang hym tidaiclou o!” Khoutei, “Ai rui hei tei tidaiclou kan the, tidaiclou dat puni he,” twna tingkauh thangc rui kauc key the.

²⁹Mi khou tei ding bammei meic kangdai tei hei tei chu the, kumna gaanvsaekc rui, “Ganh key tina e,” twna sa the, baihmei gaanv saekc rui, “Kauh baanchara rui kata kachuc tina de,” twna sa the.

³⁰Khoutei Jisu rui kaniw khou sa the, “Mi khwan hei akhang hamh e, nangniw khang de.

³¹Ntaw hei mi mbaanv ta latzan sw puni the; ntaw mi mbaanv tuang dihsinpouc ta alay pat puni the.

³²Ata kandih khou rui zay thau pwkhou, meic guayna ta ai rui akhou zay guang puni.”

³³(Mi hei kamei akumhmei ramthei theic puni cho twmei sa tuang e.)

³⁴Meic kangdai tei rui sa the, “Aniw tuang Riakdanv khou rui chumei thu, Khrista thu tingsaeng ringc bam puni twna sa e. Mi kum e thei, akumhna, ‘Meic Nac Mpouh ta zay thau puni,’ twna nang sa tu cho? Mi Meic Nac Mpouh kiu thow tei cho?”

³⁵Jisu rui mundawna sa the, “Nangniw pang khou gaanhmei hei bam kanak puni he. Gaanc bammei dak khou tat la tho, hamh e thei zingc namv lamc e. Kalam thu zingh khou tatpui mei tei thu kamei tabui thangc tat bam tu cho twmei thay mak ge.

³⁶Nangniw gaanhmei nac nunc sw khang, gaanhmei hei nai bam khou, nangniw mi khou hei lwmlou la tho.” Jisu mi hei salou tang lana tat pat kan the, kumna kaniw khou rui nkamh kan the.

³⁷Kamei rui mi sw-nchinmei taanv guay hei kaniw hu khou taanclou tisini, kaniw kakhou lwmlou mak ge.

³⁸Mi hei, “Poubauhmei, thow rui aniw tuang lat ta lwm thena cho? Thow khou Poubauhmei rui kapumtan lyanlou kan thena cho?” twna muhzwng Isaia rui hyloumei tei guang tangh khang e.

³⁹Mi kumna kaniw lwmlou ngam mak khe, kalam thu Isaia rui mi kumcna salou e:

⁴⁰“Kaniw mik how mak khang, khatni kaniw lungning ning pat thay mak khang, kumna ai rui kaniw ta tigaylou khang akhou guang mak khang, Ravguangc rui kaniw mik swtiatlou kan the, khatni kaniw lungning ti-ndylou kan the.”

⁴¹Isaia rui mi hei kamei Jisu tuang tikgunc how lana, kalam khou sa tuang e.

⁴²Kum bam sini, Jihudimei kapy nunc ni meic mpeyna Jisu khou lwmlou de; tiki kaniw ta sinagog khou rui alay ganc pw khang Pharisimei nunc ta ping lapui zaeng rui, kaniw lwm the twmei thu sa pat mak khe.

⁴³Kaniw Ravguangc rui thuancloumei ta suangc, maansei rui thuancloumei ta kahaw the.

⁴⁴Jisu rui kaucna sa the, “Akhou lwmpui mei tei akhou na lwm tu hamh e, ata ndiu guangmeipu khou ni lwm tuang e.

⁴⁵Ata howpui mei tei ata ndiu guangmeipu ta how the.

⁴⁶Akhou lwmloumei guay tei zinghmei khou bam dat mak khe. Ai mbaanv khou gaanhmei swna guang e.

⁴⁷Alat hei chu laki piu makpui mei ta tei, ai latzan sw lak ge. Ai mbaanv ta latzan sw khang guang tu hamh e; mbaanv ta kanlou khang de.

⁴⁸Ata laalou makpui mei khatni alat ta laalou makpui mei ta tei, nkhamhpui nungc ai rui sa pat kanmei lat guay tei rui latzan sw puni.

⁴⁹Kalam thu, ai arana achwnphuakh khou rui sa tu hamh e; ata ndiu guangmei aPu rui sa o twmei tei ai sa tuang de.

⁵⁰Katuang latdanv rui ringcsuangmei phungc guang e twmei ai thay e. Hei zaeng rui, ai rui samei hei Pu rui sa o twna samei lat re.”