Read Rongmei Naga JAHON 13 Bible Online

JAHON 13 - Rongmei Naga bible

JAHON 13

¹Mi hei Kaanpatpui Ngai nngay guang nungc khwan e. Kamei mbaanv hei mpatlouna kaPu daeng thangc tat dat nimei ganv ana the twmei kamei thay the. Mi mbaanv khou bammei kamei nunc ta kamei nzian e; katwan nganvna nzian e.

²Khoutei Jisu kaziap nunc lev zingbangc taektw tu khang bam khwan e. Ravsic rui Simon Iskariot nac Juda lungc khou Jisu ta zuanctu niimei lungning tiilou the.[22]

³Kapu rui ramh guayna kabaanc khou tiilou the, khatni kamei Ravguangc khou rui guang tuang e kumna kakhou tat dat puni the twmei thay the.

⁴Khoutei Jisu dingthau the, kumna katuang pheychuanh luak keylouna, pheyzai kasian khou malangvlou the.

⁵Kumna keikhuang khou dui bunlouna kaziap nunc phay khiulou thau the. Kumna kasian khou malangvlou bammei pheyzai tei rui thut phuilou the.

⁶Kamei Simon Pitar daeng khou guang ti khou, “Poubauhmei, nang rui aphay khiulou ni nah cho?” twna kamei rui sa the.

⁷“Ai sw bammei hei nang ntaw kabah thay mak ge, tiki thei thangc thay puni,” twna Jisu rui sa daw the.

⁸“Nang rui tabui nungc na sini aphay khiulou nina hamh e,” twna Pitar rui sa the. “Ai rui nang phay khiulou mak ge thei, akhou nang dam maek ge,” twna Jisu rui daw the.

⁹Simon Pitar rui, “Poubauhmei, kum e thei, aphay na hamh e, abaanc ni khiulou o, apy ni lowlou o,” twna sa the.

¹⁰Jisu rui sa the, “Duilow tang kanpui mei tei thu, kaphay na hamhna baihmei guay tei thu[23] khiu dat khang kage maek khe; kapumc kapwm tei nthan the. Nangniw nthan the, tiki meic guayna thu hamh e.”

¹¹Kata zuanctu nimeipu ta thay lana, “Meic guayna thu hamh e,” twna sa tuang e.

¹²Jisu kaniw phay khiulou tang lana, katuang pheychuanh nu dat the, kumna kabamv khou guang dungc dat the. Khoutei, “Ai rui nangniw khou swlou kanmei kabac hei nangniw thay daih?” twna kaniw khou thanv the.

¹³“Nangniw rui ata Dinhpouc khatni Poubauhmei twna kaw e; nangniw samei tei nchumh the, ai kiu the.

¹⁴Nangniw tuang Kaipouc khatni Dinhpouc ai rui nangniw phay khiuloumei kumcna, nangniw khat khat phay khiulou nina e.

¹⁵Ai rui nangniw khou taancloumei kumcna taanh khang ai rui nangniw khou taanc lyanlou tuang e.

¹⁶Ai rui nangniw khou kaling siakna sa tuang e. Bangh gaanv khat na sini kakaipouc suangc daih mak ge, khatni latdiutatmeipu gaanv khat na sini kata ndiuloumeipu suangc daih mak ge.

¹⁷Ntaw nangniw mi kabac hei thayna taanc e thei, nangniw sangaymei nunc e.

¹⁸“Ai nangniw guayna ta sa tu hamh e; ai rui kadahlou kanmei nunc ta ai thay de. ‘Atuang ntyan tumeipu rui ata sw khang sw the,’ twna Nthanmei Latrik khou hyloumei tei guang tangc puni.

¹⁹Mi hei pat mak khou ai rui nangniw khou sa kasuakcloumei lam kiu thu, mi hei patpui nungc kiu, ‘Ai hei Ai’ kiu the twmei nangniw lwm khang e.

²⁰Ai rui nangniw khou kaling siakna sa tuang e: Ai rui ndiuloupui mei ta laaloupui mei tei ata ni laalou tu e; khatni ata laaloupui mei tei ata ndiu guangmeipu ta laalou tu e.”

²¹Jisu rui mi hei salou lana, kalung ryanrana sa the, “Ai rui nangniw khou kaling siakna sa tuang e: Nangniw gaanv khat rui ata zuanctu puni the.”

²²Kamei thow ta sa bam tu cho twmei thay lamc makna ziap nunc tei khat khat ta zauc the.

²³Kaziap gaanv khat, Jisu rui nzianmeipu tei, Jisu daeng tuancna dungc bam khwan e.

²⁴Khoutei, “Kamei thow ta sa bam tu cho thanv o,” twna Simon Pitar rui kakhou mikkhwan swna sa the.

²⁵Kum tina mi pu tei Jisu daeng beic guang tuancna, “Poubauhmei, mi kiu thow cho?” twna thanv the.

²⁶“Ai rui ntyan kiak ntinna tii nimeipu kamei tei the,” twna Jisu rui sa the. Kumna ntyan kiak akhat laana hei tei ntinna Simon Iskariot nac Juda khang tii the.

²⁷Kamei mi tyan tei laa rappui lev Seitaan kalung khou gut the. “Nang sw nimei tei katumcna sw tho!” twna Jisu rui kakhou sa the.

²⁸Jisu rui mi hei Juda khou samei hei tabui tuang sa bam tu cho twmei mi khou tei dungc nchamc bammei nunc tei thu thay mak khwan e.

²⁹Juda tei kaniw tuang syan sinmeipu tipui zaeng rui, mi ngai khang tei ramh liu tat ro twna ny, hamh e thei lungcsimei nunc khang nzanh tat ro twna ny twna kaniw gaanvsaekc thu kakhanh khwan e.

³⁰Ntyan kiak tei haamvlou rappui lev Juda tei kaizaeng pat kan the. Hei tei zingbangc khwan e.

³¹Juda tat pat kanmei tangv, Jisu rui sa the, “Ntaw thu Meic Nac Mpouh tuang tik-hym tidaiclou the; kakhou rui Ravguangc tuang tik-hym tidaiclou the.

³²Kakhou rui Ravguangc tik-hym tidaiclou e thei, Ravguangc rui ni Meic Nac Mpouh tik-hym kakhou rui tidaiclou puni, kumna kamei rui hei tei dyng mak khou swlou puni.

³³Alaucthiu, ai nangniw lev asaanh bam ni tu hamh the. Nangniw ata phu puni; tiki ai rui Jihudimei kapy nunc khou sa kanmei tei kumcna, ntaw ai rui nangniw khou samei tuang e: Ai tat nimei bamv thangc tei nangniw guang ngam ni tu hamh e.

³⁴Latdanv kathanc ai rui nangniw khang tii e, mi kiu thu: Nangniw khat khat ta nzian o. Ai rui nangniw ta nzianmei hei kumcna, nangniw khat khat ta nzian nina e.

³⁵Nangniw khat khat ta nzian ti thei, nangniw hei aziap nunc e twmei meic guayna rui thay puni.”

³⁶“Poubauhmei, nang tabui thangc tat nina cho?” twna Simon Pitar rui sa the. “Ai tat nimei bamv thangc tei nang ntaw thu lay tat ngam ni tu hamh e; tiki thei thangc nang ni athei lay guang puni,” twna Jisu rui daw the.

³⁷“Poubauhmei, tabui swna ai ntaw nang thei lay tat ngam lak nina cho? Ai nang khang theiclou puni!” twna Pitar rui mundaw the.

³⁸Jisu rui kakhou sa the, “Nang akhang theiclou changc puni thah? Ai rui nang khou kaling siakna sa tuang e: Nang hei amei hamh e twna nang rui sa liang kathumh mak saanv aseic nruay khuangc ni tu hamh e.”