Read Rongmei Naga JAHON 15 Bible Online

JAHON 15 - Rongmei Naga bible

JAHON 15

¹“Ai hei drakha luai ling e, kumna aPu hei drakha lau taanhmeipu e.

²Kamei rui kathai nthai makmei atuang chy guay ta tei laa ganc e, kumna kathai nthaimei chy guay ta tei nthai geih khang raplou e.

³Ai rui nangniw khou saloumei lat tei rui nangniw ta sw nthanlou the.

⁴Nangniw akhou bam o, kumna ai ni nangniw khou bam puni. Drakha chy tei kaluai khou bam mak ge thei, karana kathai nthai ngam makmei tei kumcna, nangniw ni akhou bam mak ge thei, kathai nthai ngam mak ge.

⁵“Ai hei drakha luai e, nangniw hei kachy e. Akhou bammei khatni ai kakhou bammei kamei tei kathai nthai geic puni. Kalam thu ai kazauh makna nangniw ramhkhat sini sw ngam mak ge.

⁶Akhou bam makpui mei ta tei, drakha chy ganh kumc ganc e, kumna kangc kan e. Mi kumhmei chy guay tei khuam kaduaina mai khou phaiclouna ntei ganc e.

⁷Nangniw akhou bam e thei khatni alat nangniw khou bam e thei, nangniw ney nii niimei ney o, nangniw khang taanclou puni.

⁸Nangniw kathai nthai geihmei rui aPu hym tidaic e khatni nangniw aziap nunc e twmei lyan e.

⁹Apu rui ata nzianmei kumcna ai ni nangniw ta nzian e; ai nzianmei lungc khou nangniw bam tanh tan o.

¹⁰Ai aPu latdanv guay piuna kamei rui nzianmei lungc khou bammei kumcna, nangniw ni alatdanv guay piu e thei, nangniw ai nzianmei lungc khou bam puni.

¹¹“Akhou naimei ramneila hei nangniw khou nai khang, kumna nangniw ramneila padik khang, ai rui nangniw khou mi guay hei sa tuang e.

¹²Ai rui nangniw ta nzianmei kumcna, nangniw khat khat ta nzian o, twmei hei atuang latdanv e.

¹³Meic gaanv khat rui kapammei nunc khang theicloumei suangc daihmei ramzian maek ge.

¹⁴Ai rui nangniw ta mi kumcna sw o twna samei hei nangniw piu e thei, nangniw hei apam e.

¹⁵Ai rui nangniw ta bangh kaw dat mak khe, kalam thu bangh thu kakaipouc rui taanc bammei tei thay mak ge. Tiki ai rui nangniw ta apam kaw the, kalam thu ai rui aPu khou rui chumei guay tei nangniw khou dinclou the.

¹⁶Nangniw rui ata kapah tu hamh e; nangniw tatna kathai, tingsaeng nai bam nimei thai nthai khang, ai rui nangniw ta kapahlouna langlou tuang e. Kum pwkhou nangniw rui aPu khou azanc khou neymei guay kamei rui tiilou puni.

¹⁷‘Nangniw khat khat ta nzian o,’ twmei hei alatdanv the.

¹⁸“Mbaanv rui nangniw ta karaeng pw e thei, nangniw ta karaeng mak khou kaniw ata karaeng rey the twmei thay o.

¹⁹Nangniw mi mbaanv tuang ti thei, mbaanv rui katuang ta thu nzian kan ni tuang e. Tiki nangniw ta thu ai rui mi mbaanv khou rui kapah patlou tuang di the. Kumna nangniw mbaanv tuang hamh the. Hei zaeng rui mbaanv rui nangniw ta karaeng bam tuang e.

²⁰‘Bangh thu kakaipouc suangc daih mak ge,’ twna ai rui nangniw khou sa kanmei tei ningtow o. Kaniw rui ata sw kasic khang sw kan the, hei tei kumcna nangniw ta ni sw puni the. Kaniw alat piu khwan e thei, nangniw lat ni piu ni tuang e.

²¹Kaniw rui mi guay hei azaeng rui nangniw ruc khou swlou puni, kalam thu ata ndiu guangmeipu ta kaniw thay lam makna e.

²²Ai guangna kaniw khou salou mak khwan e thei, kaniw paap nai lak ni tuang e; tiki ntaw thu kaniw paap khou rui duak dat nuhmei chaeng maek khe.

²³Ata karaengmei tei aPu ta ni karaeng tuang the.

²⁴Meic gaanv khat na rui sini taanc kan makmei taanv ai rui kaniw hu khou taanclou kanmei tei, taanclou mak khwan e thei, kaniw khuay nai lak ni tuang e; tiki kaniw hei tei how lana ata ni aPu ta ni karaeng the.

²⁵Mi hei, ‘Kalam maekna kaniw ata karaeng the,’ twna kaniw tuang Riakdanv khou hyloumei tei guang tangh khang rui the.

²⁶“APu khou rui ai rui nangniw khou ndiu guang nimei Nkhavloumeipu—aPu khou rui guangmei nchumhmei Bumaengc kiu guang pwkhou, kamei rui alam khou sa puni.

²⁷Nangniw ni alam khou sa puni, kalam thu ai taanv thau rap khou rui nangniw hei adaeng khou bam guangmei nunc e.”