Read Rongmei Naga JAHON 18 Bible Online

JAHON 18 - Rongmei Naga bible

JAHON 18

¹Jisu mi hei kumcna huayneyna salou tang lana, kaziap nunc ta nduanghna Kidron duibaek kaan pat kan the. Mi khou tei pikwan akhat nai khwan e, kumna kaniw mi khou tei gut kan the.

²Jisu ta zuanctu nimei Juda mi bamv tei thay khwan e; kalam thu Jisu khatni kaziap nunc katupc sihna mi bamv khou tei guang kariu bam khwan e.

³Amuh daihmei nunc khatni Pharisimei nunc rui ndiuloumei ravkai rigaanv nunc khatni Rommei ricmei nunc ta nduanghna mi pikwan khou tei guang the. Kaniw tei buy baeng, thauhmai khatni mairam sin khwan e.

⁴Kaniw khou patlou nimei guay tei thay lana kamei tat patna, “Nangniw thow ta phu bam tu cho?” twna thanv the.

⁵“Nazarethmei Jisu ta e,” twna kaniw rui daw the. Khoutei, “Ai the,” twna Jisu rui daw the. Jisu ta zuanctumei Juda tei mi pang khou tei ding bam khwan e.

⁶“Ai the,” twna Jisu rui sa ti khou, kaniw thei tangsyn patna kandih khou pun key the.

⁷“Nangniw phu bammei kiu thow ta cho?” twna Jisu rui kaniw khou thanv dat di he. “Nazarethmei Jisu ta e.” twna kaniw rui sa the.

⁸“‘Ai the,’ twna ai sa kan dyng the cho. Nangniw ata phu bam tuang e thei, mi baihmei guay hei thu tat kan di tho,” twna Jisu rui sa the.

⁹Mi hei, “APu, nang rui akhou tiiloumei gaanv khat na ta sini ai swmaan mak ge,” twna kamei rui sa kanmei tei guang tangh khang e.

¹⁰Simon Pitar baeng phungc bam lana, kabaeng sat patna Tingkuh bangc ta dow the, kumna katuang baanzat nu siap tap the. Mi bangcpu zanc kiu Malkhos twna kaw e.

¹¹Khoutei Jisu rui Pitar khou sa the, “Nang tuang baeng tei kathuap khou lou dat kan o! Apu rui akhang tiimei buangc hei ai zangv nina hamh nah cho?”

¹²Kaniw tuang rihpy rui nduanghmei Rommei ricmei nunc khatni Jihudimei ricmei nunc rui Jisu ta nymna karakna,

¹³Anna daeng khou zay guang rey the. Kamei hei, mi ganv khou tei Tingkuh sw bammei Kaiapha now pu e.

¹⁴Mi Kaiapha hei, “Meic geihna khang gaanv khat rui theicloumei gay e,” twna Jihudimei kapy nunc khou sa kanmeipu tei e.

¹⁵Simon Pitar lev baihmei ziap gaanv khat Jisu thei lay tat khwan e. Baihmei ziap gaanv khat tei Tingkuh rui zawthaymeipu khwan e. Kum lana kamei Jisu thei layna Tingkuh kai kaimav nganv guang tangc khwan e.

¹⁶Pitar thu kapaengc thangc, kairaengvmun daeng thangc ding bam khwan e. Khoutei baihmei ziap gaanv khatpu tei pat datna kairaengvmun daeng khou bammei tunacpui khou tei sana, Pitar ta kalungc khou nduangh gut the.

¹⁷Kairaengvmun khou bammei tunacpui tei rui, “Nang ni mi pu tuang ziap akhat hamh nah cho?” twna sa the. Khoutei, “Ai kiuc hamh e,” twna Pitar rui daw the.

¹⁸Hei tei nchumei ganv khwan e, kum tina bangh nunc khatni rigaanvmei nunc tei maithyn mai swlouna ding huamcna nggaan bam khwan e. Pitar ni kaniw daeng khou guang dingna mai nggaan bam khwan e.

¹⁹Tingkuh tei rui Jisu khou kaziap thow thow cho khatni kamei tabui nchamlou tu cho twna thanv the.

²⁰Jisu rui daw the, “Ai meic guay na khou ndauh phauna sa kan de; meic guang kaduaimei bamv sinagog khatni Ravkai khou nchamlou kan tuang de. Ai ramhkhat na sini nkamhna sa zat mak ge.

²¹Tabui swna akhou thanv bam tu cho? Alat chumei nunc khou thanv tio. Ai rui kaniw khou tabui lat salou bu cho thanv tio; ai sa kanmei tei kaniw thay e.”

²²Jisu rui mi kumcna sa ti khou, mi khou tei bammei rigaanv gaanv khat rui, “Nang tabui zaeng rui Tingkuh khou mi kumcna sa tu cho?” twna sana kaphi the.

²³Jisu rui mundawna sa the, “Ai nkhuaimei lat salou tuang nai e thei, salou o. Ai sa kanmei tei nchumh de tw e thei, tabui swna nang ata bai tu cho?”

²⁴Karakclou tan tanna, Anna rui Jisu ta Tingkuh Kaiapha daeng thangc ndiulou the.

²⁵Pitar tei mai nggaanna ding bam khou tei kaniw rui, “Nang ni mi pu tuang ziap cho?” twna kakhou thanv the. Kamei hei tei nuh makna, “Ai kiuc hamh e,” twna daw the.

²⁶Tingkuh bangc gaanv khat, Pitar rui kanu siap taploumeipu riangluaicmei gaanv khat rui, “Pikwan khou tei ai nang ta how kan mak nah cho?” twna sa the.

²⁷Kamei kiuc hamh e twna Pitar rui sa dat muay the. Mi dyng khou tei nruay khuangc the.

²⁸Kumna laukhwan khwanzingh kaniw rui Jisu ta Kaiapha kai khou rui guanghkhyn kai thangc zay tat the. Kaniw tei Kaanpatpui taektw tu khang rui kaniw ta sw mphuam nii lamc makna, Jihudimei kapy nunc tei guanghkhyn kai lungc khou tei gut mak khe.

²⁹Kum tina Pilat tei kaizaeng khou patna, “mi pu hei tabui khuay naina cho?” twna kaniw khou thanv the.

³⁰“Mi pu hei rui simei taanv taanclou mak ge thei, kata nang daeng khou zay guang bam ni tu hamh e,” twna kaniw rui daw the.

³¹“Kum e thei, nangniw kata zay tatna nangniw riak thei layna latzan sw tho,” twna Pilat rui sa the. “Meic gaanv khat ta swluaimei ngamv thu aniw khou tiilou mak ge,” twna kaniw rui daw the.

³²Mi hei kamei akumhmei ramthei theic puni cho twmei sa kasuakcloumei tei guang tangh khang e.

³³Pilat kai lungc khou gut datna, Jisu ta kawna, “Nang Jihudimei guangc kiu cho?” twna thanv the.

³⁴“Mi latthanv hei nang khou rui pat tu ni hamh e thei, meic nunc rui alam khou salou pwna cho?” twna Jisu rui sa the.

³⁵Khoutei Pilat rui mundawna sa the, “Ai hei Jihudimei e twna nang ningna cho? Nangniw Jihudimei nunc khatni nangniw tuang amuh daihmei nunc rui nang ta akhou zay guang tuang de. Nang tabui swlou tina cho?”

³⁶Khoutei Jisu rui sa the, “Atuang guangcdic thu mi mbaanv tuang guangcdic hamh e. Mi mbaanv tuang khwan e thei ata nym mak khang amei nunc rui akhangv kan ni tuang de. Atuang guangcdic thu mi mbaanv tuang hamh e.!”

³⁷“Kum e thei nang guangh cho?” twna Pilat rui kakhou thanv the. Jisu rui mundawna sa the, “Ai hei guangh e twna nang rui sa the. Ai mbaanv khou puancloumei khatni guangmei hei nchumhmei lam khou salou khang e. Nchumhmei tuang mei kathuic rui alat nking e.”

³⁸Khoutei, “Nchumhmei kiu tabui tei cho?” twna Pilat rui thanv the. Khoutei kapaengc thangc pat datna meic nunc khou tei sa the, “mi pu tuang khuay how mak ge.

³⁹Kumna tat bammei riak thei layna, Kaanpatpui Ngai khou kangkai khou bammei gaanv khat ta ai mpatlou puni. Jihudimei guangc ti hei mpatlou tho cho?”

⁴⁰“Mi pu ta hamh e! Barabbas ta mpatlou o,” twna kaniw rui kauc the. (Barabbas hei kariak twanna taanhmeipu khwan e.)