Read Rongmei Naga JAHON 19 Bible Online

JAHON 19 - Rongmei Naga bible

JAHON 19

¹Khoutei Pilat rui Jisu ta tizay tatna tibai the.

²Rihmei nunc rui sauh pyrun kasiatcna, kapy khou runlou the. Kumna haengc ringhmei pheychuanh piulouna,

³kadaeng khou guangna, “Kalum e, Jihudimei guangc!” twna sa the. Kumna kata kaphi the.

⁴Khoutei Pilat kaizaengc khou pat datna, “Zauclo, ai kakhuay how mak ge twna nangniw khou zay pat dat tuang the.”

⁵Kumna Jisu sauh pyrun runna khatni haengc nrymmei pheychuanh piuna pat the. “Zauc tho! mi pu ti hei!” twna Pilat rui kaniw khou sa the.

⁶Amuh daihmei nunc khatni ravkai rigaanv nunc rui kata how lana, “Kata kros khou thaengcluai o! Kata kros khou thaengcluai o!” twna kauc the. “Kum e thei nangniw kata zay tatna swluai tat tho. Ai thu kakhuay how mak ge,” twna Pilat rui sa the.

⁷Meic kangdai tei rui daw the, “Aniw tuang Riakdanv nai e; Riakdanv thei layna kamei theic nina di the. Kalam thu kamei karana kata Ravguangc Nac Mpouh e twna sa the.”

⁸Hei tei chu pwkhou Pilat ping ranv ranv the.

⁹Kamei guanghkai lungc thangc gut datna, “Nang tabui thangc rui guang tu cho?” twna Jisu khou thanv the. Tiki Jisu lat daw mak khe.

¹⁰Pilat rui kakhou sa the, “Nang akhou lat daw lak nah cho? Nang ta mpat khang ni, kros khou thaengcluai khang ni akhou ngamv nai e twmei nang thay mak nah cho?”

¹¹Khoutei Jisu rui sa the, “Ravguangc rui tiilou mak ge thei, aruc khou nang ngamv maek ge. Ata nang khou tii patloupui mei tei kakhuay daic liang e.”

¹²Hei tei chu pwkhou, Jisu ta mpatlou khang Pilat kachaeng phu the. Tiki, “Nang kata mpatlou e thei, nang hei Kaisar mei hamh lana e! Thow pw ni kamei guangh e twna sapui mei tei Kaisar ta adavpui mei e,” twna kaniw rui sa the.

¹³Mi lat guay hei chu pwkhou, Pilat rui Jisu ta kapaengc thangc zay patna, Ibri lat khou Gabatha twna kawmei, Taulamdic kawmei bamv khou naimei latzan bamvpaeng khou dungckey the.

¹⁴Hei tei nthuanh thauna Kaanpatpui Ngai nngay guang ni nungc lauthwan tingchung zaengc khou khwan e. Khoutei, “Mi hei nangniw tuang guangc the!” twna Pilat rui kaniw khou sa the.

¹⁵Khoutei, “Swluai o! Swluai o! Kata kros khou thaengcluai o!” twna kaniw kauc the. “Ai rui nangniw guangc ta swluai o twna cho?” twna Pilat rui kaniw khou sa the. “Aniw guangc thu Kaisar de,” twna amuh daihmei nunc tei rui daw the.

¹⁶Khoutei kros khou swluai khang Pilat rui Jisu ta kaniw khou tii pat the. Kumna kaniw Jisu ta laa the.

¹⁷Kamei patna katuang kros puancna “Pyrou Bamv” twna kawmei bamv khou guang the. Hei tei Ibri lat khou “Golgotha” kaw e.

¹⁸Kaniw rui mi khou tei Jisu ta kros khou thaengclou the. Meic baihmei gaanv nei ta ni Jisu tuang baanzat baandaw khou thaengclou khwan e.

¹⁹“Nazarethmei Jisu, Jihudimei Guangc” twna hyna kros khou tei Pilat rui tidaanclou khwan e.

²⁰Hei tei meic mpeyna rui pac khwan e. Kalam thu Jisu ta thaengcloumei bamv tei kaidai khou rui duh mak khwan e. Hei tei Ibri, Latin, khatni Grik lat khou hylou khwan e.

²¹Khoutei, “‘Jihudimei Guangc’ twna hylou rio, ‘mi pu hei rui “Ai Jihudimei Guangc e” twna sa e’ twna hylou o,” twna amuh daihmei nunc tei rui Pilat khou sa the.

²²“Ai rui hylou kanmei tei hylou kan the,” twna Pilat rui daw the.

²³Rihmei nunc tei Jisu ta kros khou thaengclou lana, katuang pheybaan guay laana, kaphwam padeih khang damc patna, rihmei kathuic khang kaphwam khat khat laa the. Kaniw rui katuang alamvmei mun maekna phiancloumei pheychuanh tei ni laa the.

²⁴“Aniu mi hei siat kaek nangh khe; kasan khou pat patmei laa di kho,” twna rihmei nunc tei kaphianh the. Mi hei, “Kaniw atuang pheybaan nzanh the, atuang pheychuanh khang san zauc the,” twna Nthanmei Latrik khou hyloumei tei guang tangh khang patmei tuang the. Rihmei nunc rui mi kumna sw kan the.

²⁵Jisu pui, kaswanrey, Kleopa now Meri, khatni Magadaleni Meri kaniw hei Jisu tuang kros daeng khou ding tuanc bam khwan e.

²⁶Kapui khatni kamei nzianmei ziap tei kadaeng khou ding bammei ta how lana, “Pui, kamei hei nang nac the,” twna Jisu rui kapui khou sa the.

²⁷“Mi hei nang pui the,” twna kamei rui nzianmei ziap khou tei ni sa the. Mi khou tei rui kamei rui Meri ta kakai thangc nduangh tat kan the.

²⁸Ntaw thu ramh guayna luai the twmei Jisu thay lana, Nthanmei Latrik khou hyloumei tei guang tangh khang rui, “Ai tari e,” twna sa the.

²⁹Khoutei, zoukhiangc lou padikmei buangc akhat mi khou tei nai bam khwan e. Langhpanv kumhmei akhat mi zoukhiangc khou tei ntinna hisop thingtang khou louna kamwang daeng khou laaguang the.

³⁰Jisu hei tei zangv lana, “Luai the!” twna sa the. Kumna kapy nkhum keyna kathiu mutlou kan the.

³¹Hei tei neih key kan e thei, Sabbathneic pat kan nimei tingmik khwan e. Kaniw pumc tei Sabbathneic kros khou thaengclou bam nuh mak khwan e. Mi guang nimei Sabbathneic tei daic dianghmei Sabbathneic ni khwan e. Kum tipui zaeng rui kaniw pumc tei laa key nuh khang kaniw phay swbau khang Jihudimei kapy nunc rui Pilat khou sa the.

³²Kumna rihmei nunc tei tatna Jisu lev thaengc nchamclou bammeipu nei phay tei swbau the.

³³Tiki Jisu daeng khou guang khou thu kamei theic tang bam ti thena, kaphay swbau mak khe.

³⁴Tiki rihmei gaanv khat rui Jisu naek khou buy rui kathuatc tina zei khatni dui luangc key the.

³⁵(Mi hei howpui mei rui mi lam khou hei salou the, mi kiu nangniw ni lwm khang e,[32] Kamei rui samei hei nchumh e, kumna kamei nchumhmei lat sa tuang e twmei kamei thay e.)

³⁶Mi hei, “Karou akhat na sini swbau ni tu hamh e,” twna hyloumei tei guang tangh khang e.

³⁷“Kaniw rui buy biwmeipu ta tei kaniw zauc puni,” twna Nthanmei Latrik kabamv akhat khou ni hylou e.

³⁸Mi tangv hei, Arimathiamei Josep rui Jisu pumc tei mbeih khang ney the. mi pu hei Jihudimei kapy nunc ta pingna nkamhna Jisu ziap sw bammeipu e.

³⁹Nikodim twna kawmeipu, kahu nungc Jisu daeng khou zingbangc khat guang kanmeipu tei ni mir lev alos lou kariumei puat kilogram tamruc dou phungcna Josep thei lay guang khwan e.

⁴⁰Kaney Jisu pumc tei laana, Jihudimei tuang theih mbeihpui riak thei layna, kapumc tei pheynuaih rui maruai tei lev kazih binlou the.

⁴¹Jisu ta thaengcluaimei bamv daeng khou tei pikwan akhat nai khwan e, kumna mi khou tei meic gaanv khat na ta sini mbeihlou makmei tarou akhat nai khwan e.

⁴²Hei tei Sabbathneic mun khou na tipui zaeng rui ana khou naimei tarou khou tei kaney rui Jisu pumc tei mbeihlou the.