Read Rongmei Naga JAHON 2 Bible Online

JAHON 2 - Rongmei Naga bible

JAHON 2

¹Mi tangv zaeng neih thumhpui nungc, Galili tuang Kana kaidai khou nowsuanh ngai akhat nai khwan e. Mi khou tei Jisu pui bam khwan e.

²Jisu lev kaziap nunc ta ni kaw khwan e.

³Drakha zouc zangv ngam guang pwkhou, Jisu khou kapui rui, “Kaniw drakha zouc biuh mak khe,” twna sa the.

⁴Khoutei, “Pui, nang akhou tabui thouc naina cho? Atuang ganv guang mak he,” twna Jisu rui daw the.

⁵“Kamei rui nangniw khou sa samei tei taanc tio,” twna kapui rui chamchaimei nunc khou tei sa the.

⁶Jihudimei tuang riak thei layna, phay baanh khiu nthanpui dui khang, akhat khou dui abiu kathumh dou gutmei, ntauh raengbe charuk mi khou tei dungclou bam khwan e.

⁷Mi guay tei dui lou padik go twna Jisu rui kaniw khou sa ti khou, mi guay tei lou padiklou ngam the.

⁸“Mi dui tei suak patna ngaypy khang tei tii ti tho,” twna Jisu rui kaniw khou sa the. Kaniw rui mi dui tei mi pu khang tei laaguang the.

⁹Drakha zouc chaguanh kanmei dui tei kamei mbap pwkhou, hei tei tabui thangc rui cho twmei kamei thay mak khe, (tiki dui tei tiimei chamchaimei nunc na tei rui thay e.) Kum tina kamei rui nowpouc ta tei kawna,

¹⁰“Meic baih baihmei kai thu, drakha zouc gaymei luan rey e, kumna meic guayna zangv pian kan e thei, nsamvmei luan e; tiki nang thu ntaw nganvna drakha zouc gaymei lou bam bu di he cho!” twna sa the.

¹¹Jisu rui mi reymei sw-nchinmei taanv hei Galili tuang Kana khou taanclou the. Mi khou tei kamei rui kangamv ndauhlou the, kumna kaziap nunc kakhou lwmlou the.

¹²Mi tangv hei, Jisu kapui, kakainac nunc khatni kaziap nunc lev Kapharnahum thangc tatna mi khou tei zaeng ramh biuc dou bamlou the.

¹³Jihudimei tuang Kaanpatpui Ngai ana guang ti thena, Jisu Jerusalem thangc ngangh the.

¹⁴Khoutei guaih, lauziu khatni aphyna zuanhmei nunc, khatni syan akhiakmei nunc Ravkai khou tei dungc bammei ta kamei how the.

¹⁵Kamei rui riangbuk kasiatcna, lauziu khatni guaih guay ta tei Ravkai khou rui kathamv alay pat the, khatni syan akhiakmei nunc tuang paeng guay thui nkhanlou ngam the. Syan guay tei kandih khou bun nkhanlou ngam the.

¹⁶Kumna, “Mi guay hei laa tat kan tho! Apu kai ta lanvguanhpui kai tisw dat nuh mak khe!” twna aphyna zuanhmei nunc khou tei sa the.

¹⁷Khoutei, “Nang kai ta lungh suhmei hei rui apumc swthuan puni the,” twna hyloumei tei kaziap nunc ningtow the.

¹⁸Jihudimei kapy nunc guangna, “Mi hei sw khang nang khou ngamv nai e twmei lyan khang nang tabui tuang sw-nchinmei tuang lyanlou ngam cho?” twna sa the.

¹⁹“Mi ravkai hei ra keylou e thei, zaeng neih thumh khou ai rui sw thaulou dat puni,” twna Jisu rui daw the.

²⁰“Nang mi hei zaeng neih thumh khou sw thaulou dat diw e twna ning nah cho? Mi Ravkai hei tingkwm riakdeina charuk gutna swlou tuang e,” twna kaniw rui sa the

²¹Tiki Jisu rui sa bammei ravkai kiu thu kapumc ta de.

²²Kamei ringcthau dat kanmei tangv, kamei rui mi kumcna saloumei hei kaziap nunc ningtow dat the, kumna Nthanmei Latrik khou hyloumei khatni Jisu rui saloumei tei kaniw lwm the.

²³Jisu kamei Kaanpatpui Ngai khou, Jerusalem khou bammei dak khou tei, kamei rui taancloumei sw-nchinmei taanv guay tei how lana, meic mpeyna kakhou lwmlou the.

²⁴Tiki Jisu thu kaniw ta lwm mak ge. Kalam thu kamei kaniw guay ta thay e.

²⁵Kaniw lam khou meic gaanv khat na rui sini kakhou salou bam khang kage maek ge. Kalam thu kaniw lungning khou nai bammei tei kamei thay e.