Read Rongmei Naga JAHON 3 Bible Online

JAHON 3 - Rongmei Naga bible

JAHON 3

¹Jihudimei nunc tuang baanhza, kazanc Nikodim kawmeipu gaanv khat nai khwan e. Kamei hei Pharisimei akhat re.

²mi pu hei zingbangc akhat Jisu daeng khou guangna, “Rabbi, nang hei Ravguangc rui ndiu guangmei dinhpouc akhat re twmei aniw thay e. Kalam thu Ravguangc kazauh makna meic gaanv khat na sini, nang rui sw bammei sw-nchinmei taanv guay hei taanc ngam ni tu hamh e,” twna sa the.

³Mundawna Jisu rui sa the, “Ai rui nang khou kaling siakna samei kiu mi hei e: Thow pw ni, puanc thanh mak ge thei,[5] kamei Ravguangc guangcdic how ngam mak ge.”

⁴Khoutei, “Maansei gaanvdaih kanmei gaanv khat hei akumhna puanc dat nina cho? Kamei kapui bung lungc khou gut datna puanc dat nuh dina cho?” twna Nikodim rui sa the.

⁵Jisu rui sa the, “Ai rui nang khou kaling siakna sapui tuang e: Dui lev Bumaengh rui puanh mak ge thei, meic gaanv khat na sini Ravguangc guangcdic gut ngam mak ge.

⁶Meic pumc khou rui puanhmei tei meic pumc e, Bumaengh khou rui puanhmei tei Bumaengh e.

⁷‘Nangniw puanc thanh[6] nina e’ twna ai rui nang khou samei khou hei ngak riu.

⁸Mpwan hei aliu nii nii thangc aliu tat re; kakhwan chu e, tiki tabui thangc rui guangna tabui thangc tat kan tu cho aniu thay mak ge. Bumaengh khou rui puanhmei kiu ni mi hei kumhmei tuang e.”

⁹“Mi kiu akumhna puanc nuh nina cho?” twna Nikodim rui thanv the.

¹⁰Jisu rui sa the, “Nang thu Isaraelmei tuang dinhpouc daihmei akhat di the, tiki nang mi hei kabah thay mak nah cho?

¹¹Ai rui nang khou kaling siakna sapui tuang e: aniw thaymei tei aniw sa e khatni aniw howmei tei aniw raclou e, tiki nangniw gaanv khat na sini aniw lat laalou mak ge.

¹²Ai rui mi kandic tuang sa tina nangniw lwm mak ge thei, tingkauh thangc tuang sa tina nangniw tabui kumhna lwm nina cho?

¹³Tingkauh thangc rui keymei Meic Nac Mpouh hamhna meic gaanv khat na sini tingkauh ku mak he.

¹⁴“Mousi rui kuanzinc rui kasiamhmei nrui pauh twan khou louna tazikramv khou zay thaumei tei kumcna, Meic Nac Mpouh ta ni zay thau puni.

¹⁵Hei tei kakhou lwmloumei guay ringcsuangmei laa khang e.

¹⁶Kalam thu Ravguangc rui mbaanv maanseina ta heidikamv nzianpui zaeng rui, kanac mpouh akhat namei ta tiilou the. Thow pw ni kakhou lwmmei guay theic dat makna ringcsuangmei laatow khang e.

¹⁷Kalam thu Ravguangc rui Kanac Mpouh ta mbaanv khou ndiu guangmei hei mbaanv ta latzan sw khang hamh e; tiki kapaan rui mbaanv ta kanlou khang e.

¹⁸“Kanac Mpouh khou lwmloupui mei ta tei thu latzan sw mak khe; tiki lwmlou makpui mei khang tei thu latzan luai tang the. Kalam thu Ravguangc Nac Mpouh akhat namei khou tei kamei lwmlou mak ge.

¹⁹Latzan kiu mi hei e: Gaanhmei tei mbaanv khou guang the; tiki meic nunc hei gaanhmei ta suangc zinghmei ta kahaw the. Kalam thu kaniw tuang taanv si the.

²⁰Kataanv sipui mei tei gaanhmei ta laa zih e, kumna kataanv guay tei ndauh pat puni tina kamei gaanhmei khou guang mak ge.

²¹Tiki nchumhmei taanhpui mei tei, kataanv guay tei Ravguangc khou taanhpui taanv e twmei ndauh pat khang gaanhmei khou guang e.”

²²Mi tangv, Jisu khatni kaziap nunc Judia ramv khou guangna mi khou tei kaniw bam kanaklouna duiluplou bam khwan e.

²³Jahon ni Salim khou rui duh makmei, Ainon kawmei bamv khou duiluplou bam khwan e. Kalam thu mi bamv khou tei dui mpeyna nai e. Kamei rui kaniw ta duiluplou bam khwan e.

²⁴(Mi hei Jahon ta kangkai khou lou makmei hu khou e.)

²⁵Jahon ziap nunc lev Jihudimeipu gaanv khat sw-nthanmei lam khou agi thau khwan e.

²⁶Kumna kaniw Jahon daeng khou guangna, “Rabbi, Jordan paengc thangc nang bam nchamcloumeipu, nang rui kalam khou saloumeipu tei, duiluplou bam the. Kumna meic guayna kadaeng khou nzwan guang bam the,” twna sa the.

²⁷Jahon rui sa the, “Ravguangc rui tiilou ti mak ge thei, nai nii sini nai ngam tuang hamh e.

²⁸‘Ai thu Khrista hamh e; kahu kasuakc guangmeipu de’ twna ai rui sa kanmei tei nangniw chu kan dyng the cho.

²⁹Nowpeic ta laa nimei thu nowpouc tei de; tiki kadaeng khou ding bammei nowpouc pammeipu tei nowpouc khwan tei chuna neihla e. Hei tei kumcna, ai ni neihlamei rui padik bam tuang e.

³⁰Kamei thu mbu thau puni the; tiki ai thu key kan puni the.”

³¹Kauh thangc rui keymeipu hei meic guayna ruc khou daic liangmeipu e. Mbaanv khou rui guangmeipu hei thu mbaanv tuang de, kumna kamei mbaanv tuang lam khou sa e; tiki kauh thangc rui keymeipu hei thu meic guay ruc khou daic liangmeipu e.

³²Kamei rui how kahakmei khatni chu kahakmei tei kamei sa e; tiki meic gaanv khat na sini kalat ta laalou mak ge.

³³Tiki kalat hei laaloumei kathuic tei rui Ravguangc hei nchumh e twmei kamei laa the twna hei tei rui nchin the.

³⁴Ravguangc rui ndiu guangmeipu hei rui Ravguangc rui samei lat tei sakadailou the. Kalam thu Ravguangc rui Bumaengh karyan kadath maekna kakhou tiilou the.

³⁵Kapu rui Kanac Mpouh ta nzian e, kumna ramh katana kabaanc khou tiilou the.

³⁶Thow pw ni Kanac Mpouh khou lwmloupui mei tei ringcsuangmei laatow the; Kanac Mpouh lat tei piu makpui mei tei ringhmei laa ni tu hamh the. Kalam thu karuc khou Ravguangc lungpuam nai bam e.