Read Rongmei Naga JAHON 4 Bible Online

JAHON 4 - Rongmei Naga bible

JAHON 4

¹Jisu ziap rui Jahon ziap suangc geic the khatni kamei rui duiluploumei geic mbu the twmei Pharisimei nunc chu the twmei Poubauhmei thay the.

²(Kaling thu Jisu rui thu duiluplou mak ge, kaziap nunc rui de.)

³Kum la thena, kamei Judia mpatlouna Galili thangc tat the.

⁴Mi chaenglwan khou tei kamei Samariamei ramv tat ruan khang sw khwan e.

⁵Khoutei Jisu Sukhar kawmei Samariamei kaidai akhat khou guang the. Hei tei Jakob rui kanac Josep khang tiiloumei ramvpuk daeng khou e.

⁶Mi khou tei Jakob duikhunc nai khwan e. Jisu tat lak la thena, mi duikhunc daeng khou tei dungckey the. Hei tei neih ndyng zaengc khou khwan e.

⁷Khoutei Samariameipui gaanv khat dui zu khang pat khwan e. Kumna, “Ai zangv khang dui tiilou o,” twna Jisu rui kakhou sa the.

⁸Mi ganv khou tei tu zangvmei tuang liu khang kaziap nunc thu kaidai thangc tei tat kan khwan e.

⁹“Jihudimei nang rui akumhna Samariamei akhou dui ney tu cho?” twna mi pui tei rui sa the. Kalam thu Jihudimei hei Samariamei lev gansaengc duilwan mak ge.

¹⁰Jisu rui mundawna, “Nang Ravguangc tuang kaipat ti hei thay khwan e thei, khatni nang khou dui ney bammeipu hei thow cho twmei thay khwan e thei, nang rui kakhou ney ni tuang e. Kumna kamei rui nang khang ringhmei dui tii ni tuang e,” twna sa the.

¹¹“Haicpouc, nang khang dui zu ku nuhmei tuang maek ge. Mi duikhunc hei ni nthuk nganv de. Ringhmei dui kiu nang tabui thangc rui laa nina cho?” twna mi pui tei rui sa the.

¹²“Mi duikhunc hei tiiloumeipu, kamei lev kanac nunc khatni katuang kiruai guay mi khou rui zangvna lungc kanmeipu, aniw pupouc Jakob khang suangc nang daic nah cho?” twna kamei rui sa the.

¹³Khoutei mundawna Jisu rui sa the, “Mi dui hei zangvmei nunc thu tari dat puni de;

¹⁴tiki ai rui tii nimei dui hei zangvmei guay thu tari dat zat lak khe. Ai rui tiilou nimei dui tei kakhou rui duipuakkai kumcna puak patna kakhang ringcsuangmei tiilou puni.”

¹⁵“Haicpouc, ai mi khou hei dui guang zu dat bam mak khang, tari dat lakmei dui kiu akhang tiilou o!” twna mi pui tei rui sa the.

¹⁶Khoutei, “Nang tatna nang gaanv ta mi khou hei kaw guang o,” twna Jisu rui kakhou sa the.

¹⁷Mundawna, “Agaanv maek ge,” twna sa the. Jisu rui kakhou sa the, “Nang gaanv maek ge twna nang rui samei hei nchumh the.

¹⁸Tiki nang gaanv panguh the; kumna ntaw nai bammeipu hei nang gaanv hamh e. Nang rui samei hei kaling the.”

¹⁹Mi pui tei rui sa the, “Haicpouc, nang hei muhzwng e twmei ai thay the.

²⁰Aniw pupouc nunc thu mi chyngbut khou hei kalum e; kumna nangniw thu Jerusalem khou kalum nina de twna sa e.”

²¹Jisu rui kakhou sa the, “Tanpuile, ai rui samei hei lwm o: Pu ta mi chyngbut khou ni hamh, Jerusalem khou ni hamhna kalum nipui ganv guang puni.

²²Samariamei nangniw hei nangniw kalum bammeipu ta thay mak ge; tiki Jihudimei aniw thu aniw kalum bammeipu ta thay e. Kalam thu kanloumei hei Jihudimei khou rui guang e.

²³Tiki kalum changhmei guay rui Pu ta bumaengh khou khatni nchumhmei khou kalum nipui ganv guang the, ntaw hei the; kalam thu mi kumcna kalumpui mei ta tei kata kalum khang Pu rui phu e.

²⁴Ravguangc hei Bumaengh e, kumna kata kalummei guay rui bumaengh khou khatni nchumhmei khou kalum nina e.”

²⁵“Khrista twna kawmei Messia guang puni twmei ai thay e; kamei guang pwkhou ramh guayna dinclou puni,” twna mi pui tei rui sa ti khou,

²⁶“Nang ta lat kachuc bammeipu ai hei kamei kiu the,” twna Jisu rui daw the.

²⁷Mi dyng khou tei Jisu ziap nunc guang dat the. Kumna kamei ntumei gaanv khat lev lat kachuc bammei ta kaniw how pwkhou kaniw khang ngak the. Tiki, “Nang tabui tuang kakhi bam tu cho?” twna mi pui khou tei, hamh e thei, “Tabui swna nang mi pui lev lat kachuc bam tu cho?” twna Jisu khou meic gaanv khat na sini sa mak ge.

²⁸Mi pui tei katuang duilai ganclouna, kaidai thangc tei tat the.

²⁹Kumna, “Ai rui taanc kanmei guay thay parimeipu bam e, pat zauc lo. Kamei hei Messia kiu lana the ny?” twna meic nunc khou tei sa the.

³⁰Kaniw kaidai khou tei rui patna, Jisu daeng khou guang the.

³¹Mi ganv khou tei ziap nunc tei rui, “Rabbi, tu di kho,” twna sa ti khou,

³²“Nangniw thay makmei taektw ai tu khang nai de,” twna Jisu rui daw the.

³³Khoutei, “Meic gaanvsaekc rui taektw laaguang tina the ny?” twna ziap nunc tei khat khat khou sa the.

³⁴Khoutei Jisu rui sa the, “Atuang taektw twmei kiu ata ndiu guangmeipu rui ningmei tei taanhmei khatni kamei rui tiiloumei taanv taanc luailoumei hei the.

³⁵‘Bw padeih tangv rui lautay nina de,’ twna nangniw sa bam e. Tiki ai rui nangniw khou sa e: Laupuk ti hei zauc tho, minc mphwan phumh phum the.

³⁶Lau taypui mei khang kaphy nai e, kumna khuam guangmei kathai tei ringcsuangmei khang e. Kumna lingcloumeipu tei lev taymeipu tei neihla nchamc puni.

³⁷‘Gaanv khat rui lingclou e, baihmei rui tay e,’ twmei latchap hei nchumh the.

³⁸Nangniw rui taanclou makmei lau tay khang ai rui nangniw ta ndiulou tuang the. Baihmei rui taanclou the, nangniw rui tay the.”

³⁹“Ai rui taanclou kanmei guayna kamei rui akhou salou dat ngam the,” twna mi pui tei rui salou tina, mi kaidai khou bammei Samariamei meic mpeyna Jisu khou lwmlou the.

⁴⁰Kumna Samariamei nunc kadaeng khou guangna neih keylou khang sa the. Kum tina, Jisu mi khou tei zaeng neih nei neihlou the.

⁴¹Kalat chulouna meic baihmei mpeyna ni lwmlou dat di he.

⁴²Kumna, “Ntaw thu nang lat khou rui aniw lwm tu hamh the, tiki kamei rui samei tei aniw chu kahakna kachangc changhna kamei hei mbaanv ta kanloumeipu kiu di the twmei aniw thay the,” twna kaniw rui sa the.

⁴³Mi khou tei, zaeng neih nei bamloumei tangv, kamei Galili thangc tat the.

⁴⁴Kumna, “Muhzwng ta kakandih khou thu chakhwang sw mak ge,” twna kamei rui sa the.

⁴⁵Kamei Galili key tangc pwkhou, meic nunc rui kata laalou the. Kalam thu kaniw ni Kaanpatmei Ngai khou tei, Jerusalem khou nganghna kamei rui mi ngai lungc khou tei taancloumei guay tei how the.

⁴⁶Jisu mi tangv tei, kamei rui dui ta drakha zouc tiguanhlou kanmei bamv Galili tuang Kana thangc tat the. Kapharnahum khou bammei meicdaihmei gaanv khatpu, kanac nnau ran sihna theic ni kumcna bam khwan e.

⁴⁷Jisu Judia khou rui Galili khou key dat the twmei chu lana, kamei Jisu daeng khou guangna, kamei keyna kanac ta tigaylou khang huaycha the.

⁴⁸Khoutei, “Nangniw charynmei sw-nchinmei taanv how mak ge thei lwm zat ni tu hamh e,” twna Jisu rui kakhou sa the.

⁴⁹“Kaipouc, anac theih mak khou keylou tho,” twna mi pu tei rui sa the.

⁵⁰“Tat tho, nang nac theih mak khe,” twna Jisu rui kakhou sa the, mi pu tei Jisu rui samei tei lwmna tat kan the.

⁵¹Kamei kakai thangc key datmei chaenglwan khou, kabangc nunc kata ngangh riuna, “Nang nac gay dat the!” twna sa the.

⁵²Mi nac tei akumhmei ganv khou rui gay dat tu cho twna thanv ti khou, “Douclaneic neih ndyng tangv rui kapumc chaenghmei nchu key kan the,” twna sa the.

⁵³Khoutei, hei tei Jisu rui, “Nang nac gay dat the,” twna saloumei ganv tei the twmei kamei thay the. Khoutei kamei khatni kakai kaikhunhmei guay lwmlou the.

⁵⁴Mi hei Jisu, kamei Judia khou rui Galili khou key khou kaneimei sw-nchinmei taanv e.