Read Rongmei Naga JAHON 5 Bible Online

JAHON 5 - Rongmei Naga bible

JAHON 5

¹Mi tangv hei Jihudimei tuang ngai nai dat khwan e. Kumna Jisu mi ngai khang tei Jerusalem thangc ngangh the.

²Jerusalem khou Lauziu Raengcmun daeng khou, Ibri lat khou Bethzatha[7] kawmei zeic akhat nai khwan e.[8] Mi zeic daeng khou tei kaisangh daihmei panguh nai khwan e.

³Mi kaisangc guay khou tei nnaumei meic mpeyna—mik tiatmei, phaybaumei, khatni kapaektheihmei nunc zip padik bam khwan e.

⁴Kaniw dui kalungmei ta nkhwan bam tuang e, kalam thu kaluan luan Poubauhmei tuang baanchara keyna dui tei kabaw thau raph rap khwan e. Dui tei kabaw thaulou tang pwkhou gut rey reymei tei karavpuat guay gay dat raph rap khwan e.[9]

⁵Tingkwm tamrucna tachat nnau bammeipu gaanv khat ni mi khou tei bam khwan e.

⁶Mi pu tei mi khou tei zip bammei ta how pwkhou, kamei tingkwm hei saan nnau guang the twmei thay lana, “Nang ta tigayloumei ta kahaw bu cho?” twna Jisu rui kakhou thanv the.

⁷“Haicpouc, dui kalung thaupui ganv khou, ata dui khou laa keylou nimei meic maekna the. Ai gut khang karamc bammei dak khou, meic baihmei rui gut rey raph rap kanna the,” twna mi suanmeipu tei rui daw the.

⁸“Thau tho, nang zy laa thauna tat tho,” twna Jisu rui kakhou sa the.

⁹Mi dyng khou tei mi pu tei gay dat the, kumna kazy laa thauna tat the. Hei tei Sabbathneic khwan e.

¹⁰Khoutei Jihudimei kapy nunc rui, “Aseic hei Sabbathneic de, nang zy puancna nang tat bam nuh mak ge,” twna mi pu khou tei sa the.

¹¹“Ata tigayloumeipu rui azy laa thauna tat tho tw pwna de,” twna kamei rui daw the.

¹²“Mi kumcna sameipu kiu thow cho?” twna kaniw rui kakhou thanv the.

¹³Tiki kata tigayloumeipu tei thow cho twmei kamei thay mak ge. Kalam thu mi khou tei meic kangdai bam khwan e, kumna Jisu tei meic pang khou tei tiap maan kan the.

¹⁴Katang thangc, Jisu rui kata Ravkai khou ariwna, “Zauclo, nang gay nthan thiak the. Mi khang suangc si ranvmei nang khou guanglou mak khang paapc taanc dat ri tho,” twna salou the.

¹⁵Khoutei mi pu tei tat lana, kata tigayloumeipu tei Jisu e twna Jihudimei kapy nunc khou salou the.

¹⁶Khoutei, kamei rui mi tigayloumei taanv hei Sabbathneic taanc e twna kata sw kasic khang sw thau the.

¹⁷“Apu nthaekc makna taanc bam e, mi zaeng rui ai ni taanc nina e,” twna Jisu rui kaniw khou daw the.

¹⁸Khoutei kamei Sabbathneic riak sw bakmei na hamhna, Ravguangc ta kapu twna kawna karana kata Ravguangc lev ti-nchamclou e twna Jihudimei kapy nunc tei kata swluai nii ranv ranv the.

¹⁹Jisu rui kaniw khou sa the, “Ai rui nangniw khou kaling siakna sa tuang e: Kanac Mpouh hei ramh khatna sini karana kanyng swna taanc ngam mak ge; Pu rui taanh taanhmei tei zaucna taanc bam tuang de. Pu rui taanhmei tei Kanac Mpouh rui ni taanh tuang de.

²⁰Pu rui Kanac Mpouh ta nzian e, kumna kamei rui taanhmei guay tei Kanac Mpouh khou lyanlou e. Nangniw ngak khang, mi khang suangc charynmei taanv taanh khang Pu rui kakhou lyanlou puni.

²¹Pu rui theihmei ta tiringcthauloumei kumcna, Kanac Mpouh hei rui ni kamei rui tiringclou nimei nunc ta tiringclou e.

²²Pu rui gaanv khatna ta sini latzan sw mak ge. Latzan swmei tuang ngamv guay tei Kanac Mpouh khou tiilou the.

²³Mi hei Pu ta chakhwang swmei kumcna, meic guayna rui Kanac Mpouh ta chakhwang sw khang e. Kanac Mpouh ta chakhwang sw makpui mei tei kata ndiu guangmei kaPu ta chakhwang sw mak tuang e.

²⁴“Ai rui nangniw khou kaling siakna samei kiu mi hei e: Thow pw ni alat hei chu lana, ata ndiu guangmeipu khou lwmloupui mei tei ringcsuangmei laa the. Kamei latzan khou guang dat mak khe, kamei theihmei khou rui ringhmei khou kaan pat tang the.

²⁵Ai rui nangniw khou kaling siakna sa tuang e: Theihmei nunc rui Ravguangc Nac Mpouh khwan chu nimei ganv guang pw the, khatni ntaw guang tangc the. Kumna hei tei chumei guay ringcthau dat puni.

²⁶Pu kakhou ringhmei naimei tei kumcna, Kanac Mpouh khou hei ni ringhmei nai khang tiilou the.

²⁷Khatni kamei rui Kanac Mpouh khou latzan swmei ngamv tiilou the. Kalam thu kamei hei Meic Nac Mpouh e.

²⁸Nangniw mi khou hei ngak nangh e. Theic kanmei guay rui kakhwan chuna,

²⁹ringcthau nipui ganv guang puni. Gaymei taancloumei guay rui ringh khang khatni simei taancloumei guay rui latzan khang ringcthau puni.

³⁰“Atuang latzan hei nchumh e. Kalam thu arana rui ramh khatna sini sw ngam mak ge. Ai chumei thei layna taanh tuang de. Ai rui sw nii niimei ai sw khang hamh e, ata ndiuloumeipu rui sw o twmei tei sw khang de.

³¹“Arana alam khou samei tei thu nchumh the twna laa khang hamh e.

³²Tiki ai hamhmei baihmei alam khou sa kanmeipu gaanv khat nai e, kumna kamei rui sa kanmei tei nchumhmei e twmei ai thay e.

³³Nangniw rui Jahon khou ndiu guang khou tei kamei rui alam khou kalingmei tei salou kan the.

³⁴Alam khou meic gaanv khat rui salou khang kahawna sa bam tu hamh e. Ai rui mi hei sa bammei hei thu, nangniw ta kanlou khang e.

³⁵Jahon hei chuangc bammei thaucmai kumcna gaanc bam khwan e, kumna kariw khou nangniw neihla kanak bam nii khwan e.

³⁶Jahon khang suangc daihmei alam khou samei akhat nai e. Mi kiu thu ai rui taanc bammei, aPu rui akhou tiiloumei taanv guay hei the. Mi taanv guay hei rui ai thow cho twmei dinc the khatni aPu rui ata ndiu guang tuang e twmei lyan the.

³⁷Ata ndiuloumei apu rui ni alam khou dinclou e. Nangniw kakhwan chu zat mak ge, kalwn ni how zat mak ge,

³⁸khatni kalat nangniw lung khou lou mak ge. Kalam thu kamei rui ndiu guangmeipu ta nangniw lwm mak ge.

³⁹Nthanmei Latrik khou tei rui ringcsuangmei laatow puni twna nangniw hei tei kathai e. Mi Nthanmei Latrik tei thu alam khou sa bam tuang de.

⁴⁰Tiki ringhmei laa khang nangniw akhou guang nii mak ge.

⁴¹“Meic nunc rui thuancloumei ta ai kahaw tuang hamh e.

⁴²Nangniw lung khou Ravguangc ta nzianmei maek ge twmei ai thay e.

⁴³Ai apu zanc khou guang tuang e, tiki nangniw ata laalou mak ge. Thowkumhmei karana kacharay swna guang ti thei, nangniw kata laalou puni.

⁴⁴Nangniw khat khat rui thuanclou kary khang na swna, akhat namei Racguangc rui thuanclou khang thu sw makna, akumhna nangniw akhou lwmlou ngam nina cho?

⁴⁵Nangniw hei nkhuaimei nunc e twna ai rui aPu khou sa puni twna nangniw ning riu. Nangniw ta nkhuaimei nunc e twna sa nimei thu nangniw lwm bammei Mousi tei de.

⁴⁶Nangniw Mousi ta lwm changh e thei, nangniw ata lwm ni tuang e. Kalam thu kamei rui hyloumei hei alam khou the.

⁴⁷Tiki kamei rui hyloumei tei nangniw lwm mak ki, akumhna ai rui samei nangniw lwm ngam nina cho?”