Read Rongmei Naga JAHON 6 Bible Online

JAHON 6 - Rongmei Naga bible

JAHON 6

¹Mi tangv hei, Jisu Tiberia Zeiclat twna ni kawmei Galili zeiclat paengc akhat thangc kaan pat the.

²Suc numei nunc ta kamei rui tigayloumei sw-nchinmei taanv guay tei how lana, mei kangdai kathei lay tat khwan e.

³Jisu luanghbut akhat khou ku lana, mi khou tei kaziap nunc lev dungckey the.

⁴Hei tei Jihudimei tuang Kaanpatpui Ngai hu na khou khwan e.

⁵Khoutei Jisu zauc pat pwkhou meic kangdai kadaeng khou guang bammei ta how lana, “Meic heizumei ti hei titu khang aniu tabui khou rui ntyan liu ngam nina cho?” twna Philip khou sa the.

⁶(Hei tei Philip ta nchanvna sa tuang e; kamei sw nimei tei kamei thay de.)

⁷“Meic kathuicna katit katitna sini mbap tow ntangh khang ntyan liu pwkhou, denari[10] phay nei tuang rui biuc ni tu hamh e,” twna Philip rui daw the.

⁸Kaziap baihmei gaanv khat, Simon Pitar kainac Andriu rui mi kumcna sa the,

⁹“Mi khou hei nggaanv nac gaanv khat khou siupian tyan dwm panguh lev khav kang nai e; tiki meic heizumei khang mi na hei rui tabui sw nina cho?”

¹⁰“Meic guayna ta tidungc key tho,” twna Jisu rui sa the. Mi khou tei mphuaih mpeyna nai khwan e. Kumna kaniw dungckey the. Nggaanvmei ching panguh dou khwan e.

¹¹Jisu ntyan tei laana, Ravguangc ta thuanckulouna, mi khou tei dungc bammei guay khou tei nzanhlou the. Hei tei kumc muayna, khav kang tei ni nzanhlou the. Kumna kaniw tu nii saanv tu the.

¹²Kaniw tu nggu ngam kan pwkhou, “Tu nsaekcloumei guay tei khuam guang o; katitna sini swmaan riu,” twna Jisu rui kaziap nunc khou sa the.

¹³Kumna khuam guang pwkhou ntyan dwm panguh khou rui meic nunc tu nsaekcloumei tei nggiuh ruhna kanei padik khwan e.

¹⁴Jisu rui taancloumei, mi sw-nchinmei tei how lana, “Mi hei mbaanv khou guang nimei Muhzwng kiu[11] changh lana di the!” twna meic nunc tei rui sa the.

¹⁵Meic nunc tei guangna kata suncna guangh tisw khang nym puni the twmei thay lana, Jisu karana chyng thangc tat dat kan the.

¹⁶Tingzyn key pwkhou, Jisu ziap nunc zeihlat khou tei key the.

¹⁷Kumna kaniw hih tuangcna Kapharnahum biak thangc pat dat the. Zingc the, tiki Jisu kaniw daeng khou guang dat mak he.

¹⁸Khoutei pwanzingh guangna dui kamuatc thau the.

¹⁹Ziap nunc tei mail kathumh padeih chau gut pwkhou, Jisu dui ruc khou, kaniw daeng khou tat guangmei ta kaniw how lana ping the.

²⁰Khoutei, “Ai de, ping riu!” twna Jisu rui kaniw khou sa the.

²¹Khoutei kaniw neihlana kata hih khou tei laa gutlou the. Kumna asaanh mak khou kaniw tangclou nipui bamv tangc the.

²²Nthuanh thauna, Jisu ziap nunc tat dat kanmei hic khou tei Jisu kazauh kan mak ge khatni mi khou tei hih baihmei ni maek ge twmei mi khou tei bam duhmei meic kangdai tei thay khwan e.

²³Khoutei, Poubauhmei rui thuanckulouna meic kangdai ta ntyan tituloumei bamv daeng khou tei Tiberia thangc rui hih asaekc guang khwan e.

²⁴Jisu ni kaziap nunc ni mi khou tei bam mak khe twmei meic kangdai tei thay lana, kaniw mi hic guay khou tei gutna, Jisu ta phuna Kapharnahum khou guang the.

²⁵Kaniw Jisu ta zeihlat paengc akhat thangc tei ariw lana, “Rabbi, nang tabui nungc rui mi khou hei guang lana cho?” twna kaniw rui Jisu khou sa the.

²⁶Jisu rui mundawna sa the, “Ai rui nangniw khou kaling siakna sa tuang e: Nangniw rui ata phu bammei hei sw-nchinloumei khou tei rui hamh e, ntyan rui nangniw bung ti-nguloumei khou tei rui de.

²⁷Maan kan nimei taektw khang rui nangniw karamc bam riu; ringcsuangmei taektw laatow khang karamc o. Hei tei Meic Nac Mpouh rui nangniw khang tii puni. Kalam thu Pu Ravguangc rui kakhou mi ngamv hei tiilou the.”

²⁸“Ravguangc rui ningmei taanh khang aniw tabui tuang sw nina cho?” twna kaniw rui Jisu khou thanv the.

²⁹“Ravguangc rui ningmei thu Kamei rui ndiu guangmeipu khou lwmmei hei the,” twna Jisu rui daw the.

³⁰Kaniw rui daw the, “Aniw nang ta lwm khang tabui tuang sw-nchinmei taanv nang taanclou ni cho? Nang tabui tuang swlou ni cho?

³¹‘Kaniw tu khang kamei rui tingkauh thangc rui ntyan tii key the,’ twna hyloumei kumcna, aniw pupouc nunc tazikramv khou manna tu khwan e.

³²“Ai rui nangniw khou kaling siakna sa tuang e: Mousi rui nangniw khang tiimei tei thu tingkauh thangc tuang ntyan hamh e;[12] tingkauh thangc tuang kalingmei tyan tiimei kiu thu aPu hei e.

³³Ravguangc rui tiimei ntyan kiu thu tingkauh thangc rui keyna mbaanv khou ringhmei tiiloumeipu hei e.”

³⁴“Haicpouc, mi ntyan kiu aniw khang tii tanh tanlou o,” twna kaniw rui Jisu khou sa the.

³⁵Jisu rui kaniw khou sa the, “Ai hei ringhmei ntyan e. Akhou guangpui mei tei ndaapc dat lak khe; akhou lwmpui mei tei tari dat lak khe.

³⁶Tiki ai rui nangniw khou sapui tuang e: Nangniw ata how the, tiki lwm mak ge.

³⁷Apu rui akhou tiiloumei guay tei akhou guang puni, kumna akhou guangpui mei ta ai ganc pat lak ge.

³⁸Kalam thu ai tingkauh thangc rui keymei hei ai ningmei taanh khang hamh e, ata ndiu guangmeipu rui ningmei taanh khang e.

³⁹Ata ndiu guangmeipu rui ningmei thu, kamei rui akhou tiiloumei guay tei gaan khatna ta sini swmaan makna nkhamhpui nungc kaniw guay ta tiringcthaulou datmei hei e.

⁴⁰Kalam thu apu rui ningmei thu Kanac Mpouh ta howmei khatni kakhou lwmloumei kathuic ringcsuangmei laamei hei e.”

⁴¹“Ai hei tingkauh thangc rui keymei tyan e,” twna sa tipui zaeng rui meic nunc rui karuc khou tanglum thau the.

⁴²“mi pu hei Josep nac Jisu tei de. Aniu kapui kapu ta thay de. Akumhna kamei tingkauh thangc rui key tuang e twna sa tu cho?” twna kaniw rui sa the.

⁴³Khoutei, Jisu rui sa the, “Nangniw mi kumna tanglum bam riu.

⁴⁴Ata ndiu guangmei aPu rui zay guang ti mak ge thei, meic gaanv khatna sini akhou guang ngam ni tu hamh e. Nkhamhpui nungc ai rui kata tiringcthaulou puni.

⁴⁵‘Meic guayna ta Ravguangc rui nchamlou puni,’ twna muhzwng nunc tuang latrik khou hylou e. Apu lat tei chuna thaymei guay akhou guang e.

⁴⁶Mi kumcna samei hei rui meic guayna Pu ta how the twna sa tu hamh e. Pu ta howmei thu Ravguangc khou rui guangmeipu na hei de.

⁴⁷Ai rui nangniw khou kaling siakna sa tuang e: Akhou lwmloupui mei khou tei ringcsuangmei nai the,

⁴⁸Ai hei ringhmei tyan e

⁴⁹Nangniw pupouc nunc tei tazikramv khou manna tu e, tiki theic ngam kan the.

⁵⁰Tingkauh thangc rui keymei tyan hei thu, tumei guay theic dat lak khe.

⁵¹Ai hei tingkauh thangc rui keymei ringhmei tyan kiu the. Mi tyan hei tumei kathuic tingsaeng ringc puni. Mbaanv maansei nac ringh khang ai rui tiimei tyan kiu thu apumc hei the.”

⁵²Khoutei Jihudimei nunc tei lungh puamcna kaniw nchamc agina, “Akumhna mi pu hei aniw tu khang kazanc tii ngam nina cho?” twna sa the.

⁵³Jisu rui kaniw khou sa the, “Ai rui nangniw khou kaling siakna sa tuang e: Nangniw meic Nac mpouh zanc tu mak ge thei khatni kazei zangv mak ge thei, nangniw ringh mak ge.

⁵⁴Azanc tupui mei khatni azei zangvpui mei kathuic khou ringcsuangmei nai the. Kumna nkhamhpui nungc ai rui kata tiringc thaulou puni.

⁵⁵Azanc khatni azei hei taektw taekzangv ling kiu the.

⁵⁶Azanc tupui mei khatni azei zangvpui mei kathuic tei akhou bam the khatni ai kakhou bam the.

⁵⁷Ringhmei tiiloumeipu Pu rui ata ndiulou the, kumna kapaan rui ai ni ringc e. Hei tei kumcna, ata tumei kathuic apaan rui ringc puni.

⁵⁸Tingkauh thangc rui keymei tyan kiu mi hei the; mi hei nangniw pupouc nunc tu laki theic kanmei tyan kumhmei tei hamh e. Mi tyan hei tupui mei tei thu tingsaeng ringc puni.”

⁵⁹Mi hei Jisu rui Kapharnahum tuang sinagog khou nchamlou khou saloupui lat re.

⁶⁰Hei tei chu la khou, kaziap mpeyna rui, “Kamei sa bammei hei kungc langv e. Thow rui mi kumhmei hei nking bam ngam nina cho?” twna sa the.

⁶¹Mi lam khou hei kaniw tanglum bam the twmei salou mak sini kalung khou thay lana, Jisu rui sa the, “Mi hei rui nangniw ta tiphaysuy thena cho?

⁶²Kum e thei, meic Nac Mpouh hei kamei keymei bamv thangc ku datmei ta nangniw how e thei, akumh puni tha?

⁶³Ringhmei tiiloumei hei Ravguangc Bumaengc rui e, maansei rui ramh sw ngam mak ge. Ai rui nangniw khou salou kanmei lat guay hei bumaengh e khatni ringhmei e.

⁶⁴Tiki nangniw pang khou lwm makmei meic gaanvsaekc nai e.” (Lwm lak nimei thow thow cho khatni thow rui kata zuanctu puni cho twmei Jisu thaurey khou na rui thay the.)

⁶⁵“Apu rui tiguangmei hamhna meic gaanv khatna sini akhou guang ngam mak ge twna ai samei kiu mi zaeng rui the,” twna Jisu rui sa the.

⁶⁶Mi khou tei rui, katuang ziap mpeyna hanc dat kan the, kumna kathei lay tat dat mak khe.

⁶⁷Khoutei, “Nangniw ni athei lay nii mak bu thah?” twna Jisu rui kaziap ruhna kanei khou tei sa the.

⁶⁸Khoutei Simon rui mundawna sa the, “Poubauhmei, aniw thow daeng thangc tat nina cho? Ringcsuangmei lat nang khou nai e twmei aniw thay e.

⁶⁹Nang hei Ravguangc khou rui guangmei Nthanmeipu e twmei aniw lwm the khatni thay the.”

⁷⁰“Ai rui nangniw gaanv ruhna kanei ta kapahlou the. Tiki nangniw pang khou gaanv khat thu ravsic de!” twna Jisu rui sa the.

⁷¹Mi hei Simon Iskariot nac Juda ta sa bam tuang e. Kalam thu, Juda kamei hei ziap ruhna kanei pang khou kazauh bam sini, kamei rui Jisu ta zuanctu puni tina e.