Read Rongmei Naga JAHON 8 Bible Online

JAHON 8 - Rongmei Naga bible

JAHON 8

¹[Tiki Jisu thu Olive Chyng thangc tat kan the.[17]

²Nthuanh thauna lauthwan thwanzingh, kamei Ravkai khou guang dat the. Kumna meic guayna kadaeng khou guang kaduai dat pwkhou, kamei dungc keyna kaniw khou nchamlou thau the.

³Khoutei lungcmaanv bam khou nymmei ntumei gaanv khat ta Riakdanv dinhpouc nunc khatni Pharisimei nunc rui zay guangna, meic pang la khou tidinglouna,

⁴Jisu khou sa the, “Dinhpouc, mi pui hei kamei nkhuaimei taanv taanc bammei dyng khou nym tuang the.

⁵Mousi tuang Riakdanv rui mi kumhmei ta thu ntauh kwamluai nina e, twna sa the. Nang thu tabui sa tu cho?”

⁶Mi hei kaniw Jisu khuay nym khang kata nchanvmei tuang e. Khoutei, Jisu nkhum keyna, kabaanczung rui kandih khou hy bam the.

⁷Kaniw rui thanv dat thanv dat bam ti khou, Jisu khuang thauna, “Nangniw pang khou paapc taanh makpui mei gaanv khat rui nkwam rey tho,” twna Jisu rui kaniw khou sa the.

⁸Khoutei kamei nkhum key datna, kabaanczung rui kandih khou hy bam dat muay the.

⁹Hei tei chu pwkhou, kaniw tei, gaanvdaih liangmei khou rui thauna, khat khat swna tat ngam kan the. Nkhamh khou, mi pui na tei ding bam duc the.

¹⁰Khoutei Jisu ngangc thauna, “Tanpuile, kaniw tabui thangc tat ngam kan tha? Nang ta nkhuaimeipui e twna sa dat nimei meic maek khah?” twna sa the.

¹¹“Maek khe, Haicpouc,” twna mi pui tei rui daw the. “Ai rui ni nang ta nkhuaimeipui e twna sa lak khe. Tat tho, paapc taanc dat ri tho,” twna Jisu rui kakhou kadylou the.]

¹²Jisu rui kaniw khou sa dat re, “Ai hei mbaanv khang gaanhmei e. Thow pw ni athei laypui mei tei kakhou ringhmei tuang gaanhmei nai puni, kumna kamei zinghmei khou tat dat ni tu hamh the.”

¹³Khoutei Pharisimei nunc rui Jisu khou, “Nang thu nang rana nang lam khou sa bam tuang de. Nang lat tei nchumh e twna laa khang maek ge,” twna sa the.

¹⁴Jisu rui mundawna sa the, “Alam khou hei ai rui sa bam sini, ai rui samei hei nchumhmei e. Kalam thu ai tabui thangc rui guang tu cho khatni tabui thangc tat bam tu cho twmei ai thay e. Ai tabui thangc rui guang tu cho khatni tabui thangc tat bam tu cho twmei nangniw thay mak ge.

¹⁵Nangniw rui maansei tuang latzan ramsu sw tina e. Ai thu meic gaanv khat na ta sini latzan sw mak ge.

¹⁶Tiki ai rui latzan sw e thei, atuang latzan thu nchumh puni. Kalam thu ai arana sw ni tuang hamh e; ata ndiu guangmei aPu lev sw ni tuang de.

¹⁷Gaanv nei rui samei tei nchamc e thei, kamei rui samei tei nchumh the, twna nangniw tuang Riakdanv khou hylou e.

¹⁸Ai rui alam khou sa the, khatni ata ndiu guangmei Apu rui ni alam khou sa the.”

¹⁹Khoutei, “Nang Pu kiu tabui thangc tei naina cho?” twna kaniw rui kakhou sa the. “Nangniw ata ni aPu ta ni thay mak ge. Nangniw ata thay khwan e thei, aPu ta ni thay ni tuang e.”

²⁰Jisu rui mi guay hei kamei rui Ravkai khou, puatkat khuk pang loumei bamv khou nchamlou khou sa tuang e. Tiki meic gaanv khat na rui sini kata nym mak ge. Kalam thu katuang ganv tangh mak he.

²¹Jisu rui kaniw khou sa dat re, “Ai tat kan puni, mi khou kiu nangniw ata phu puni, tiki nangniw paap khou nangniw theic puni. Ai tat nimei bamv thangc tei nangniw guang ngam ni tu hamh e.”

²²Khoutei, “Kamei tat nimei bamv thangc tei aniu guang ngam ni tu hamh e twna kamei rui sa bammei hei, kamei karana kata swluai ni tw lana cho?” twna Jihudimei kapy nunc rui sa the.

²³Jisu rui kaniw khou sa the, “Nangniw thu mbaanv khou rui e, ai thu kauh thangc rui e. Nangniw thu mi mbaanv tuang e, ai thu mi mbaanv tuang hamh e.

²⁴Hei zaeng rui, nangniw hei nangniw paap khou theic puni twna ai sa tuang e. ‘Ai hei Ai kiu the’ twna lwm mak ge thei, nangniw hei nangniw paap khou theic puni.”

²⁵“Nang thow cho?” twna kaniw rui Jisu khou thanv the. Khoutei Jisu rui daw the, “Thaurey khou na rui ai rui nangniw khou salou kanmei tei the.[18]

²⁶Ai nangniw lam khou sa khang khatni nangniw ta latzan sw khang mpeyna nai e. Tiki ata ndiu guangmeipu hei thu nchumhmei e, kumna kakhou rui chumei tei ai rui mbaanv khou dinc kadai bammei tuang e.”

²⁷Mi kumcna Jisu rui kaPu lam khou, kaniw khou sa bammei tei kaniw kabah thay mak khwan e.

²⁸Kum tina, Jisu rui kaniw khou sa the, “Nangniw rui Meic Nac Mpouh ta thaengcthau pwkhou, Ai hei kamei kiu the, twmei nangniw thay puni. Mi khou kiu ai arana anyng swna ramhkhat sini taanh mak ge, tiki aPu rui sa o twmei tei sa kadai bammei tuang de twmei, nangniw thay puni.

²⁹Ata ndiu guangmeipu tei ai lev tat nchamc bam e. Kamei arana ta mpatlou mak ge. Kalam thu ai kaganv kathuic kamei rui ningmei taanc bam e.”

³⁰Jisu rui mi guay hei sa pwkhou, meic mpeyna lwmlou the.

³¹Jisu rui kakhou lwmloumei nunc khou sa the, “Ai rui dincloumei hei nangniw piu bam e thei, nangniw aziap ling the;

³²kumna nangniw nchumhmei tei thay puni. Kumna nchumhmei tei rui nangniw ta bangh khou rui tiduaklou puni.”

³³“Aniw thu Abraham kikta de, aniw mei gaanv khat na bangc sini sw mak ge. ‘Nangniw ta bangh khou rui tiduaklou puni,’ twna nang samei hei tabui kabac cho?” twna kaniw rui sa the.

³⁴Jisu rui kaniw khou sa the, “Ai rui nangniw khou kaling siakna sa tuang e: Paapc taanhpui mei tei paapc bangc e.

³⁵Bangh tei thu kaikhunhmei swna tingsaeng bam mak ge; kanac mpouh tei rui tingsaeng bam tuang de.

³⁶Kanac Mpouh hei rui nangniw ta tiduaklou e thei, nangniw duak changh puni.

³⁷Nangniw Abraham kikta e twmei ai thay e, tiki nangniw ata swluai khang sw bam e, kalam thu nangniw lung khou alat khang kabamv maek ge.

³⁸Apu khou rui ai howmei tei ai sa tuang e, tiki nangniw thu nangniw pu rui samei taanh tuang e.”

³⁹Khoutei kaniw rui mundawna, “Aniw pu thu Abraham de,” twna kakhou sa the. Jisu rui mundawna sa the, “Nangniw Abraham nac nunc e thei, kamei rui swmei tei kumcna sw ni tuang e.[19]

⁴⁰Tiki Ravguangc khou rui chumei tei dinc kadailoumeipu ata swluai khang nangniw sw bammei hei, Abraham thu mi hei kumcna sw mak ge. Nangniw pu rui sw kanmei tei nangniw sw bam tuang de.”

⁴¹“Aniw nkhahnanac nunc hamh e, akhat namei aniw pu kiu Ravguangc e,” twna kaniw rui sa the.

⁴²Khoutei Jisu rui kaniw khou sa the, “Ravguangc hei nangniw pu e thei, nangniw ata nzian ni tuang e. Kalam thu ai Ravguangc khou rui guang tuang e. Ai arana anyng swna guang tu hamh e; kamei rui ndiu guang tuang e.

⁴³Tabui sw tina ai samei hei nangniw kabah thay mak tu cho? Mi hei nangniw alat nking zih tina hamh nah cho?

⁴⁴Nangniw hei nangniw pu ravsic nac nunc e, kumna nangniw pu rui kahawmei tei nangniw taanc nii e. Thaurey khou na rui kamei thu meicdowmei de. Kumna kamei nchumhmei biak thangc ding zat mak ge. Kalam thu kakhou nchumhmei twmei hei maek ge. Kamei saraamhmei lat samei hei katuang lwnlung thei layna sa bammei tuang e. Kalam thu kamei hei saraamhmei e khatni saraamhmei guay pu e.

⁴⁵Tiki ai thu nchumhmei lat sa tina nangniw ata lwm mak ge.

⁴⁶Ata ‘nang paap kiu mi hei the,’ twna sa ngammei nangniw pang khou thow nai cho? Ai rui nchumhmei sa tina, nangniw tabui swna ata lwm mak tu cho?

⁴⁷Ravguangc mei guay thu Ravguangc lat nking puni. Nangniw hei thu Ravguangc mei hamh lapui zaeng rui, kalat nking mak khe.”

⁴⁸“Nang hei Samariamei e khatni nang khou ravsic gut the twna aniw rui samei hei nchumh mak nah cho?” twna kaniw rui sa the.

⁴⁹“Akhou ravsic bam mak ge, ai aPu ta chakhwang sw e, tiki nangniw thu ata chakhwang sw mak ge,” twna Jisu rui daw the.

⁵⁰“Ai thu arana ahym tidaih khang phu mak ge, tiki ahym tidaiclou khang swmei khatni akhang latzan swloumeipu gaanv khat nai e.

⁵¹Ai rui nangniw khou kaling siakna sa tuang e: Alat hei piupui mei tei theic dat lak khe.”

⁵²Kaniw rui Jisu khou sa the, “Nang khou ravsic gut the twmei aniw nthanna thay the. Abraham theic kan the, muhzwng guay ni theic kan the. ‘Thow pw ni alat piupui mei guay theic dat lak khe,’ twna nang rui sa bammei hei nang khou ravsic bam tina the.

⁵³Aniw pu Abraham theic kan the. Nang hei Abraham khang suangc daihmei e twna sa bam tu cho? Muhzwng guay ni theic kan the. Nang rana nang ta thow e twna ningna cho?”

⁵⁴Jisu rui daw the, “Ai rui arana ahym tidaih khang sw e thei, mi hym tei nsa de. Tiki nangniw rui, ‘Aniw Racguangc’ twna kawmeipu, aPu rui ahym tidaiclou tuang e.

⁵⁵Nangniw thu kata thay mak ge, tiki ai thu kata thay e. Ai kata thay mak ge twna ai sa e thei, ai ni nangniw kumcna saraamhmei sw puni the. Ai kata thay e, kumna ai kalat piu e.

⁵⁶Nangniw pu Abraham, ai guangmei ta how puni twna neihla bam khwan e; kamei hei tei howna neihla the.”

⁵⁷“Nang tingkwm riakngu sini tangh mak he ki, nang Abraham ta how thena cho?”[20] twna kaniw rui sa the.

⁵⁸“Ai rui nangniw khou kaling siakna sa tuang e: Abraham puanh mak khou rui ai nai bam tuang di the,” twna Jisu rui daw the.

⁵⁹Khoutei kata nkwam khang kaniw ntauh khuaic thau the, tiki Jisu nkamhna Ravkai khou tei rui tat pat kan the.