Read Rongmei Naga JAHON 9 Bible Online

JAHON 9 - Rongmei Naga bible

JAHON 9

¹Jisu tat ruan pat khou, kapui bungpuak khou rui kamik tiatmeipu gaanv khat ta how the.

²“Rabbi, mi pu hei kamik tiatna puanc patmei hei, thow paap zaeng rui cho? Kapaap zaeng rui ni, kapui kapu paap zaeng rui cho?” twna kaziap nunc rui Jisu khou thanv the.

³Khoutei Jisu rui daw the, “Mi hei kapaap zaeng rui ni hamh, kapui kapu paap zaeng rui ni hamh e. Mi hei kakhou rui Ravguangc ngamv ndauh khang e.

⁴Kalaanv saanv ata ndiu guangmeipu rui tiiloumei taanv aniu taanc nina e. Meic gaanv khat na sini taanv taanc dat nuh makpui ganv zingbangc guang puni.

⁵Ai mi mbaanv khou bam saanv, mbaanv khang gaanhmei kiu ai hei the.”

⁶Mi hei sa tang lana, Jisu kandih khou kateic nsuk keyna, hei tei rui bih kanuaicna, mi pu mik kanei khou tei paamvlou the.

⁷Kumna, “Nang Siloam Zeic thangc tei nang zaw phi tat tho,” twna kakhou sa the. (”Siloam” twmei kabac hei “ndiuloumei” twna e). mi pu tei tatna kazaw phi the, kumna kamik howna guang dat the.

⁸Khoutei kaigei kainingmei khatni kamei neytu bammei ta howloumei nunc rui, “mi pu hei dungcna neytu bammeipu tei hamh nah cho?” twna thanv the.

⁹Meic gaanvsaekc rui, “mi pu tei de,” twna sa the; tiki baihmei gaanvsaekc rui thu, “Kamei hamh e, luihmei tina de,” twna sa the. Khoutei mi pu tei rui, “Ai mi pu tei de,” twna sa the.

¹⁰“Kum e thei akumhna, nang mik how dat tu cho?” twna kaniw rui thanv the.

¹¹“Jisu twna kawmeipu rui bih kanuaicna amik khou paamvlouna Siloam zeic thangc azaw phi tat ro twna sa the. Kumna ai tatna phi the. Khoutei amik how dat the,” twna mi pu tei rui sa the.

¹²“Kamei tabui thangc bam bu cho?” twna kaniw rui thanv the. Khoutei, “Ai thay mak ge,” twna kamei rui daw the.

¹³Kamik tiatmei khou rui gay datmeipu ta tei, kaniw rui Pharisimei nunc daeng khou nduangh guang the.

¹⁴Jisu rui bih kanuaicna mi pu mik tei tihowlou datmei tei Sabbathneic khwan e.

¹⁵Kamei akumhna kamik how dat tu cho twmei Pharisimei nunc tei rui mi pu khou tei thanv dat khwan e. Khoutei, “Kamei rui amik khou bih paamvlouna, azaw phi tiki how dat the,” twna kamei rui daw the.

¹⁶“Mi pu hei Ravguangc khou rui guangpui mei hamh e, kalam thu kamei Sabbathneic ngaek mak ge,” twna Pharisimei gaanvsaekc rui sa the. Tiki meic baihmei gaanvsaekc rui, “Akumhna paapcmei khat rui mi kumhmei sw-nchinmei taanv hei taanc ngam nina cho?” twna sa the. Mi kumcna kaniw pang khou kalangv pat the.

¹⁷Khoutei Pharisimei nunc rui mi pu khou tei, “Nang mik tihowlou datmeipu ta kiu, nang thow e twna sa tu cho?” twna thanv ti khou, “Kamei muhzwng khat re,” twna daw the.

¹⁸Khoutei Jihudimei kapy nunc tei mi pu tei kamik tiatmei khou rui how datmei tuang e twmei lwm mak khe. Kumna kapui kapu ta kaw guangna,

¹⁹“mi pu hei nangney nac cho? Kamei kamik tiatna puanc pat tu cho? Akumh tina ntaw kamei how dat tu cho?” twna kaney khou thanv the.

²⁰Kapui kapu rui daw the, “Kamei aney nac e, kumna kamei kamik tiatna puanc patmeipu the.

²¹Tiki akumh tina kamei how dat tu cho, hamh e thei thow rui tigaylou dat tu cho twmei aney thay mak ge. Kakhou thanv ti tho. Kamei alauc hamh the. Kamei daw ngam puni the cho!”

²²Kapui kapu rui mi hei samei thu kaney Jihudimei kapy nunc ta ping lana e. Kalam thu Jisu hei Khrista e twmei lwmpui mei ta tei thu sinagog khou rui alay ganc puni twmei tuang nai tina e.

²³Kum tina, “Kamei alauc hamh the, kakhou thanv ti tho!” twna kaney sa tuang e.

²⁴Kamik tiatna puanc patmeipu ta tei, kaniw rui luan neimei swna kaw dat lana, “Nang latling sa ni twmei Ravguangc hu khou latryan sw o! Nang ta tigayloumeipu hei paapcmei de twmei aniu thay e!” twna sa the.

²⁵“Kamei paapcmei e, paapcmei hamh e twmei ai thay mak ge; tiki ai amik tiat bam khwan e, tiki ntaw thu how dat the twmei thu ai thay e,” twna kamei rui daw the.

²⁶“Kamei rui nang khou tabui tuang swlou bu cho? Tabui kumhna kamei rui nang mik tiraklou tu cho?” twna kaniw rui thanv the.

²⁷Khoutei kamei rui daw the, “Ai nangniw khou raclou kan the, tiki nangniw nkinglou mak ge. Tabui khang nangniw nking dat nii hena cho? Nangniw ni kaziap sw nii thena cho?”

²⁸Khoutei kaniw rui kata mphutna sa the, “Nang the, mi pu tuang ziap kiu. Aniw thu Mousi ziap de.

²⁹Mousi khou thu Ravguangc rui lat salou e twmei aniw thay e; mi pu ta kiu thu, kamei tabui thangc rui guang tu cho twmei sini thay mak ge.”

³⁰Mi pu tei rui mundawna sa the, “Mi hei kadath datpui tuang e! Kamei tabui thangc rui guang tu cho twmei nangniw thay mak ge, tiki kamei rui amik tiatmei tigaylou dat the!

³¹Ravguangc thu paapcmei nunc lat chulou mak ge twmei aniu thay e. Kata chakhwang swmei khatni kamei rui ningmei taanhmei nunc lat rui chulou tuang de.

³²Kapui bungpuak khou rui kamik tiatna puanc patmei ta tihowlou dat kan e twmei mbaanv nai thau rap khou rui chu mak he.

³³Mi pu hei Ravguangc khou rui guangpui mei hamh e thei, kamei khat sini mi hei taanc ngam ni tu hamh e.”

³⁴“Paapcmei swna puanc patmei nang kumhmei rui aniw ta ncham khang sw bam tu cho?” twna kaniw rui luh the. Kumna kaniw rui kata sinagog khou rui nthau pat the.

³⁵Mi pu ta tei nthau patlou the twmei Jisu chu the, kumna kata ariw pwkhou, “Nang Meic Nac Mpouh khou lwmlou thah?” twna thanv the.

³⁶“Kaipouc, ai kakhou lwmlou khang, kamei thow cho twmei dinclou o,” twna mi pu tei rui daw the.

³⁷“Nang kata how the, kamei kiu ntaw nang ta kachuc bammeipu hei the,” twna Jisu rui kakhou sa the.

³⁸“Ai lwm the, Kaipouc!” twna mi pu tei rui sa the. Kumna kata kalum the.

³⁹Khoutei Jisu rui sa the, “Mik tiatmei nunc how khang khatni howmei nunc mik tiat khang latzan sw khang ai mi mbaanv khou guang e.”

⁴⁰Kadaeng khou bammei Pharisimei nunc rui hei tei chu la khou, “Aniw ni mik tiatmei nah cho?” twna sa the.

⁴¹Khoutei Jisu rui daw the, “Nangniw mik tiat khwan e thei, nangniw paapc nai lak ni tuang e; tiki nangniw how de twna ningpui zaeng rui nangniw paap nai bam e.”