Read Rongmei Naga LATDIUTATMEI 1 Bible Online

LATDIUTATMEI 1 - Rongmei Naga bible

LATDIUTATMEI 1

¹He Theophilas, Jisu kamei kataanv taanc thau rap khou rui thauna kata laa thau dat makmei dak khou, kamei rui taanclou kanmei khatni dinclou kanmei guay tei, atuang reymei latrik khou tei hylou kan the. Kata laathau makmei hu khou katuang latdiutatmei nunc khang kapahloumei nunc khou kamei rui, Bumaengh Nthanmei paan rui latdanv tiilou khwan e.

³Kamei theihmei tangv zaeng riakdei lungc khou kata kaniw khou lyanlouna, kamei ringc bam de twmei nthanna tithaylou khwan e; kumna kaniw khou Ravguangc guangcdic lam salou khwan e.

⁴Kaniw guang kaduai bam khou,[1] Jisu rui kaniw khou mi kumcna kadylou khwan e: “Nangniw Jerusalem khou rui tat pat riu; ai rui nangniw khou salou kanmei, aPu kamei rui tii puni twna saloumei kaipat ta tei nkhwan bam o.

⁵Jahon rui, dui rui duiluplou the; tiki asaanh makmei lungc khou, nangniw ta Bumaengh Nthanmei rui luplou puni.”

⁶Kumna kaniw guang kariupui ganv khou, kaniw rui, “Poubauhmei, mi ganv khou kiu Isarael guangcdic tii guanglou dat puni the cho?” twna latdiutatmei nunc rui Jisu khou thanv khwan e.

⁷Khoutei Jisu rui kaniw khou sa the, “Mi kumhmei Pu karana rui dinglou kanmei kakwm kaganv tei nangniw thay khang hamh e.

⁸Tiki nangniw khou Bumaengh Nthanmei guanglou pwkhou, nangniw pumtan laatow puni; mi ganv khou kiu, Jerusalem khou, Judia lev Samaria kapwm khou, khatni kandih tin tou nganvna, nangniw alam khou dinh khang e.”

⁹Mi hei salou tang pwkhou, kaniw hu khou rui kata laa thau kan the; kumna muangh rui kata laathau kan the.

¹⁰Kata laaku kanmei ta tei, ngangcna phaengc bam khou, phey mphwanmei piumei gaanv nei kaniw daeng khou ding bam khwan e.

¹¹Kaney rui sa the, “Galilimeiputhiu, tabui swna nangniw mi khou hei dingna tingpuk thangc phaengc bam tu cho? Nangniw khou rui tingkauh thangc laa thau kanmeipu Jisu hei, kamei tingkauh tat kanmei ta nangniw howmei hei kumcna, kamei key dat puni.”

¹²Mi tangv tei, latdiutatmei nunc tei, Jerusalem khou rui Sabbathneic chaengdak saan na khou naimei, Olive Chyng khou rui mi kaidai khou tei guang dat the.

¹³Kaniw kaidai khou tei gutna, kaniw bammei bamv kaikauh khou tei ku dat the. Kaniw kiu: Pitar, Jahon, Jakob, Andriu, Philip, Thomas, Bartholomiu, Metthiu, Alphia nac Jakob, Simon Zealot, khatni Jakob nac Juda, mi nunc hei e.

¹⁴Kaniw tei ntumei nunc, Jisu pui Meri khatni Jisu kainac nunc lev lungh khat na swna huayney bam khwan e.

¹⁵Mi ganv khou tei, lwmloumei nunc meic phay khat nchuih dou guang kachunc bam khou, Pitar dingthauna sa the,

¹⁶“Achanathiu, Jisu ta nymmei nunc ta chaengzaymeipu Juda lam khou Bumaengh Nthanmei paan rui David rui dinc kasuakcloumei nthanmei latrik khou hyloumei tei guang tangc ni tina di the.

¹⁷Kamei ni aniu pang khou kazauhna mi siamruai taanv khou hei kazauhlou khwan e.”

¹⁸(Katuang simei taanv khou rui laa guangmei syan tei rui liuloumei laupuk khou tei, kamei taek keyna theiclou the. Kamei kabung siauc phakna karei pat ngam khwan e.

¹⁹Jerusalem khou bammei guay mi chamv tei chu the; kumna kaniw rui mi ramvphung ta tei Akeldama, twmei thu “Zei Ramvphung” twna kaw the.)

²⁰“Kalam thu, ‘Kakai khou tei meic lungc taan kan di tho; mi khou tei meic lungh mak kan di tho.’ ‘Meic baihmei rui kataanv bamv taanc lyn kan di tho,’ twna Kalumlu khou hylou e.

²¹“Hei zaeng rui, Jahon rui duiluplou khou tei rui thauna,[2] Jisu ta tingkauh thangc laa thau dat kanmei nganvna, aniu lev Jisu thei tat nchamcloumei gaanv khat, kaipouc Jisu ringcthau datmei lam khou dinh khang, aniu pang khou kazauh nina the.”

²³Kumna kaniw rui Barsabbas kawmei (Jasta twna ni kawmei) Josep lev Mathia ta kadah patna,

²⁴“Meic guayna lungning thay ngammeipu Poubauhmei, kamei bam nimei bamv thangc tat kanmei Juda phaan latdiutatmei swna taanc lyn khang, mi nei kak khou hei thow ta nang rui kadahlou tu cho, aniw khou lyanlou o,” twna kaniw huayney the.

²⁶Khoutei kaniw kaney khang san zauc the; kumna Mathia san khou pat the. Kumna kata ziap ruhna akhat pang khou haaplou the.