Read Rongmei Naga LATDIUTATMEI 11 Bible Online

LATDIUTATMEI 11 - Rongmei Naga bible

LATDIUTATMEI 11

¹Zentelmei nunc ni Ravguangc lat laalou the twmei latdiutatmei nunc khatni Judia khou bammei lwmmei guay chu the.

²Pitar Jerusalem khou guang dat pwkhou, Zentelmei guay ni gihruamc nina de twna samei nunc rui kata nuh makna,

³“Tabui swna nang gihruamh makmei nunc kai khou bangvna kaniw lev tu zangv kariu tat tu cho,” twna sa the.

⁴Khoutei Pitar rui pat kanmei guay tei kadwan swna mi kumcna raclou the:

⁵“Ai Joppa kaidai khou huayney bam khou, ndawman akhat how khwan e. Phey paek daihmei kumhmei akhat katin padeih biancna tingkauh thangc rui mpat keymei ta how the, kumna hei tei adaeng khou keylou the.

⁶Ai hei tei zauc diangc pw ki, mi khou tei kai khouringc, nwmbangc khouringc, tuicna tatmei khouringc, khatni nruayna mpeyna how the.

⁷Khoutei, ‘Pitar, thauna swluai tu tho!’ twna khwan akhat rui samei ai chu the.

⁸Tiki, ‘Ai tu lak ge, Poubauhmei! Nthan makmei puat ai amwang khou phalou zat mak ge,’ twna ai rui daw the.

⁹‘Ravguangc rui nthan the twna samei tei nang rui nthan mak ge twna ning dat ri tho,’ twna mi khwan tei rui tingkauh thangc rui sa key dat re.

¹⁰Mi hei kumcna lyanlou kathumh e, kumna tingkauh thangc zay ku dat kan the.

¹¹Mi ganv khou tei ata kaw khang Kaisaria thangc rui ndiu guangmei gaanv thumh ai[14] bammei kai khou tei guang the.

¹²Rouh tuang maekna kaniw thei lay tat ro twna Bumaengh rui akhou sa the. Mi chana gaanv charuk ti hei Joppa khou rui nduanghna Kaisaria thangc tat the, kumna aniw Kornelias kai khou gut the.

¹³Tingkauh baanchara akhat kakai khou guangna, ‘Simon Pitar twna kawmeipu ta kaw khang Joppa thangc meic ndiulou tho.

¹⁴Nang khatni nang kai kaikhunc ta kanlou nimei lat nang khou kamei rui dinclou puni,’ twna saloumei pary kamei rui raclou the.

¹⁵Ai rui lat tei sa thau pwkhou, thau rey khou aniu khou keyloumei tei kumcna, kaniw khou Bumaengh Nthanmei keylou the.

¹⁶Khoutei, ‘Jahon rui dui rui duiluplou the; tiki nangniw ta Bumaengh Nthanmei rui luplou puni,’ twna Poubauhmei rui salou kanmei tei ai ningtow the.

¹⁷Aniu Poubauhmei Jisu Khrista khou lwmloupui ganv khou aniu khou tiilou kanmei kaipat tei Ravguangc rui mi Zentelmei nunc khou tei ni tiilou kan the. Kum e thei, Ravguangc ta sw nuh mak ge twna sa dat bam khang ai thowna cho?”

¹⁸Hei tei chu pwkhou, kaniw rey rey key kan the, kumna “Kum e thei Zentelmei nunc ni lungh laicna ringhmei laa khang Ravguangc rui tiilou bu di the!” twna sana Ravguangc ta thuanc the.

¹⁹Stephen ta swluaimei ganv khou rairiumei pat khou tei rui pak phak tat kanmei lwmmei nunc tei gaanvsaekc Phoinikia, Kupra khatni Antiokh nganv tat tangcna, Jihudimei nunc khou na lat tei dinclou the.

²⁰Tiki Kupra khatni Kurini khou rui guangmei nunc thu Antiokh thangc tatna, Zentelmei[15] nunc khou ni Poubauhmei Jisu tuang Gaychamv tei dinclou the.

²¹Poubauhmei tuang pumtan kaniw khou tiilouna meic mpeyna lwmlouna Poubauhmei khou guang the.

²²Mi chamv hei Jerusalem tuang phwamling khou chu guang tangc pw khou, kaniw rui Barnabas ta Antiokh thangc ndiulou the.

²³Kamei mi khou tei guang tangc pwkhou, Ravguangc rui kaniw ta akumhna suaihiamlou bam cho twmei tei how lana kamei neihla the. Kumna kaniw chalingc dingna Poubauhmei khou ntipna bam khang katiulou the.

²⁴Barnabas tei meicgaymei, Bumaengh Nthanmei khatni lwmmei padikmeipu e, kumna kamei rui meic mpeyna ta Poubauhmei khou phungc guang the.

²⁵Kumna Barnabas Saul ta phu khang Tarsas thangc tat the.

²⁶Kamei Saul ta ariwna, Antiokh khou nduangh guang the. Kaney tingkwm khumna phwamling kariuna meic kangdai ta nchamlou the. Mi Antiokh khou rui lwmmei nunc ta Khristian twna kaw rey kan the.

²⁷Mi ganv khou tei muhzwng gaanvsaekc Jerusalem khou rui Antiokh khou key khwan e.

²⁸Kaniw pang khou Agabas twmeipu rui dingthauna mbaanv kapwm khou ranv sihmei nap nkowmei guang puni twna Bumaengh paan rui dinc kasuakclou khwan e. (Hei tei Klaudia rui guanghdaihmei sw bammei douc pat kan the.)

²⁹Judia khou bammei lwmmei guay ta nkhav khang meic kathuicna, kamei kamei ngammei tii pat di kho twna ziap nunc tei dinglou the.

³⁰Kaniw hei tei laaguang kaduaina syan tei Barnabas lev Saul rui phwamling gaanthaic guay khou guang tiilou the.