Read Rongmei Naga LATDIUTATMEI 12 Bible Online

LATDIUTATMEI 12 - Rongmei Naga bible

LATDIUTATMEI 12

¹Mi ganv zaengc khou tei Guangh Herod[16] rui phwamlingmei gaanvsaekc ta rai thau khwan e.

²Kamei rui Jahon chana Jakob ta baengsaeng rui swluai khwan e.

³Hei tei rui Jihudimei guay ta tipianlou e twmei how lana, Pitar ta ni nym dat the. (Hei tei Khay Lou Makmei Ntyan Ngay lungc khou khwan e.)

⁴Pitar ta nymna kangkai khou lou the, kumna rihmei gaanv padeih padeih tuang kang padeih rui kata gaek khang tiilou the. Mi Kaanpatpui Ngai tei luai pwkhou rui kandihmei hu khou zay pat khang sw bam tuang e.

⁵Kumna Pitar ta kangkai khou lou bam khou tei, Phwamling rui kakhang Ravguangc khou lungh gutna huayney bam khwan e.

⁶Herod rui kata nthuanh thauna kandihmei khou zay pat nimei nungc zingbangc tei, Pitar tei rigaanv gaanv nei kak khou zip bam khwan e. Kata kangriang kanei rui bangclou khwan e khatni chaengmun khou rigaanv bam khwan e.

⁷Khoutei Poubauhmei tuang baanchara thay mak liangna guang ding the, kumna kainung tei gaanc the. Kauh baanchara tei rui Pitar ta kanaek khou hiwna, “Thau tho! Katumc tho!” twna nchyang thau the. Mi dyng khou tei Pitar baanc khou naimei kangriang tei kathyng key kan the.

⁸Khoutei, “Nang phey sianlangv langv tho kumna nang tuang phaythuapc tuangc tho,” twna kauh baanchara tei rui sa the. Pitar hei tei sw the. “Nang tuang pheychuanh nuna athei lay tho,” twna kauh baanchara tei rui sa the.

⁹Pitar hei tei ndaw ni, ndawman ni thay makna kauh baanchara thei tei kangkai paengc khou lay pat the. Kamei thu ndawman lana khuang the twna ning the.

¹⁰Kaney rigaanv bamv reymei kaan pat the; kaneimei ni kaan pat the, kumna chaengdai khou pat rap nimei nkhamhmei ntanh kaikhamv chaengmun khou pat the. Mi kaikhamv tei kaney khang karana laanclouna kaney tat pat the. Kaney kaidai chaeng khou tei tat key pwkhou, thay mak liangna kauh baanchara tei maan kan the.

¹¹Pitar tei kabah thay pat dat pwkhou, “Mi hei ndaw di the twmei thay the! Kauh baanchara rui ata Herod baanc khou rui khatni Jihudimei nunc rui tiswlou nimei khou rui ata kan patloupui tuang di the,” twna sa the.

¹²Kamei hei tei thay nthan la khou, meic mpeyna guang kaduaina huayney bampui bamv, Jahon Mark pui Meri kai thangc tat the.

¹³Pitar rui kaizaeng kaikhamv nchow tina thow cho twna Rhoda twna kawmei bangh tunacpui pat the.

¹⁴Hei tei Pitar khwan e twmei thay lana, kamei neihla langvna, kaikhamv laanclou makna pak gut datna, kaizaeng khou Pitar ding bam the twna salou the.

¹⁵“Nang mba lana di the,” twna kaniw rui sa the. Kaling de twna kamei rui sa ranvna sa ti khou, “Katuang baanchara de,” twna kaniw rui sa the.

¹⁶Kum bam khou tei, Pitar tei kaikhamv nchow dat dat bam ti thena kaikhamv tei laanc pat pwkhou kaniw Pitar ta how lana ngak the.

¹⁷Rimh rim keylou o twna kabaanc rui kabeylouna, akumhna Poubauhmei rui kata kangkai khou rui laa patlou tu cho twmei kamei rui kaniw khou raclou the. “Mi hei Jakob khatni lwmmei nunc baih baihmei khou tei ni dinclou ti tho,” twna salou lana kamei kabamv baih thangc tat kan the.

¹⁸Tinggaanc pat pwkhou, Pitar tei tabui sw kan lana the cho twna rigaanv nunc pang khou tei katuakc katit thau the.

¹⁹Herod rui kata tiphu the; tiki kaniw phu tow mak khe. Kamei rui rigaanv nunc ta tei lat thanv lana kaniw ta swluai khang latdanv pat kan the. Mi tangv tei Herod Judia khou rui tat dat lana Kaisaria khou bam kanaklou khwan e.

²⁰Herod tei Tur khatni Sidonmei nunc ta kalung puamc dai puamc bam khwan e. Kum tina kaniw kariuna Herod ta ariw khang guang khwan e. Guanghkai khou kapyswmei Blasta ta rac kimlou rey lana, kaniw Herod daeng khou guangna chuzaengh khang huaycha the. Kalam thu kaniw kandic hei tu zangv khang Herod tuang kandic khou rui laa bam lana e.

²¹Dingloumei tingmik nungc, Herod tei guanghpwan piuna, guangh bamvpaeng khou dungc the, kumna meic nunc khou pary rac the.

²²Khoutei, “Rav khwan di the; maansei khwan hamh the!” twna kaniw rui kauc the.

²³Kadyng khou Poubauhmei tuang baanchara rui Herod ta bailuai the; kalam thu kamei Ravguangc ta chakhwang sw mak khe. Kata nchi rui tuluai kan the.

²⁴Mi khou tei Ravguangc lat dinc lik pat the khatni nbu thau the.

²⁵Barnabas lev Jahon tei kaney taanv luailou lana, Jahon Mark ta nduanghna Jerusalem thangc rui guang dat the.[17]