Read Rongmei Naga LATDIUTATMEI 14 Bible Online

LATDIUTATMEI 14 - Rongmei Naga bible

LATDIUTATMEI 14

¹Ikonium khou ni Paul lev Barnabas sinagog khou tatna pary raclou pui ganv khou, Jihudimei khatni Zentelmei meic mpeyna lwmlou the.

²Tiki lwmlou makmei Jihudimei nunc rui Zentelmei ta kathuatc thaulouna lwmmei nunc ta tizauczihlou the.

³Kaney mi khou tei bam saengc sihlouna, baucna Poubauhmei lam khou dinclou the, kumna Poubauhmei rui kaney khou charynmei khatni sw-nchinmei taanv taanh khang pumtan tiilouna kaney rui katuang zauzian lam khou dinc bammei tei kalingmei e twmei lyanlou the.

⁴Mi kaidai mei nunc tei kalangv kanei patna, gaanvsaekc rui Jihudimei biak, khatni gaanvsaekc rui latdiutatmei nunc biak liangc the.

⁵Khoutei Zentelmei khatni Jihudimei, kaniw tuang kapy nunc lev lungh chamcna, latdiutatmei nei ta tei sw kasic khang khatni ntauh kwam khang dinglou the.

⁶Hei tei latdiutatmei nei tei thay lana, Lukaunia ramv tuang Lustra khatni Darbi khatni mi daeng anamei bamv guay thangc tat the.

⁷Mi bamv khou tei kaney Gaychamv dinclou the.

⁸Kapui bungpuak khou rui katan chuanchayna puanhmei, kapanty khou tat zat makmeipu Lustra khou nai khwan e.

⁹Kamei ni Paul lat tei nking bam khwan e. Paul rui kata zauc pw khou, tigaylou puni twmei lwmmei nai the twmei how lana kata zaucna,

¹⁰“Dingthau tho,” twna kauc ranvna sa the. Mi pu tei kachakc thauna tat thau the.

¹¹Paul rui taancloumei tei how lana, meic kangdai tei Lukauniamei lat rui, “Rav nei tei maansei swna key the!” twna kauc the.

¹²Kumna kaniw rui Barnabas ta Dia the khatni Paul ta, kamei lat samei khou kapy sw tina Harma the twna sa the.

¹³Dia rav tuang ravkai mi kaidai paengc khou na tei nai khwan e. Kumna mi tuang amuc khatni meic nunc tei rui latdiutatmei nei khang tei khaenglou ni the twna guaituamchic nunc khatni mwntuc raenghmun daeng khou tei laaguang the.

¹⁴Mi kumna kaniw rui sw bammei tei chu lana, Barnabas lev Paul tei kaney phey siatna, meic kangdai la khou tei pak gutna kaucna sa the,

¹⁵“Meic nuncthiu, tabui swna nangniw mi kumna sw bam tu cho? Aney ni nangniw kumhmei maansei de. Aney guangmei thu mi kumhmei gaeng makmei ravmaengc khou rui tingpuk, kandih, duipui khatni mi guay khou naimei guay damcloumeipu ringhmei Racguangc khou ngalanc guang khang Gaychamv dinclou khang de.

¹⁶Tat kanmei ganv khou tei thu meic nunc ta kaniw rui ningmei thei layna tat khang kamei rui nuhlou khwan e.

¹⁷Tiki kamei rui gaymei taanv taanclouna kamei thow cho twmei lyanlou e— kamei rui nangniw khang tingpuk thangc rui ting tiilou e kumna nap bi kakwm kaganv khou tiilou e. Kamei rui nangniw khang taektw tiilouna nangniw lung tineihlalou e.”

¹⁸Mi lat hei sana latdiutatmei nei tei kaniw ta mi kumna khaengna kalum mak khang ranv sihna khaam keylou the.

¹⁹Pisidia tuang Antiokh khatni Ikonium khou rui guangmei Jihudimei nunc rui meic kangdai ta tei kaniw biak thangc zay lana, Paul ta ntauh kwamna, theic the twna kaidai paengc thangc zay patlou the.

²⁰Tiki lwmmei nunc tei kadaeng khou guang kaduai bam dat pwkhou, kamei thau datna kaidai khou tei gut dat the. Nthuanh thau datna kamei Barnabas lev Darbi thangc tat the.

²¹Paul lev Barnabas Darbi khou Gaychamv dinclouna ziap mpeyna kasiamhlou the. Mi khou tei rui Lustra, Ikonium khatni Pisidia tuang Antiokh khou guanglou dat the.

²²Kaney rui ziap nunc ta tei lwmmei khou titanclou the khatni lwmmei khou ntipna bam khang katiulou the. “Ryanramei azuh tat ruanna aniu Ravguangc Guangcdic gut nina e,” twna kaney rui katiulou the.

²³Phwamling kathuic khou gaanvthaih nunc kapahlouna, munthiangcna huayneyna kaniw ta kaniw rui lwmloumei Poubauhmei khou nsinlou the.

²⁴Pisidia ramv tat ruan keyna, kaney Pamphulia ramv khou guang dat the.

²⁵Mi khou tei kaney Parga khou chamv dinclou the, kumna Attalia thangc tat the.

²⁶Mi khou tei rui kaney, ntaw kaney taanc suakna guangmei taanv dwan khang hei Ravguangc zauzian khou kaney ta tiiloumei bamv Antiokh khou tei rungh tuangcna guang dat the.

²⁷Kaney Antiokh khou guang tangc pwkhou, phwamlingmei guay guang kaduaina, Ravguangc rui kaney khou taancloumei guay raclouna khatni Zentelmei guay khang ni lwmlou khang kaikhamv laanclou the twna raclou the.

²⁸Kumna kaney mi khou tei ziap guay tei lev tingsaengc sihna bamlou the.