Read Rongmei Naga LATDIUTATMEI 15 Bible Online

LATDIUTATMEI 15 - Rongmei Naga bible

LATDIUTATMEI 15

¹Meic gaanvsaekc Judia thangc rui Antiokh khou keyna, “Mousi tuang Riakdanv khou saloumei kumcna nangniw ni gihruamh mak ge thei nangniw kanloumei laa ngam mak ge,” twna lwmmei guay khou nchamlou the.

²Paul lev Barnabas tei mi lam khou hei kaniw lev agi ranvna agi the, kumna Jerusalem thangc keyna latdiutatmei nunc khatni gaanvthaih nunc ta ariwna mi lam khou hei pary rac o twna Paul, Barnabas khatni meic baihmei gaanvsaekc ta ndiulou the.

³Kaniw ta phwamling rui ndiulou tina, kaniw Phonikia khatni Samaria tat ruan keyna, Zentelmei nunc rui Ravguangc khou guangmei pary tei kaniw khou ni raclou the. Mi chamv tei chu pwkhou lwmmei nunc tei mpeyna neihla the.

⁴Kaniw Jerusalem khou key pwkhou, kaniw ta phwamling, latdiutatmei nunc khatni gaanvthaih nunc rui laalou the, kumna kaney khou rui Ravguangc rui taanv taancloumei guay tei kaniw khou raclou the.

⁵Khoutei Pharisimei lwmmei nunc tei dingthauna, “Zentelmei nunc ni gihruamc nina de khatni kaniw ta ni Mousi tuang Riakdanv guay piu khang sa nina de,” twna sa the.

⁶Apostal nunc khatni gaanvthaih nunc mi latbamv tei kaphianh khang guang kaduai the.

⁷Mpeyna agimei tangv, Pitar dingthauna sa the, “Achanathiu, Zentelmei nunc ni chuna lwm khang kaniw khou Gaychamv dinclou khang thaurey khou rui Ravguangc rui ata nangniw pang khou rui kapahlou the twmei nangniw thay e.

⁸Aniu khou tiiloumei kumcna kaniw khou ni Bumaengh Nthanmei tiilou the. Hei tei rui meic katana lungning thaymei Racguangc kamei rui Zentelmei ta ni laalou the twmei lyanlou the.

⁹Kamei rui aniu ta baic, kaniw ta baic twmei tuang maek khe; kaniw lwm tina kaniw paap ni kuaklou the.

¹⁰Kum e thei, aniu pupouc nunc ni, aniu ni phungc tat ngam makmei puat tei ziap nunc nam khou mphunlouna tabui sw khang aniu Ravguangc ta ntanv bam nina cho?

¹¹Kum nina hamh e! Kaniw ta kumcna aniu ta ni lwm pwkhou, Poubauhmei Jisu tuang zauzian paan rui kanlou the.”

¹²Kaney khou rui Ravguangc rui charynmei khatni sw-nchinmei taanv mpeyna Zentelmei pang khou taancloumei tei Barnabas lev Paul rui raclou pwkhou, kaniw meic guayna rimh rim key the.

¹³Kaney sa tang pwkhou, Jakob rui sa the, “Chanathiu, alat nkinglou o!

¹⁴Ravguangc rui Zentelmei nunc ta ni kamei khang kaw patna kaniw ta kamei rui zauclou bam e twmei kamei rui reyna lyanlou the twna Simon rui sa kan the.

¹⁵Muhzwng nunc rui saloumei kiu mi kahak hei the. “Nthanmei latrik rui sa e:

¹⁶‘Thei thangc ai guang dat puni, kumna bow kanmei David kai tei zay thaulou dat puni. Mi tangv kasic karouc kanmei guay tei duanc thaulou dat puni, kumna mi kai tei sw thaulou dat puni.

¹⁷Mi khou kiu meic baihmei guay, amei khang kawloumei Zentelmei guay Poubauhmei ta phu puni,

¹⁸twna theidouc rui mi lam guay hei tithay guangmei Poubauhmei rui sa e.’

¹⁹“Hei zaeng rui, atuang latzan thu: Ravguangc khou guangmei Zentelmei ti hei aniu sw katuakc dat bam lak nina the.

²⁰Kumna ravmaengc khang khaenglouna sw mphuammei zanc tu mak khang, ntu ngaanv lungcmaanv lungcmowmei taanv taanh mak khang, gayluaimei zanc khatni zei tu mak khang kaniw khang hyna ti di kho.

²¹Kalam thu Mousi tuang Riakdanv hei Sabbathneic pum kaniw tuang sinagog khou, reynungc rui pac guang tuang di the, kumna katuang lat guay hei kaidai kathuic khou dinclou kan tuang di the.”

²²Khoutei latdiutatmei nunc khatni gaanvthaih nunc tei phwamlingmei guay lev kariu lana kaniw pang khou rui meic gaanvsaekc kapah pat the, kumna Paul lev Barnabas thei Antiokh thangc ndiulou khang dinglou the. Kaniw rui kaniw pang khou rui kapyswmei gaanv nei—Barnabas kawmei Juda khatni Sila ta kapah patna,

²³mi tatdyn hei kaney ta tiphungc tat the: “Latdiutatmei nunc khatni gaanvthaih nunc, nangniw chana nunc aniw rui Antiokh, Suria khatni Kilikia khou bammei Zentelmei chana guay ta kalum e.

²⁴Aniw pang khou rui meic gaanvsaekc patna kaniw lat rui nangniw ta sw katuakclou the khatni nangniw lungning tikabiulou the twmei aniw chu the. Kaniw ta hei tei sa tat ro twna aniw ndiu mak ge.

²⁵Aniw guang kariuna mi lam khou tei kaphianh the, kumna meic gaanvsaekc nangniw khou ndiu guang khang dinglou the. Aniu Poubauhmei Jisu Khrista tuang taanv khang theic suh khang ping makmei, nzianmei Barnabas lev Paul thei ndiulou khang kaphianhlou the.

²⁷Kumna aniw rui Juda lev Sila ta ndiulou kan the. Kumna aniw rui hyloumei kahak hei kaney rui ni nangniw khou raclou puni the.

²⁸Mi sw mak nuh makmei mung asaekc na hei hamhna nangniw khou baihmei puatrith mphunlou makmei gay e twmei Bumaengh Nthanmei ni, aniw ni chwnmei the.

²⁹Mi kiu thu: ravmaengc khou khaengloumei puat tu riu; zei tu riu; gayluaimei zanc tu riu; khatni lungcmaanv lungcmowmei taanv taanh riu. Mi guay hei nangniw piu e thei, nangniw nthuih the. dwan gay kady e.”

³⁰Kaniw ta ndiulou tina kaniw Antiokh khou key the, kumna lwmmei guay ta kaw kaduaina mi tatdyn tei tiilou the.

³¹Hei tei pac pwkhou, kaniw ta katiu thauloumei lat khou tei meic nunc tei neihlamei rui padik the.

³²Juda khatni Sila tei kaniw khou tingsaengc sihna lat salouna katiulou the khatni kaniw ta titanclou the. Kaney hei ravmundinhmei nei khwan e.

³³Mi khou tei bam kanakloumei tangv, lwmmei guay tei kaney ta kady kanavna suanc patlou tina, kaney ta ndiuloumei nunc daeng thangc ngalanc guang dat kan the.

³⁴Tiki Sila thu mi khou tei bam kan ni the twna bam kan the.[22]

³⁵Paul lev Barnabas Antiokh khou bam kanaklouna, kaney khatni meic baihmei mpeyna ni kazauhna kaniw rui Poubauhmei lat nchamlou the khatni dinclou the.

³⁶Kanakmei tangv, “Anei Poubauhmei lat dinclou kanmei kadai guay khou tei tatlou datna chana guay tei akumh bam tu cho zauclou dat kho,” twna Paul rui Barnabas khou sa the.

³⁷Barnabas rui Jahon Mark ta kaney thei nduangh tat nii khwan e;

³⁸tiki kaniw chaenglwan tat suak makna Pamphulia khou rui ngalanc dat kanmei kata nduangh tat makmei gay de twna Paul rui thu ning the.

³⁹Kaney mi lam khou agi ranv sihna agi the, kumna kaney ntamv the. Barnabas Mark ta nduanghna rungh tuangcna Kupra thangc tat kan the.

⁴⁰Paul ni Sila ta nduanghna, chana guay rui kaney ta Poubauhmei tuang zauzian khou tiilouna tat kan the.

⁴¹Kamei Suria khatni Kilikia tat ruanna phwamling guay ta titanclou the.