Read Rongmei Naga LATDIUTATMEI 16 Bible Online

LATDIUTATMEI 16 - Rongmei Naga bible

LATDIUTATMEI 16

¹Paul Darbi khou rui Lustra khou guang the. Mi khou tei ziap gaanv khat kazanc Timothi twna kawmeipu nai khwan e. Kapui hei lwmloumei Jihudimei e, kumna kapu thu Grikmei e.

²Kamei hei Lustra khatni Ikonium khou bammei lwmmei guay rui sachuyna bammeipu e.

³Paul rui Timothi ta nduangh tat nii lana gihruamc the. Mi bamv guay khou tei bammei Jihudimei nunc rui kapu hei Grikmei e twmei thay tina mi hei swpui tuang e.

⁴Kaniw kaidai guay khou tatlouna, Jerusalem khou bammei latdiutatmei nunc khatni gaanvthaih nunc rui dinglou kanmei riak tei kaniw khou dinclou the, kumna mi guay tei piu khang dinclou the.

⁵Kumna phwamling guay ta tei lwmmei khou titanclou the, kumna tingmik kathuic lwmmei mei sing mbu thau the.

⁶Kaniw ta Asia kandih khou Gaychamv dinh khang Bumaengh Nthanmei rui nuhlou ti makna, kaniw Phrugia lev Galati ramv tat ruan pat the.

⁷Kaniw Musia ramv tangc pwkhou, Bithunia kandic thangc tat khang karamc the; tiki hei tei Jisu tuang Bumaengc rui nuhlou mak khe.

⁸Kum tina kaniw Musia tat kaan keyna,[23] Troa key the.

⁹Mi nungc zingbangc tei Paul ndawman akhat how the. Mi khou tei Makidoniameipu gaanv khat dingna, “Makidonia khou guangna aniw ta nkhavlou o!” twna sa the.

¹⁰Mi ndawman tei how pwkhou, aniw katumcna Makidonia thangc tat khang sw the; kalam thu mi khou bammei nunc khou tei Gaychamv dinclou khang Ravguangc rui aniw ta kaw the twna aniw laa the.

¹¹Aniw Troa khou rui rungh tuangcna, nzut phutna Samothraki duipuidic khou guang the, kumna nthuanh thauna Niapolis kaidai tangc the.

¹²Mi khou tei rui aniw Philippi kaidai khou guang the. Mi hei Makidonia kandic tuang kaidai daihmei[24] akhat re. Mi hei Rommei nunc bampui bamv akhat ni e. Aniw mi khou tei tingmik mpeyna bamlou e.

¹³Sabbathneic, raenghkat paengc thangc duibaek daeng khou, Jihudimei nunc huayneypui bamv nai khuangh e twna ningpui bamv khou aniw pat the. Aniw dungc keyna, mi khou tei guang kaduai bammei ntumei nunc khou pary raclou the.

¹⁴Aniw pary nkingmei nunc pang khou Thuatira kaidai khou rui guangmei, Ludia twna kawmei, haengc nrymmei phey zuanhmei gaanv khat bam khwan e. Mi pui hei Ravguangc ta kalummeipui e, kumna Paul rui samei tei lungh gutna nking khang Poubauhmei rui kalungning laanclou the.

¹⁵Kamei khatni kakai kaikhuncmei guay duilup tang pwkhou, “Ai hei Poubauhmei khou lwmlou changhpui mei di the twna nangniw rui laalou e thei, akai khou guang bangvlou o,” twna aniw ta kaw the. Kumna aniw tat the.

¹⁶Zaeng neih khat aniw huayneypui bamv thangc tat khang tat bam khou, kakhou ravsic gutna hei tei rui guang nimei ta dinc kasuakc bammei bangh tunacpui gaanv khat aniw ta ariw the. Kamei rui guang nimei ta khanlouna kakaipouc nunc khang syan mpeyna ntaanvpui chaeng sw bam khwan e.

¹⁷Kamei Paul lev aniw thei khou tatna, “Mi pu nunc hei Kauh Liangmei Racguangc bangc nunc e! Kaniw hei nangniw khou kanloumei chaeng dinclou bammei nunc e,” twna kauc the.

¹⁸Kamei mi hei kumcna tingmik mpeyna sw guang ti khou, nkhamh khou thu Paul kaningsumcna thei karih patna, “Mi pui khou rui tat pat khang ai rui nang khou Jisu Khrista zanc khou latdanv tii the!” twna mi pui khou bammei bumaengc khou tei sa the. Mi dyng khou tei mi bumaengc tei tat pat kan the.

¹⁹Mi pui tuang kaipouc nunc tei kaniw syan ntaanvpui chaeng maan the twmei how la khou, kaniw rui Paul lev Sila ta nymna sanghbamv khou baanhza nunc hu khou zay guang the.

²⁰Kaniw rui kaney ta Rommei ngamvsinmei nunc hu khou zay guangna sa the, “Mi pu nei hei Jihudimei e, kaney rui aniw kaidai khou guangna mpeyna sw katuakclou the.

²¹Aniw riak rui nuh makmei riak kaney rui dinc the. Aniw thu Rommei mei de; mi riak guay tei aniw laa nuh mak ge khatni tat nuh mak ge.”

²²Kumna meic kangdai guang kariuna, Paul lev Sila ta sw kasic khang sw the. Khoutei Paul lev Sila ta tei kaney tuang pheybaan siat kaek lana bai khang ngamvsinmei nunc tei rui latdanv pat the.

²³Bai kasiclou lana kangkai khou lou the, kumna so taan ntipna taanlou khang kangkai sinmeipu khou latdanv tiilou the.

²⁴Mi latdanv thei tei layna kangkai sinmeipu tei rui kaney ta kalungcmei kangkai khou gutlouna kaney phay khou kang lou the.

²⁵Zipchwng zaengc khou Paul lev Sila tei Ravguangc khou huayneyna lu suan bam khwan e, kumna baihmei kangmei guay tei kaney lu tei nking bam khwan e.

²⁶Thay mak liang khou baengla zay ranvna zay guang the. Hei tei rui kangkai kaibam tei kanuk the. Khoutei kaikhamv guay laanc pat the. Kumna kangmei nunc tuang kangriang guay kathyng key the.

²⁷Khoutei kangkai sinmeipu tei rak pat the, kumna kangkai kaikhamv guay laanclou bammei ta how lana, kangmei guay tei pak tat ngam kan di the twna ning the. Kumna kamei katuang baengsaeng sat patna karana kata swluai khang sw thau the.

²⁸Khoutei, “Nang rana nang ta swluai riu! Aniw mi khou hei bam ngam de!” twna Paul rui kauc ranvna kauc the.

²⁹Kangkai sinmeipu tei mairam neyna, pak gut the, kumna ping kadunhna Paul lev Sila hu khou pun nkhum laamv key the.

³⁰Khoutei kamei rui kaney ta nduangh patna, “Kaipouc neile, ata kanlou khang ai tabui sw nina cho?” twna sa the.

³¹“Poubauhmei Jisu khou lwmlou o, kum e thei nang ta ni, nang kai kaikhuncmei ta ni kanlou puni,” twna kaney rui daw the.

³²Khoutei kaney rui kakhou khatni kakai khou bammei guay khou Poubauhmei lam khou dinclou the.

³³Mi dyng khou tei kangkai sinmeipu tei rui kaney ta nduangh tatna, kaney tuang zam zei guay tei khiulou the. Kumna kadyng khou kamei khatni kakai kaikhuncmei guay tei duilup the.

³⁴Khoutei kamei rui Paul khatni Sila ta kakai khou nduangh kuna titu tizangvlou the. Kamei khatni kakai kaikhuncmei guay tei neihlamei padik the, kalam thu kaniw Ravguangc khou lwmlou the.

³⁵Nthuanh thauna, lauthwan Rommei ngamvsinmei nunc tei rui, “Mi pu nei ta tei mpatlou dat ti tho,” twna kangkai rigaanvpy nunc ta ndiu guang the.

³⁶Kumna kangkai sinmeipu tei rui Paul khou, “Sila nangney ta mpatlou dat ti tho twna ngamvsinmei nunc rui sa guang the. Kumna nangney tat patlou dat tho,” twna sa the.

³⁷Tiki Paul rui rigaanvpy nunc khou tei, “Aney khuay maek ge, tabui swna aney ta kaniw rui charuangc khou tibai tu cho? Aney Rommei dilungmei de! Kum lana kaniw rui aney ta kangkai khou lou the. Ntaw kaniw aney ta nkamhna ndiu ganc dat ni twna cho? Nuh mak ge! Kaniw kahak guangna aney ta laa pat dat kan diu,” twna sa the.

³⁸Rigaanvpy nunc tei rui mi lat hei ngamvsinmei nunc khou tei guang dinclou the. Kaney tei Rommei dilungmei de twmei thay pwkhou kaniw ping the.

³⁹Khoutei kaniw guangna kuaklou khang ney the, kumna kaney ta kangkai khou tei rui nduangh patna, mi kaidai khou tei rui tat patlou dat khang zaenghuay the.

⁴⁰Paul lev Sila tei kangkai khou rui patna, Ludia kai thangc tat the. Khoutei katiulou lana mi kaidai tei mpatlou the.