Read Rongmei Naga LATDIUTATMEI 18 Bible Online

LATDIUTATMEI 18 - Rongmei Naga bible

LATDIUTATMEI 18

¹Mi tangv hei, Paul Athen mpatlouna Korin thangc tat the.

²Mi khou tei Pontamei Akuila ta kamei ariw the. Jihudimei guay ta Rom khou rui tat pat khang guanghdaihmei Klaudia rui latdanv pat tina, kamei kanow Priskilla lev Itali thangc rui mi khou tei asaanh makmei hu khou guang bam khwan e. Kamei kaney ta ariw khang tat the.

³Kumna kaniw pheykai taanc thaymei nchamc lapui zaeng rui, Paul ni mi khou tei kaney lev bam kariuna taanc nchamc the.

⁴Kamei Sabbathneic pum sinagog khou kariuna Jihudimei ta ni Grikmei ta ni tikwmlou the.

⁵Sila lev Timothi Makidonia thangc rui guang dat pwkhou, Paul katuang ganv kapwm chamv dinhmei khou tii gutlouna, Khrista kiu Jisu hei the twmei Jihudimei khou dinclou the.

⁶Kaniw rui kata akhangvna sa kasicna sa ti khou, “Nangniw theic sini nangniw man di the; akhuay maek khe. Ntaw khou rui ai Zentelmei khang dinc tat kan ni the,” twna sana kaphey kakhuplou the.

⁷Kumna kamei kaniw ta mpatlouna, Tasangmeipu Tita Jasta kai thangc bam tat kan the. Mi pu hei Ravguangc ta kalummeipu e, kumna kakai sinagog daeng khou na nai khwan e.

⁸Sinagog tuang kapypu Krispa lev kakai kaikhunc Poubauhmei khou lwmlou the; khatni Korinmei meic mpeyna ni Paul lat tei chu lana lwm the, kumna duilup the.

⁹Zingbangc akhat Paul ndawman akhat how khwan e. Mi khou tei Poubauhmei rui kakhou, “Ping riu, lat hei dinc bam o, nthaekc riu;

¹⁰ai nang ta nduanghlou bam e. Nang ta meic gaanv khat na rui sini sw kasic ngam ni tu hamh e; mi kaidai khou hei amei mpeyna nai e.” twna sa the.

¹¹Kumna Paul mi khou tei tingkwm akhat kapaek bamlouna meic nunc khou Ravguangc lat dinclou the.

¹²Gallio rui Akhaia khou Rommei tuang guanghkhyn swpui ganv khou, Jihudimei nunc guang kariuna Paul ta nym the, kumna latzankai khou zay guang the.

¹³“Riakdanv rui nuh makmei khou meic nunc ta Ravguangc ta tikalum khang mi pu hei rui sw the!” twna kaniw rui sa the.

¹⁴Paul rui lat sa nina thau pwkhou, Gallio rui Jihudimei nunc khou sa the, “Mi hei nkhuai mbamei, hamh e thei taanvsic taanvrouc taancloupui tuang e thei, nangniw lev kaphianh nuh e.

¹⁵Tiki mi hei thu Jihudimei nangniw tuang lat lam khou, zanh lam khou khatni Riakdanv lam khou tuang dina, nangniw rana kaphianh tat ro. Mi kumhmei lam khou thu ai latzan sw khang hamh e.”

¹⁶Kumna kamei rui kaniw ta latzankai khou rui nthau pat the.

¹⁷Khoutei kaniw rui sinagog tuang kapypu Sostheni ta nymna latzankai kaimav khou tei bai the. Tiki mi ta tei Gallio nchyanlou mak ge.

¹⁸Paul lwmmei nunc lev Korin khou zaeng mpeyna bamloumei tangv, mi bamv tei mpatlouna Priskilla lev Akuila ta nduanghna rungh tuangcna Suria thangc tat the. Rungh tuangc thau mak khou, Kenkhria kaidai khou kapy guat the,[25] kalam thu kamei latryan swlou khwan e.

¹⁹Kaniw Ephisi kaidai guang tangc the. Mi khou tei Priskilla lev Akuila bam duc kan the. Ephisi khou tei Paul sinagog thangc tatna Jihudimei nunc lev pary rac the.

²⁰Kata bam kanaklou o twna meic nunc tei rui sa the; tiki kamei bamlou mak khe.

²¹“Ravguangc rui ningmei e thei, ai guang dat puni,” twna kadylou ducna Ephisi khou rui rungh tuangcna tat dat the.

²²Kamei Kaisaria guang tangc pwkhou, Jerusalem thangc tatna phwamlingmei guay ta ariwlouna, Antiokh thangc tat the.

²³Kamei mi khou tei bam kanaklou lana, tat thau datna Galati khatni Phrugia ramv khou tat ruanlouna lwmmei guay ta su-ntiplou the.

²⁴Mi ganv khou tei, Alekzandria kaidai khou puanhmei Jihudimei Apollo twna kawmeipu Ephisi khou guang khwan e. Kamei hei lat sathaymei khatni Nthanmei Latrik thay chuyna thaymeipu khwan e.

²⁵Kakhou Poubauhmei tuang Chaeng tei dinclou the, kumna kamei lungh gutna Jisu tuang pary kaling dinc the khatni nchamlou the. Tiki kamei Jahon tuang duilupmei na tei thay khwan e.

²⁶Kamei baucna sinagog khou ni rac tat the. Priskilla lev Akuila kalat tei chu lana kata kaney kai khou nduangh guangna Ravguangc tuang Chaeng lam khou dinc ntwn chuylouna dinclou the.

²⁷Apollo tei Akhaia thangc tat nii the, kum tina Ephisimei lwmmei nunc rui kata katiulouna, kata laalou khang Akhaia khou bammei lwmmei nunc khou tatdyn hylou the. Kamei guang tangc lana, Ravguangc zauzian paan rui lwmmei nunc ta tei mpeyna nkhavlou the.

²⁸Kalam thu Jisu hei Khrista e twmei Nthanmei Latrik khou rui dincna Jihudimei nunc ta charuangc mav khou agi ngamlou the.