Read Rongmei Naga LATDIUTATMEI 2 Bible Online

LATDIUTATMEI 2 - Rongmei Naga bible

LATDIUTATMEI 2

¹Pentikost tingmik tangc pwkhou, kaniw kabamv akhat khou guang kaduai bam khwan e.

²Khoutei thay mak liangna, tingpuk thangc rui puanzingh ranvmei khwan kumcna khwan akhat keyna, hei tei rui kaniw dungc bammei bamv kapwm tei padik the.

³Khoutei baley kumhmei maibwang kumhmei pang how the; kumna mi guay tei phak patna kaniw kathuic khou towlou the.

⁴Kaniw guayna Bumaengh Nthanmei rui padik the; kumna Bumaengh tei rui tisalou tina, kaniw lat baih baihmei sa thau the.

⁵Kandih baih baih thangc rui guangmei ravning nthukmei Jihudimei meic mpeyna Jerusalem khou lungc bam khwan e.

⁶Mi khwan tei chu lana, kaniw meic kangdai guang kaduai the. Kumna mi khou tei kaniw rui sa bammei lat guay tei kaniw khang kalat kalat khou chu pwkhou, kaniw ngak the.

⁷Kaniw khang ngakna sa the, “Mi khou lat sa bammei nunc hei Galilimei nunc hamh nah cho?

⁸Akumh tina kaniw rui sa bammei lat hei aniu kathuic karamc karamcmei lat khou chu bam tu cho?

⁹Aniu hei Parthia, Media, Elam, Mesopotamia, Judia, Kapadokia, Ponta, Asia,

¹⁰Phrugia, Pamphulia, Izip khatni Kurini daeng khou naimei Libia ramv guay khou rui guangmei nunc de. Aniu gaanvsaekc rui Rom thangc rui guangmei Jihudimei khatni Jihudi guanhmei nunc de.

¹¹Gaanvsaekc rui Krit khatni Arabia khou rui guangmei nunc de. Tiki Ravguangc rui taanvdaih taancloumei lam khou kaniw rui sa bammei ti hei, karamc karamcmei lat khou aniu chu the!”

¹²Kaniw ngak the khatni kabah thay tangc ngam mak la thena, “Mi hei tabui tuang khang lana cho?” twna kaniw khat khat khou thanv the.

¹³Tiki kaniw gaanvsaekc rui mi nunc ta tei sinnuina, “Kaniw zouh zangv mba lana de,” twna sa the.

¹⁴Khoutei Pitar ziap ruhna akhat tei lev dingthauna, kauc ranvna meic kangdai khou tei sa the: “Jihudimeiputhiu khatni Jerusalem khou lungc bammei nangniw guay, alat nkinglou o. Mi lam khou hei ai rui salou puni.

¹⁵Nangniw rui ningmei kumcna mi nunc hei zouh zangv mba lana hamh e; ntaw laukhwan ganvdak chakiu na di he.

¹⁶Mi hei muhzwng Joel rui mi kumcna saloumei tei e:

¹⁷‘Ravguangc rui sa e: Nkhamhpui ganv khou ai rui atuang Bumaengc meic kathuicna khou bun keylou puni. Nangniw nac mpouh aluh guay ravmundinc puni; alauc nunc rui ndawman how puni, gaanvthaih nunc rui mangmanv puni.

¹⁸Ngguay, abangcpui, abangcpu guay khou, mi ganv khou kiu abumaengc bun keylou puni; mi khou kiu kaniw ravmundinc puni.

¹⁹Ai rui tingpuk khou charynmei taanv taanclou puni, kandih khou sw-nchinmei taanv lyanlou puni: zei, mai khatni maikhou dai tihow puni.

²⁰Poubauhmei tuang daihmei khatni hymdaihmei tingmik guang makmei hu khou, neihmik zingc puni, bw zei kumcna haengc puni.

²¹Mi ganv khou kiu, Poubauhmei ta kawpui mei ta kanlou puni.’

²²“Isaraelmeithiu, mi lat hei nkinglou o: Ravguangc rui kata charynmei khatni sw-nchinmei taanv mpeyna nangniw pang khou titaanclou khwanmei Nazarethmeipu Jisu hei Ravguangc rui ndiu guangmeipu e twmei lyanlou kanmei tei nangniw thay the.

²³Ravguangc kamei rui thayna raengcloumei katuang raeng thei layna, Jisu ta nangniw baanc khou tiilou khang Ravguangc rui swlou tina, nangniw rui kata kariak tat makmei nunc baanc khou tiilouna, kros khou swluai kan the.

²⁴Tiki Ravguangc rui kata theihmei ramrianra khou rui tiduaklouna tiringcthaulou kan the. Kalam thu theihmei rui kata bangclou bam ngam mak ge.

²⁵David rui kalam khou mi kumna salou e: ‘Ai Poubauhmei ta ahu khou how tanh tan e; kamei adaeng khou bam e, kumna ai ryanramei ariw lak ge.

²⁶Kumna alung neihlamei padik ge, akhou neihlamei lat padik ge. Kumna ai hei theic nimei maansei khwan sini, lwmgayna zaeng nthaekc bam ni.

²⁷Kalam thu nang rui ata taruaih khou ganclou lak ge; khatni nang khou lungh gutmei bangcpu ata tarou khou titaamclou lak ge.

²⁸Ringhmei khou zayloumei chaeng, nang rui akhou lyanlou the; kumna nang bammei rui ai neihlamei padik puni.’

²⁹“Achanathiu, aniu pupouc David lam khou nthanna ai rui sa nimei thu: kamei theic kan the kumna katuang tarou aseic nganvna aniu daeng khou nai bam e.

³⁰Kamei muhzwng akhat re, kumna Ravguangc rui kakhou nrianhloumei tei kamei thay e—Ravguangc kamei rui David kikta gaanv khat ta David tuang guangcbamv khou tidungclou puni twna ntipmei latryan swlou khwan e.

³¹Thei thangc guang nimei ta kamei how e, kumna ‘kata taruaih khou ganclou mak ge; kapumc tarou khou taamclou mak ge,’ twna Khrista ringcthau nimei lam khou kamei rui salou e.

³²Mi Jisu ti hei Ravguangc rui tiringcthaulou kan the; mi kiu howmei kiu aniw hei the.

³³Kata kapu Ravguangc tuang baanzat khou zay kauh thaulou the, kumna kamei rui nrianhloumei Bumaengh Nthanmei tei kapu khou rui laa the. Nangniw ntaw chu bammei khatni how bammei hei kamei rui aniu khou bun keyloumei katuang kaipat kiu the.

³⁴Tingkauh thangc kumei kiu David kamei hamh e; kamei rui mi kumcna salou e: ‘Poubauhmei rui aPoubauhmei khou sa e:

³⁵Nang ta zauczihmei nunc ta nang phaypav bangc khou ai rui tiniibinlou mak saanv, nang abaanzat khou dungc bam o.’

³⁶“Hei zaeng rui, Ravguangc rui Poubauhmei khatni Khrista tiswloumeipu kiu nangniw rui kros khou thaengcluai kanmei Jisu tei the twmei, Isaraelmei nangniw thay o.”

³⁷Meic nunc tei hei tei chu pwkhou lungh kabiu the, kumna “Chanathiu, aniw tabui sw nina cho?” twna Pitar khatni baihmei latdiutatmei guay khou tei sa the.

³⁸Pitar rui kaniw khou sa the, “Nangniw paap guay kuaklou khang, nangniw lungh laicna Jisu Khrista zanc khou duilup bo; kum pwkhou Ravguangc tuang kaipat, Bumaengh Nthanmei tiilou puni.

³⁹Kalam thu Ravguangc kamei rui tii ni twna nrianhloumei hei nangniw khang, nangniw nac nunc khang khatni duh thangc bammei Poubauhmei Ravguangc rui kakhou guang khang kawloumei guay khang ni e.”

⁴⁰Kumna lat baih baihmei mpeyna ni salouna, “Mi meicsimei nunc khou keylou nimei dandi khou rui pak duak la tho,” twna Pitar rui kaniw ta katiu the.

⁴¹Kaniw meic mpeyna kalat tei lwm the, kumna duilup the. Mi nungc tei meic ching thumh dou kaniw phwam khou haaplou the.

⁴²Kaniw tei latdiutatmei nunc rui nchamloumei khou, phwam kariumei khou, tu zangv kariumei khatni huayneymei khou lungh gutna bam khwan e.

⁴³Charynmei taanv khatni sw-nchinmei taanv mpeyna latdiutatmei nunc tei rui taanc lyanlou bam khwan e; kum tina meic guayna ping karim bam khwan e.

⁴⁴Lwmmei guay tei maniatna lungc bam khwan e khatni kaniw tuang nai naimei meic mathiucna tuang swna piu bam khwan e.

⁴⁵Kaniw tuang nai naimei zuancna syan tei kaniw pang khou kage nai naimei khang nzanh bam khwan e.

⁴⁶Tingmik pum Ravkai khou guang kariu bam khwan e, kaniw kai guay khou tu kariu tat bam khwan e, kaniw neihlana khatni tii niina tii patna tu zangv kariuna bam khwan e.

⁴⁷Ravguangc ta thuancna lungc bam khwan e, khatni meic guay rui kaniw ta kasyan kahawna bam khwan e. Kumna Poubauhmei rui kaniw pang khou kanloumei laamei nunc ta tingmik pum haaplou bam khwan e.