Read Rongmei Naga LATDIUTATMEI 21 Bible Online

LATDIUTATMEI 21 - Rongmei Naga bible

LATDIUTATMEI 21

¹Aniw kaniw khou kady kanavlouna tat the. Aniw tat nzutphutna Kos duipuidic khou guang the. Nthuanh thauna Roda tangc the. Mi khou tei rui Patara khou guang the.

²Phonikia tat nimei rungc mi khou tei ariwna, mi rungc khou tei aniw tuangc datna tat the.

³Aniw Kupra howmei bamv guang tangc pwkhou, Kupra tuang dihba biak keyna Suria thangc tat the, kumna Tur khou guang tangclou the. Mi khou tei rungh puat guay lou key nipui tuang nai thena, aniw dui paengc pat the.

⁴Mi khou tei ziap nunc ta phutowna aniw zaeng chanei kaniw daeng khou bamlou the. Paul ta Jerusalem thangc tat rio twna kaniw rui Bumaengh paan rui sa the;

⁵tiki aniw tat dat nimei ganv tangc thena, aniw tat dat the. Kaniw guay, kaniw now nac guay lev aniw ta kaidai suanc twanna duipui paengc suanc tangclou the. Duipui paengc khou aniw khuksun keyna huayney the.

⁶Khoutei aniw khat khat khou kady kanavlou lana, aniw rungh tei tuangcna tat dat the. Kumna kaniw kai hanc dat kan the.

⁷Aniw Tur khou rui tuangc thau datna, Ptolemai guang tangc the. Mi khou tei aniw chana guay ta ariwna, zaeng neih khat kaniw daeng khou neihlou the.

⁸Nthuanh thauna aniw tat thau datna, Kaisaria guang tangc the. Mi khou tei aniw, Jerusalem khou kapahloumei gaanv chanei pang khou kazauhmei gaychamvdinhmeipu Philip kai khou bangvlou the.

⁹Kanac tunac gaanv padeih nai e. Mi nunc kiu ravmundinhmei nunc e.

¹⁰Aniw mi khou tei neih kanak bam khou, Agabas kawmei ravmundinhmei gaanv khat Judia thangc rui guang khwan e.

¹¹Kamei aniw daeng khou guangna, Paul tuang siangiat laana, hei tei rui karana kaphay kabaanc karakcna, “Mi siangiat kaipouc ti hei, Jerusalem khou bammei Jihudimei nunc rui mi hei kumcna karakna Zentelmei khang tii pat puni, twna Bumaengh Nthanmei rui sa e,” twna sa the.

¹²Hei tei chu pwkhou, aniw khatni mi khou tei bammei guay rui Paul ta Jerusalem thangc tat mak khang khaam the.

¹³Khoutei kamei rui, “Nangniw tabui swna kapna alung swnau bam tu cho? Ata Jerusalem khou karak khang na hamhna, Poubauhmei Jisu khang mi khou tei theiclou khang nganvna ai nuh the,” twna sa the.

¹⁴Aniw kata sa bow ngam mak khena, “Poubauhmei rui ningmei sw kan di tho,” twna ganclou the.

¹⁵Mi khou tei neih kanakloumei tangv, aniw puat kasiamhna Jerusalem thangc tat the.

¹⁶Kaisaria khou bammei ziap gaanvsaekc aniw ta nduangh tatna aniw kaibang bamv sw nimei, thaurey khou na rui ziap sw guangmei Kupramei Mnason kai suanc guang tangclou the.[30]

¹⁷Aniw Jerusalem guang tangc pwkhou, chana guay rui aniw ta neihlana riulou the.

¹⁸Nthuanh thauna Paul aniw ta nduanghna Jakob ta ariw khang tat the. Mi khou tei phwamling gaanthaic guay ni bam khwan e.

¹⁹Paul rui kaniw ta kalum the, kumna Ravguangc rui kata Zentelmei pang khou titaancloumei guayna tei khat khat swna rac nthan thiak lou the.

²⁰Kalat tei chu lana, kaniw guayna Ravguangc ta thuanc the. Khoutei kaniw rui sa the, “Chanale, Jihudimei lwmmei aching aching nai e, kumna kaniw Riakdanv ta nthukna sw bam e twmei nang thay e.

²¹Nang rui Zentelmei pang khou lungc bammei Jihudimei nunc khou kaniw nac nunc ta gihruamh mak khang khatni kaniw Jihudimei riak tat mak khang nchamlouna, Mousi tuang Riakdanv tei ganh khang nchamlou the twmei kaniw khou raclou the.

²²Nang mi khou hei guang bam e twmei kaniw suai makna thay puni the. Kum e thei tabui tuang sw kho cho?

²³Mi kumna swmei gay pungh the: Latryan swna bammei gaanv padeih aniu pang khou nai e.

²⁴Nang ni kaniw thei lay kazauhna, pumh nthanmei taanv taanc tho, kumna kaniw mi khang nting nimei guay tei ni nang rui ntinglou ti tho; kumna kaniw py guat[31] kan di tho. Kum pwkhou, kaniw nang lam khou chu bammei tei saraamhpui lat de, nang Mousi tuang Riakdanv ngaekna tat bam de twmei kaniw thay puni the.

²⁵Tiki lwmloumei Zentelmei nunc khang thu, ravmaengc khou katloumei puat, zei khatni gayluaimei zanc tu nuh mak ge, khatni lungcmaanv lungcmowmei taanv taanc nuh mak ge twna dingloumei tei kaniw khang tatdyn swna hy kan the.”

²⁶Nthuanh thauna Paul rui kaniw ta nduanghna pumh nthanmei taanv taanc the. Kumna kamei Ravkai lungc khou gutna kaniw pumh nthanmei taanv tei zaeng azuh khou luai puni cho khatni tabui nungc kaniw khaeng puni cho twmei dinclou the.

²⁷Zaeng chanei tei luai zaic ni khou, Asia thangc rui guangmei Jihudimei gaanvsaekc rui Paul ta Ravkai khou ariw the. Kaniw rui meic nunc ta kathuatc thaulouna Paul ta nym the.

²⁸Kaniw rui, “Isaraelmeithiu! Guang o! Mi pu hei kabamv kathuic khou tatna Isaraelmei ta, Mousi tuang Riakdanv ta, khatni mi Ravkai ta sakasicna meic guayna ta ncham tat bammeipu e. Mi na hamhna, kamei rui Zentelmei nunc ta Ravkai khou nduangh gutna nthanmei bamv ta sw mphuam the!” twna sa the.

²⁹(Kaniw rui mi hei samei thu, Ephisimei Trophima Paul lev kaidai khou tei tat bammei ta how lana, Paul rui kata Ravkai khou nduangh guang khuangh the twna ning lana e.)

³⁰Kumna kaidai kapwm ta tei tikalung thaulouna, meic nunc tei pak guang kaduaina Paul ta nym the, kumna Ravkai khou tei rui zay pat the. Kaluak kalat Ravkai kaikhamv guay mbangh the.

³¹Meic nunc tei rui Paul ta swluai khang sw bam khou, Jerusalem kapwm khou kachin karo bam the twna Rommei rickang khat tuang kapypu khou poulou the.

³²Kaluak kalat mi pu tei rihpy nunc khatni rihmei nunc ta nduanghna meic kangdai bammei bamv thangc tei pak key the. Meic nunc tei, mi pu tei rihmei nunc ta nduanghna keymei ta how lana, Paul ta bai nthaekc the.

³³Rihpy daihmei tei Paul daeng khou guangna kata nym the, kumna kata kangriang kanei rui bangclou o twna latdanv pat the. “Mi pu hei thow cho? Kamei tabui tuang swna cho?” twna kamei rui thanv the.

³⁴Meic pang khou tei rui gaanvsaekc rui lat khat kauc the, baihmei gaanvsaekc rui lat baihmei kauc the. Mi kumna kachin karona kalam nsihsingmei thay ngam lamc mak khena. Paul ta rihmei nunc bamv thangc nduangh ku tho twna rihpy daihmei tei rui kamei nunc khou sa the.

³⁵Kaniw rui kata kailaek nganv nduangh guang tangc lana, meic kangdai tei rui hangh hangna huamc guang ti thena, rihmei nunc rui kata puanc tat kan the.

³⁶“Kata swluai o,” twna kaucna kaniw kathei lay guang the.

³⁷Rihmei nunc rui kata rihmei nunc bamv khou zay gut ni khou, “Ai nang khou lat khat sa nuh puni cho?” twna Paul rui rihpy khou tei sa the. Khoutei, “Nang Grik lat sa thay de ni?

³⁸Kum e thei, rihthauna rihna phunghmei meic ching padeih ta tazikramv thangc nduangh tat kanmei Izipmeipu tei thu hamh e ni?” twna sa the.

³⁹Paul rui mundawna, “Ai Jihudimei de. Ai Kilikia tuang Tarsas khou rui puanhmei, mi daihmei kaidai tuang dilungmei de. Ai meic nunc khou hei lat salou nii e.” twna sa the.

⁴⁰Kamei lat sa khang rihpy daihmei tei rui nuhlou tina, Paul kailaak khou dingna, rimh rim keylou khang kabaanc rui kabeyna meic nunc ta khaam key the. Meic nunc tei rimh rim keylou pw khou, Paul rui kaniw khou Ibri lat rui sa the: