Read Rongmei Naga LATDIUTATMEI 25 Bible Online

LATDIUTATMEI 25 - Rongmei Naga bible

LATDIUTATMEI 25

¹Phesta tei Kaisaria khou guangmei zaeng neih thumh tangv, Kaisaria khou rui Jerusalem thangc ngangh the.

²Khoutei amuh daihmei nunc khatni Jihudimei kapy nunc rui Paul ruc khou lat phungclou the.

³Paul ta Jerusalem khou kaw guanglou khang kakhou huaycha the. Kalam thu kaniw kata chaeng nchwanna swluai ni the twna ning the.

⁴Phesta rui mundawna sa the, “Paul ta Kaisaria khou lou bam de, ai ni mi khou tei key dat nuangc puni de.

⁵Kumna nangniw kapy nunc athei lay keyna mi pu kiu rui nkhuailoumei guay sa tho.”

⁶Phesta Jerusalem khou zaeng tachat ruh dou bamlou lana Kaisaria thangc key dat the. Nthuanh thauna kamei latzan kai ku the, kumna Paul ta kaw guang khang latdanv pat the.

⁷Paul tei guang pwkhou, Jerusalem thangc rui keymei Jihudimei guay tei kadaeng ding huamcna, kaniw rui nsihsingna sa ngam makmei daic sih sihmei khuay mpeyna karuc khou nkhamlou the.

⁸Tiki, “Ai Jihudimei tuang Riakdanv ruc khou pw ni, Ravkai ruc khou pw ni, Kaisar ruc khou pw ni, nkhuaimei taanv taanclou kanmei tuang maek ge,” twna Paul rui akhangvna mundaw the.

⁹Tiki Phesta tei Jihudimei nunc rui kata gay dyng e twloumei ta laa nii lana, “Nang Jerusalem thangc nganghna nang ruc khou nkhamlou bammei latbamv khou hei ahu khou ding nuh puni cho?” twna Paul khou thanv the.

¹⁰Paul rui mundawna sa the, “Ata latzan sw nipui bamv thu, ai ding bammei Kaisar tuang latzankai hei the. Nang rui thay chuy bammei tei the, ai Jihudimei ruc khou nkhuailoumei tuang maek ge.

¹¹Ai rui riakdanv twanlyamna theic biuhmei taanv taancloumei tuang nai e thei, ai duak khang sw bam lak ge. Tiki kaniw rui aruc khou nkhamlou bammei guay hei saraamhpui lat re thei, ata meic gaanv khat na rui sini kaniw baanc khou tiilou ngam ni tu hamh e. Ai Kaisar rui latzan sw khang kakhou phungclou the.”

¹²Khoutei Phesta katuang munsunhmei nunc lev cham lana, “Nang rui Kaisar khou latphungclou thena, nang Kaisar daeng thangc tat nina the,” twna daw the.

¹³Kanakmei tangv, Phesta ta riulou khang, Guangh Agrippa lev Barniki Kaisaria khou guang khwan e.

¹⁴Kaney mi khou tei tingmik mpeyna bamlou pwkhou, Phesta rui guangh khou tei Paul lam khou raclouna sa the: “Pheliks rui lou duhmei kangmei gaanv khat nai bam e.

¹⁵Ai Jerusalem thangc ngangh khou, Jihudimei nunc tuang amuh daihmei nunc khatni gaanvthaih nunc rui, mi pu ruc khou akhou sa the. Kumna mi pu ruc khou tei latzan swlou khang sa the.

¹⁶Tiki Rommei tuang riak khou thu, meic gaanv khat ruc khou lat phungclou pwkhou, lat phungcloumeipu tei lev nkhuai e twmeipu kaney tei zaw lev zaw puanc adyangna karuc khou nkhamloumei guay lam khou tisa mak saanv, theih khang tii pat mak ge twna salou tina,

¹⁷kaniw mi khou hei key pwkhou, ai kaluak kalat nthuanh thauna latzanbamv khou dungcna mi pu ta kiuc kaw guang the.

¹⁸Kaniw kiu dingthauna sa the, tiki ai ningmei kumcna daic hakmei khuay karuc khou sa mak ge.

¹⁹Kaniw rui samei kiu kaniw tuang ravchap lam khou khatni theic kanmei Jisu twna kawmeipu ta Paul rui ringc bam de twna samei lam khou, kaniw nchamc makpui lat re.

²⁰Mi lam khou hei akumhna sw kho cho twmei ning thau ning guang khang thay mak khena, Jerusalem thangc tatna mi latzan hei sw khang kamei kahaw bu cho twna ai rui Paul khou thanv the.

²¹Tiki katuang latzan hei thu Kaisar rui sw kan khang kata sumlou bam do twna kamei rui sapui thei layna, kata Kaisar daeng thangc ndiu tat mak saanv sumlou bam tho twna latdanv patlou kan the.”

²²“Mi pu lat kiu ai kamwang kahak khou rui chu nii e,” twna Agrippa rui Phesta khou sa the. “Nthuanh kiu nang chu nuh puni the,” twna Phesta rui daw the.

²³Nthuanh thauna Agrippa lev Barniki ta tei kangam kaziu swlouna, rihpy daihmei nunc khatni kaidai tuang meicpy nunc lev charuangckai khou gut the. Phesta rui latdanv pat tina Paul ta nduangh gut the.

²⁴Phesta rui sa the, “Guangh Agrippa khatni mi khou guang bammei guay: Mi khou khatni Jerusalem khou bammei Jihudimei guay rui kata nuh makna akhou lat phungc kulou bammeipu kiu mi pu hei the. Kati hei ringcna lou bam nuh mak khe twna kaniw rui kauc the.

²⁵Tiki kata swluai biuhpui khuay kamei taancloumei ta thu ai how mak ge. Tiki kamei rui Kaisar khou lat phungcloupui zaeng rui, kata ndiu tat ni the twna ai dinglou the.

²⁶Ai kalam khou Kaisar khou hy khang baekh baekpui lat maek ge. Mi zaeng rui kata ai nangniw hu khou, nkunna Guangh Agrippa nang hu khou phungc guang tuang e. Mi kiu thu katuang latzan hei kathai lana, hy nuhmei tuang nai puni ny twna e.

²⁷Kalam thu, kangmei gaanv khat ta baekh baekpui khuay kazauh makna ndiuloumei hei akhang kalam cha mak ge.”