Read Rongmei Naga LATDIUTATMEI 26 Bible Online

LATDIUTATMEI 26 - Rongmei Naga bible

LATDIUTATMEI 26

¹“Nang, nang lam khou ntaw sa nuh the,” twna Agrippa rui Paul khou sa the. Khoutei Paul kabaanc ntyng patna sa the:

²“Guangh Agrippa! Jihudimei rui aruc khou phungc kulou bammei lat lam khou aseic nang khou sa khang ariwmei hei sangaymei e twna ai laa e.

³Kalam thu Jihudimei riak khatni kaniw khou nchamc makmei naimei tei nang thay chuyna thay e. Kum thena khaengvna ai samei hei chulou pw khang huay e.

⁴“Ai alaucna khou rui akumhna lungc thau tu cho twmei Jihudimei guayna thay e. Apanty kapwm hei, thaurey khou akandih khou, mi tangv Jerusalem khou akumhna lungc kan tu cho twmei kaniw thay e.

⁵Kaniw rui sa nii e thei, thaurey khou na rui ai hei aniw tuang ravchap tat nthukmei kang, Pharisimei swna ai lungc guang e twmei kaniw thay de.

⁶Ai mi khou hei ata latzan sw khang ding bammei hei, Ravguangc rui aniw pupouc nunc khou nrianhloumei ta tei lwm e twpui zaeng rui e.

⁷Mi kiu laatow puni twna lwmgayna aniw zaat tuang kaikhwang ruhna kanei rui zingbangc kalaanv Ravguangc ta kalum bammei tei the. Mi ti hei lwm tipui zaeng rui, he Guanghle, Jihudimei rui aruc khou khuay mphunlou bam tuang e.

⁸Mi khou bammei nangniw tabui swna Ravguangc rui theihmei ta tiringcthaulou e twmei lwm ngam makna cho?

⁹“Nazarethmei Jisu zanc ti hei swmaan khang ngampui kamv taanc ni twna ai ning khwan e.

¹⁰Hei tei ai Jerusalem khou taanc kan the. Ai amuh daihmei nunc khou rui ngamv laa lana, Ravguangc mei nunc meic mpeyna ta kangkai khou lou the. Kaniw ta swluai khang lat dan pwkhou, ai ni nuh the twna kazuanlou the.

¹¹Ai rui kaniw tuang sinagog guay khou katupc sihna ryanramei tii kan the khatni kaniw lwmmei tei mpat khang sw kan the. Ai kaniw ta heidikamv lungh puamcna ginramc kaidai nunc thangc nganvna kaniw ta sw kasic khang tat the.

¹²“Amuh daihmei nunc khou rui ngamv laa lana, mi khang tei rui ai Damaskas thangc tat the.

¹³He Guanghle, chaengkui khou, kalaanv neih ndyng khou, neihriw suangc gaanhmei riw ai khatni athei lay tatmei guay ruc khou tingpuk thangc rui phian keymei ta ai how the.

¹⁴Aniw guayna kandih khou pun key the. Khoutei, ‘Saul! Saul! Nang tabui swna ata sw kasic khang sw bam tu cho? Sauh ta nsuymei hei nang kabiu khang de!’ twna Ibri lat rui akhou samei ai chu the.

¹⁵Khoutei, ‘Nang thow cho, Poubauhmei?’ twna ai rui sa ti khou, Poubauhmei rui sa the, ‘Ai hei nang rui sw kasic khang sw bammei Jisu tei the.

¹⁶Tiki nang thau ding tho. Nang ta ataanv taanh khang laalou khang ai nang khou guangmei tuang the. Nang aseic how kanmei[33] khatni thei thangc ai rui nang khou lyanlou punimei guay tei nang meic baihmei guay khou ni raclou nina the.

¹⁷Ai rui nang ta ndiulou punimei Isaraelmei khatni Zentelmei guay baanc khou rui nang ta kanduaklou puni.

¹⁸Nang rui kaniw mik tiraklou puni, kumna kaniw ta zinghmei khou rui gaanhmei khou khatni Seitaan baanc bangc khou rui Ravguangc khou tingalanc guanglouna, kaniw akhou lwmpui paan rui kaniw paap guay kuaklou khang, kumna Ravguangc mei nunc pang khou kaniw tuang bamv khou kaniw bam khang e.

¹⁹“Hei zaeng rui, he Guangh Agrippa, tingkauh thangc rui lyanloumei ndawman tei ai piuna taanc the.

²⁰Kumna rey liangmei khou Damaskas khou, mi tangv Jerusalem khou, khatni Judia kapwm khou, khatni Zentelmei pang khou tatna kaniw lungh laihna Ravguangc khou guang nina e, kumna lungh laihmei panty khou lungc nina e twna dinclou the.

²¹Hei zaeng rui Jihudimei nunc rui ata Ravkai khou rui nymna swluai khang sw tuang e.

²²Tiki aseic nganvmei hei Ravguangc rui nkhavlouna ai mi khou hei dingna meic nthyammei daihmei kathuicna khou dinc nimei lat hei dinctowmei tuang e. Ai rui dinc bammei kiu thu Mousi khatni muhzwng nunc rui mi kumna pat puni twna dincloumei tei e:

²³mi kiu thu Khrista tei theiclou puni, kumna Jihudimei khou ni, Zentelmei khou ni kanloumei tuang gaanhmei tei dinc ndauh khang theihmei pang khou rui rey liangmei swna ringcthau dat puni twmei tei e.”

²⁴Mi kumna Paul rui akhangvpui lat sa key pwkhou, “Nang mba the, Paul! Nang thay geic langv lana mba the!” twna Phesta rui kaucna sa the.

²⁵Paul rui mundawna sa the, “Tikguncdaihmei Phesta! Ai mba mak ge. Ai rui sa bammei hei kalingmei e twmei thay nthan thiakna sa bam tuang de.

²⁶Guangh Agrippa! Nang mi lam guay hei thaypui zaeng rui, ai rouh tuang maekna nang khou sa tuang e. Mi guay tei nang thay de, kalam thu hei tei kakwn kakuaic thangc nkamh mbeihna pat kan tuang hamh e.

²⁷Guangh Agrippa, nang muhzwng guay ta lwm daih? Nang lwm de twmei ai thay e.”

²⁸“Mi katitna mei dak khou hei, nang ata Khristian tiswlou me twna cho?” twna Agrippa rui Paul khou sa the.

²⁹“Kaganv saengc pw, dui pw nang na hamhna aseic alat nking bammei nangniw guay, ai kumh khang Ravguangc khou huayney bam e— kang bangcloumei hei kumcna bangclou khang thu hamh e,” twna sa daw the.

³⁰Khoutei guangh, guanghkhyn, Barniki khatni baihmei guay tei dingthau the,

³¹kumna kaniw tat pat dat khou, “Mi pu hei theic biuhpui tuang ni, kangkai khou lou biuhpui tuang ni kakhuay maek ge,” twna kaniw khat khat khou sa the.

³²“Kamei rui Kaisar khou lat phungclou mak bam khwan e thei, kata mpatlou dat nuh tuang di the,” twna Agrippa rui Phesta khou sa the.