Read Rongmei Naga LATDIUTATMEI 27 Bible Online

LATDIUTATMEI 27 - Rongmei Naga bible

LATDIUTATMEI 27

¹Aniw ta Itali thangc titat ni the twna dinglou lana, “Guangh Daihmei tuang Rickang” twna kawmei Rommei tuang rickang akhat tuang rihpy Julia baanc khou aniw ta nsinlou the.

²Asia tuang rungh nthaekc bamv guay khou tatlou nimei Adramuttia thangc rui guangmei rungc akhat khou tuangcna aniw tat the. Thessalonika kaidai khou bammei Makidoniamei Aristarkha ni aniw lev tat nchamc khwan e.

³Nthuanh thauna aniw Sidon kaidai tangc the, kumna Julia rui Paul ta nzianlouna kamei kapammei nunc ta ariwna kakhang kage nai naimei tiilou kan khang nuhlou khwan e.

⁴Aniw mi khou tei rui tat thau dat the, kumna aniw hu biak thangc rui mpwan aliu guangpui zaeng rui Kupra duipuidic tuang lim khou tat ngangh the.

⁵Aniw Kilikia lev Pamphulia tat kaanna Lukia kandic tuang Mura kaidai khou guang the.

⁶Mi khou tei Alekzandria thangc rui guangmei, Itali tat nimei rungc akhat rihpy tei ariw lana, aniw ta mi khou tei tituangc the.

⁷Aniw nzaengna tingmik mpeyna tat lana, ryanra sihna Knida kaidai guang tangc the. Mi chaeng tei tat khang mpwan rui nuh mak khena, Salmoni tat kaan keyna Krit duipuidic lim khou tat key the.

⁸Aniw kungc sihna ramkiang khian rana tatna Lasia kaidai daeng khou naimei Giuga Makmei Runghthaekcbamv twmei khou guang tangc the.

⁹Aniw mi khou tei kaganv tingsaengc sihna bamlou the. Kuakloumei Tingmik[34] tei luai kan the, kumna ntaw thu rungh chau tat dat kunghpui ganv guang the. Kum tina Paul rui sa the,

¹⁰“Meic nuncthiu, aniu mi khou rui tat thau dat nimei chaenglwan hei thu kungc sih puni the; rungh khou phungc bammei puat, rungh kahak khatni aniu panty nganvna mpeyna maan puni the twmei ai how the.”

¹¹Tiki rihpypu tei, rungh thoumeipu khatni rungh kaipouc lat laana Paul lat laa mak khe.

¹²Mi bamv tei tingsei khou bam khang gaymei bamv hamh tina kaniw meic geihmei rui ni nuh e thei Phoinikia khou tingsei khou bam khang tat nii the. Phoinikia hei Krit khou rui neihkey dihba khatni dihpy dihba[35] khou naimei runghthaekcbamv e.

¹³Dihba pwan aliu rih ri ngangh ti khou, kaniw ningmei tei sw nuh the twna ning the. Kumna kaniw runghphey zay kuna nuhmei kamv Krit tuang duikhuangc khyanna tat the.

¹⁴Tiki asaanh mak khou “Dihpy Neihpat” twna kawmei tanhmei pwan ramkiang thangc rui aliu key the.

¹⁵Hei tei rui rungh ta tei key thui pwkhou, tat pat ngam mak khena mpatlou tina mpwan tei rui phungc tat the.

¹⁶Aniw Kauda twna kawmei duipuidic launa akhat tat ruanna, dihba biak thangc mi lim khou key pwkhou, ngangvloupui bamv nai the. Kungc sihna mi khou tei rungh tuang hic tei bangc ntiplou the.

¹⁷Kaniw hei tei zay patna, riangbuk rui ntalouna runghpy khou tei bangclou the. Libia tuang duipui tin tuang sypung khou rungh tei sowlou pungh e twmei pingna, runghphey tei zay keyna mpwan rui rungh ta tei tiphungc tat the.

¹⁸Puanzingh tei nthaekc mak khena, nthuanh thauna kaniw rui rungh khou phungh bammei puat asaekc tei kalat ganc the.

¹⁹Kumna nthuanh thau datna rungh tuang na asaekc ni ganc the.

²⁰Tingmik mpeyna aniw neihmik ni, gaanchuangcna ni how dat mak khe. Kumna puanzingh tei ranvna nthaekc makna guang bam the. Nkhamh khou thu aniw ringc dat pungh e twmei lwm taan the.

²¹Meic nunc tei kaganv tingsaengc sihna tu zangv makna guangmei tangv, Paul kaniw hu khou dingthauna sa the, “Meic nuncle, ai rui samei tei chulouna Krit khou rui tat pat makna bam khwan e thei, mi kasic karoucmei khatni maanmei hei pat lak ni tuang e.

²²Tiki ai rui nangniw khou sapui tuang e: ping riu! Nangniw gaanv khat na sini theic ni tu hamh e; rungh na khang de maan khang.

²³Kalam thu ai hei katuang sw bammei khatni ai kalum bammei Racguangc tuang baanchara zingbangc tei akhou guangna,

²⁴‘Ping riu, Paul! Nang Kaisar hu khou ding puni. Ravguangc rui nang ta nzianlouna nang lev tat nchamc bammei guay tuang panty ni kanlou puni,’ twna sa the.

²⁵Hei zaeng rui ping riu! Ravguangc kamei rui akhou saloumei kumcna swlou puni de twmei ai lwm e.

²⁶Aniu ta duipuidic akhat khou phungc patlou puni.”

²⁷Zaeng ruhna padeihmei nungc zingbangc, aniw puanzingh ding khou Mediteranian duipui khou nzuan tat bam khwan e. Zipchwng zaengc khou aniw ramkiang ana guang lana khuangh the twmei rungh thoumei nunc tei ning the.

²⁸Kumna riang khou ramh nritmei ntalouna dui khou mpat key zauc pw khou, khaap nchuih nthukmei ariw the. Kanakc khath twna zauc dat pw khou, khaap ruhna panguh na nthuk bam khwan the.

²⁹Kumna kaniw rungh tei tautuangc khou diangc pungh e twmei ping lana, runghbanghchei padeih, rungh thei khou tei mpat key the. Kumna tinggaanc pat khang huayney the.

³⁰Khoutei rungh thoumei nunc tei pak duak khang karamc thau the; kaniw rungh hu biak thangc tei runghbanghchei asaekc mpat keypui thak swna, hih tei dui khou mpat key the.

³¹Khoutei, “Rungh thoumei nunc tei rungh khou bam mak ge thei, nangniw ringc pw lak khe,” twna Paul rui rihpy khatni rihmei nunc khou tei sa the.

³²Kumna rihmei nunc rui hih bangcloumei riang tei dan taplou tina hih tei tat kan the.

³³Tinggaanc zaic ni khou, Paul rui kaniw khou sa the, “Nangniw tu zangv makna khaengv guangmei zaeng ruhna padeih tangc the.

³⁴Nangniw ntyan katitna sini tu tho; nangniw theih mak khang tu nina the. Nangniw samlu akhatna sini maan ni tu hamh e.”

³⁵Mi hei salou lana, Paul tei ntyan laana, Ravguangc ta thuanckulouna, kaniw hu khou tu the.

³⁶Khoutei kaniw ni bauc thau the, kumna kaniw guay ni tu the.

³⁷Aniw rungh khou bammei meic guayna gaanv 276[36] ge.

³⁸Aniw meic guayna tu tangna rungh tei ti-nthaan khang gehu guay tei duipui khou kalat keylou kan the.

³⁹Tinggaanc pat the, tiki rungh thoumei nunc tei ramvkaanv thay mak khe; tiki duikwn akhat tin sypung how lana, rungh tei mi khou tei guang sowlou nuh puni ny twna ning the.

⁴⁰Kumna runghbanghchei guay tei dantaplou tina dui bangc key kan the. Runghphey zay karimei tuang ntaloumei riang guay ni riclou the, khatni mpwan rui rungh ti hei hu biak thangc phungc gut khang hu khou naimei runghphey zay thau the. Kumna duitin nzwanna pat the.

⁴¹Tiki rungh tei dui lungc khou naimei sypung khou guang sow the, kumna kahu langv sow kaphumhlouna kalung dat nuh mak khe. Kathei biak tei ni dui luat tanhmei rui sw bak ngam gut the.

⁴²Kangmei guay tei dui paengc thangc zaek patna pak kan mak khang swluai ngam ni the twna rihmei nunc tei rui sw thau the.

⁴³Tiki rihpy tei rui Paul ta kanlou nii lana, hei tei sw nuh mak ge twna khaam the. Kumna dui zaek thaymei guay kachakc keyna duipaengc zaek pat rey tho twna kamei rui latdanv pat the.

⁴⁴Baihmei guay rui thing paek pw, rungh bakmei kiak pw koucna pat tho twna sa the. Mi kumna aniw meic guayna kabiu kabaeng makna duipaengc kaan pat the.