Read Rongmei Naga LATDIUTATMEI 28 Bible Online

LATDIUTATMEI 28 - Rongmei Naga bible

LATDIUTATMEI 28

¹Aniw duipaengc pat tangc pwkhou, mi duipuidic tei Melita kaw e twmei thay the.

²Mi khou bammei nunc tei rui aniw ta kadan sihna swlou e. Mi khou tei ting riu the, kumna nchu the. Kum tina mai sw thaulouna aniw ta riulou the.

³Paul tei thingbanv laa guangna diklou bam khou, mai chaengc thau ti thena nrui akhat patna Paul baanc khou kasiatcna nchow the.

⁴Paul baanc khou nrui thaengc bammei ta how lana, “Mi pu hei meicdowmei lana khuang e. Kamei dui khou rui mu duak pat the, tiki rav latzan rui kamei ringc nuh ti makna di the,” twna mi khou lungc bammei nunc tei kaniw khat khat khou sa the.

⁵Tiki Paul tei kabiu kabaeng makna nrui ta tei mai khou kathanh keylou kan the.

⁶Kamei puamc thau pungh di the, hamh e thei theicna pun key pungh di the twna zauc bam khou, tingsaengc sih the tiki ramhkhat sini sw ti makna, kaniw lung kalaic datna, “Kamei hei rav akhat re!” twna sa the.

⁷Mi khou tei rui duh makmei bamv khou, mi duipuidic tuang kaipouc Publia twna kawmeipu lungc bam khwan e. Kamei rui aniw ta laalouna, zaeng neih thumh kadaeng khou bangvlou the.

⁸Publia pu zeibana kapumc chaengcna zip bam khwan e. Paul kadaeng khou guangna kabaanc sungcna huayneylou the. Khoutei kamei gay dat the.

⁹Hei tei swlou pwkhou, mi duipuidic khou nnaumei guay guangna tigaylou kan the.

¹⁰Kaniw rui aniw khang kaipat mpeyna tiilou the, kumna aniw tat thau dat pwkhou aniw khang chaeng khou kage naimei guay kaniw rui tiilou the.

¹¹Mi khou tei tingsei saanv bamlouna, bw thumh tangv “Naphinhmei Chananei” twna kawmei Alekzandria thangc rui guangmei rungc akhat khou tuangcna aniw tat dat the.

¹²Aniw Surakus kaidai guang tangcna, mi khou tei zaeng neih thumh bamlou the.

¹³Mi khou tei rui tat thau datna, Regia kaidai guang tangc the. Nthuanh thauna dihba pwan aliu nganghna, zaeng neih nei khou Putioli kaidai tangc the.

¹⁴Mi khou tei lwmmei nunc gaanvsaekc ariw khwan e, kumna neidak akhat neihlou khang kaniw rui kham the. Mi kumna aniw Rom tangc the.

¹⁵Rom khou bammei lwmmei nunc aniw guangmei chamv chu lana, Appia Kaithyan khatni Ginbangvkai Kathumh twna kawmei bamv tei nganv aniw ta riu khang pat the. Paul kaniw ta how pwkhou, Ravguangc ta thuancku the khatni mpeyna kadiwgay the.

¹⁶Aniu Rom guang tangc pwkhou, rihmei khat rui gaekna Paul ta kanyng swna bam khang nuhlou the.

¹⁷Zaeng neih thumh tangv, Paul rui mi khou tei bammei Jihudimei kapy nunc ta kaw kaduai the. Kaniw guang kaduai pwkhou, kamei rui kaniw khou sa the, “Chanathiu, ai aniu zaat ruc khou ni, aniu pupouc nunc khou rui tat guangmei riak ruc khou ni simei taanv taanclou mak ge; tiki Jerusalem khou rui ata nymna Rommei nunc baanc khou tiilou the.

¹⁸Rommei nunc rui akhou lat thanvmei tangv, ai theic biuhpui taanv taanclou tuang maek ge twmei kaniw thay lana, ata mpatlou dat nii khwan the.

¹⁹Tiki hei tei nuh mak ge twna Jihudimei nunc rui sa tipui zaeng rui, ai azaatmei nunc ruc khou lat phungclou khang maek ge, tiki atuang latbamv hei thu Kaisar khou phungclou mak nuh makpui tuang guang the.

²⁰Hei zaeng rui nangniw ta ariwna pary rah khang ai kawpui tuang e. Ata mi kumna kangriang ntalou bammei hei, Isaraelmei rui rigwnna bammeipu zaeng khou tei rui e.”

²¹Kaniw rui Paul khou mundawna sa the, “Nang lam khou Judia thangc rui tatdyn akhat na sini hy guang tuang ni maek ge khatni Judia thangc rui guangna nang lam khou sina raclou tuang hamh e thei poulou tuang maek ge.

²²Tiki nang rui ningmei tabui cho twmei thu aniw chu nii e; kalam thu nang kazauh bammei kang lam khou thu nuh makmei lat kabamv kathuic khou sa bammei ta aniw thay the.”

²³Kumna kaniw Paul lev tingmik akhat nrianhlou lana, meic geihna Paul daeng khou guang the. Laukhwan rui thauna zingbangc nganv Ravguangc Guangcdic lam khou raclou the, khatni Mousi tuang Riakdanv khatni Muhzwng nunc rui hyloumei guay khou rui Jisu lam khou lwmlou nuh khang raclou the.

²⁴Kaniw gaanvsaekc thu kalat khou tei kwmlou the; tiki baihmei thu lwm mak khe.

²⁵Kaniw tei lungh chamc makna tat dat kan the; tiki kaniw ntamv ni khou Paul rui mi kumna salou kan the:

²⁶“Bumaengh Nthanmei paan rui Isaia rui aniu pupouc nunc khou mi kumna nthanna salou e: ‘Nang tatna mi mei nunc khou mi hei sa o: Nangniw nking changh nking bam sini kabah thay mak puni; nangniw zauc changh zauc bam sini how mak puni.

²⁷Kalam thu mi mei nunc lungning hei ndy the, kaniw nu ni diat ngam the, kaniw mik ni tiat ngam the. Kum mak khwan e thei, kaniw how ni tuang e, kaniw nu rui chu ni tuang e. kaniw lungning ning pat thay ni tuang e; kumna kaniw akhou hanc guangna ai rui kaniw ta tigaylou ni tuang e, twna Ravguangc rui sa e.’

²⁸“Ravguangc tuang kanloumei chamv tei Zentelmei khang tii tat kan the twmei nangniw thay o. Kaniw thu nking puni!”

²⁹(Paul rui mi hei saloupui tangv, Jihudimei nunc tei kaniw rana ranv sihna agina tat kan the.)[37]

³⁰Mi khou tei Paul rui nngepui kai khou tingkwm kanei lungclou khwan e, kumna kadaeng khou guangmei guay ta riulouna,

³¹ping rouh tuang khatni khamv namv tuang maekna Ravguangc Guangcdic lam khou dinc khwan e khatni Poubauhmei Jisu Khrista lam khou nchamlou khwan e.