Read Rongmei Naga LATDIUTATMEI 5 Bible Online

LATDIUTATMEI 5 - Rongmei Naga bible

LATDIUTATMEI 5

¹Kazanc Annania twna kawmeipu gaanv khat, kanow Sapphira lev nchamcna kakai tuang laupuk akhat zuanc khwan e.

²Kamei rui mi laupuk manv tei asaekc laalou lana baihmei guay tei latdiutatmei nunc khou tiilou the. Hei tei kanow ni thay khwan e.

³Khoutei Pitar rui kakhou sa the, “Annania, tabui swna Seitaan rui nang lung khou padikna, nang tuang puat zuanc patmei manv tei asaekc laalou lana, Bumaengh Nthanmei khou saraamh tu cho?

⁴Mi puat tei zuanh mak khou tei nang tuang de; zuanhmei tangv ni zuanc patmei syan tei nang tuang de. Tabui swna mi kumcna nang saraamc ni twna nang ning pat tu cho? Nang maansei khou saraamh tu hamh e; Ravguangc khou saraamh tuang e!”

⁵Hei tei chu rappui lev, Annania tei theicna pun key the; kumna mi chamv tei chumei guay ping the.

⁶Khoutei, nggaanv nunc guangna, kapumc tei phey rui kasiatclouna puanc patna mbeihlou kan the.

⁷Ganvdak kathumh dou tangv, kanow tei, pat kanmei tei thay makna, gut the.

⁸“Nang gaanv nangney rui lau zuanhmei manv kiu kaguayna mi hei di tha?” twna Pitar rui kakhou thanv the. “Ngguay, mi hei kaguayna di the,” twna kamei rui daw the.

⁹Kum tina, Pitar rui kakhou sa the, “Tabui swna nangney Ravguangc Bumaengc ta nchanv khang nuh nchamc tu cho? Nang gaanv ta mbeih tatmei nggaanv nunc ntaw kaimun daeng khou bam e; nang ta ni puanc pat puni the.”

¹⁰Mi dyng khou tei kamei Pitar hu khou theicna pun key the. Nggaanv nunc tei gutna kamei theic bam ti thena, kata tei puanc patna kagaanv daeng khou mbeihlou kan the.

¹¹Phwamling kapwm khatni mi chamv tei chumei guay ping khwan the.

¹²Sw-nchinmei taanv khatni charynmei taanv mpeyna latdiutatmei nunc rui meic nunc pang khou taanclou khwan e. Lwmmei guay tei Solomon Kaisangc khou guang kariu bam khwan e.

¹³Meic baihmei thu kaniw pang khou guang kazauh bauh mak khwan e; meic nunc rui kaniw ta sa kauhna bam khwan e.

¹⁴Poubauhmei khou lwmloumei ntumei khatni nggaanvmei meic mpeyna kaniw pang khou guang haaplou hay hay bam khwan e.

¹⁵Kum tina, Pitar tat ruan pat pwkhou kalim na rui sini kahilou khang twna nnaumei nunc ta chaengdai chaengdai khou phungc patna kaniw laeng khatni ntingc khou nzilou bam khwan e.

¹⁶Jerusalem daeng khou naimei namvdai guay khou rui nnaumei khatni ravsic gutmei meic mpeyna phungc guang khwan e, kumna kaniw kapwmna ta tigaylou khwan e.

¹⁷Khoutei Tingkuh khatni kahuammei nunc—twmei thu Saddukimei nunc tei latdiutatmei nunc ta mamavmei rui padik thau the.

¹⁸Kumna kaniw rui latdiutatmei nunc ta nymna mathiuc kangkai khou bangclou the.

¹⁹Tiki mi nungc zingbangc tei Poubauhmei tuang baanchara rui kangkai kaimun guay laanclouna, kaniw ta kapaengc thangc nduangh patlou the.

²⁰Kumna, “Nangniw Ravkai thangc tatna mi ringcpaan lam khou hei meic nunc khou dinc o,” twna kaniw khou sa the.

²¹Kaniw hei tei chu lana, tinggaanc pat pwkhou, Ravkai khou gutna nchamlou thau the. Tingkuh khatni kahuammei nunc rui Jihudimei gaanvthaih guay ta kawna Pei ku the; kumna latdiutatmei nunc ta kaniw hu khou zay guang khang sa the.

²²Tiki kangkai sinmei nunc tei guang pwkhou, latdiutatmei nunc tei kangkai khou tei bam mak khe. Kumna kaniw guang datna,

²³“Aniw kangkai khou tei guang zauc ki, kaikhamv mbangh tiph tiplou bam de, kumna rigaanv guay ni kaimun guay khou bam de; tiki aniw kaikhamv laanc pat pwki kaniw gaanv khat na sini bam mak khe,” twna poulou the.

²⁴Amuh daihmei nunc khatni ravkai rigaanv kapypu tei hei tei chu la khou, latdiutatmei nunc ta tei tabui sw kan thena cho twna ngak the.

²⁵Khoutei meic gaanv khat guangna, “Nangniw rui kangkai khou lou kanmei nunc tei Ravkai khou meic nunc ta nchamlou bam the!” twna kaniw khou sa the.

²⁶Kumna kapypu tei kamei nunc ta nduanghna tat lana latdiutatmei nunc ta tei nduangh guang the. Tiki kaniw ta meic nunc rui ntauh kwam pungh e twna ping lana, kaniw ta sw kasicna thu sw mak ge.

²⁷Kaniw rui latdiutatmei nunc ta tei nduangh guangna, pei mav khou tei tidinglou the. Khoutei Tingkuh tei rui sa the,

²⁸“Mi pu zanc khou tei nangniw nchamlou dat nuh mak khe twna aniw rui nangniw khou sa ranvna salou kan the; tiki nangniw rui nchamloumei hei rui Jerusalem padik the, kumna kata swluaimei tuang khuay hei aniw ruc khou tikeylou khang nangniw sw the!”

²⁹Pitar khatni baihmei latdiutatmei guay rui daw the, “Aniw thu maansei lat ta suangc Ravguangc lat piu kan nina di the!

³⁰Nangniw rui kros khou thaengcluai kanmei Jisu ta tei aniu pupouc nunc Racguangc rui tiringcthaulou kan the.

³¹Isaraelmei lungh laicna kaniw paapc kuakloumei laa kan khang, Ravguangc rui kata Kapyswmeipu khatni Kanloumeipu swna katuang baanzat thangc zay kulou the.

³²Mi lam khou hei dinc bammei kiu aniw hei the khatni Ravguangc rui kalat piumei guay khang kaipat swna tiiloumei Bumaengh Nthanmei hei the.”

³³Kaniw hei tei chu pwkhou, kaniw reic thau the, kumna kaniw ta swluai nii the.

³⁴Tiki Pharisimei, kazanc Gamaliel kawmeipu, meic guayna rui chakhwang sw bammei Riakdanv dinhpouc gaanv khat dingthauna latdiutatmei nunc ta tei matak khat kapaengc thangc nduangh pat kan o twna sa the.

³⁵Khoutei kamei rui peimei nunc khou tei sa the, “Isaraelmeithiu, mi nunc ruc khou nangniw sw nimei hei kakhanh chuyna sw o.

³⁶Tingkwm asaekc hu thangc, Theoda twna kawmeipu, kamei ni kapyswmei akhat the twna thau khwan e, kumna meic phay padeih dou kathei laylou khwan e. Tiki kata swluai kan pwkhou, kamei guay tei pak phak ngamna hei tei maan kan the.

³⁷Mi tangv tei, meic sing phuhpui ganv khou, Galilimeipu Juda ni thauna meic mpeyna ta kathei tilay khwan e. Tiki kata ni swluai kan the, kumna kathei laymei guay maan ngam kan the.

³⁸Kumna ntaw tuang lam khou ni, ai rui sa niimei thu, kaniw ruc khou ramh sw bam nangh e; kaniw ta mpatlou ti do! Kaniw rui sw bammei hei maansei khou rui e thei, maan kan ni de;

³⁹tiki mi hei Ravguangc khou rui e thei nangniw kaniw ta swmaan ngam ni tu hamh e. Nangniw Ravguangc ta athwngmei nunc sw lamc e!” Kaniw Gamaliel lat tei laa the.

⁴⁰Kaniw rui latdiutatmei nunc ta tei kaw gut dat lana kaniw ta bai the, kumna Jisu zanc khou dinc dat nuh mak khe twna salouna mpatlou the.

⁴¹Jisu zanc khang rui zakmei khaengv khang biuhmei nunc swna Ravguangc rui kaniw ta ni chaklou dyng the twna neihla neihlana kaniw pei khou tei rui pat dat the.

⁴²Kumna Ravkai khou khatni kai kai khou Jisu Khrista lam khou nchamloumei khatni chamvdinhmei tingmik pum sw bam khwan e.