Read Rongmei Naga LATDIUTATMEI 6 Bible Online

LATDIUTATMEI 6 - Rongmei Naga bible

LATDIUTATMEI 6

¹Ziap nunc tei meic geic thau pwkhou, Griklat samei Ibrimei nunc rui tingmik pum syan nzanhmei khou kaniw tuang swmmaypui nunc ta ntaamvlou e twna, kaibamvmei Ibrimei nunc ruc khou pian makmei lat sa thau the.

²Kum tina latdiutatmei nunc rui ziap guay ta tei kaw guang kaduaina sa the, “Tuzangvmei siamruai khang rui aniw Ravguangc lat dinh khang ntaamvloumei hei thu nchumh mak khe.

³Hei zaeng rui, chanathiu, meic nunc rui ningchuymei khatni Bumaengh khatni ningting padikmei nggaanvmei gaanv chanei nangniw rui kapah pat tho, mi nunc khou kiu mi taanv hei nsinlou puni the.

⁴Aniw thu huayneymei khou khatni chamvdinhmei khou lungh gut bam kan the.”

⁵Apostal nunc rui samei khou tei meic guay tei pian the, kumna lwmmei khatni Bumaengh Nthanmei padikmei Stephen, Philip, Prokhur, Nikanor, Timon, Parmena, khatni Antiokhmei Jihudi guanhmei Nikola mi nunc ti hei kadah pat the.

⁶Kaniw rui mi nunc ti hei latdiutatmei nunc khou nduangh guang tina huayneyna latdiutatmei nunc rui kaniw ruc khou baanh bouclouna suanglou the.

⁷Mi kumna Ravguangc lat zin pat the. Jerusalem khou ziap sing mbu hay hay thau the, kumna amuh mpeyna ni lwmlou the.

⁸Ravguangc tuang zauzian khatni pumtan padikmeipu, Stephen rui charynmei khatni sw-nchinmei taanvdaih mpeyna meic nunc pang khou taanclou khwan e.

⁹Nyngswmei nunc[5] tuang sinagog twna kawmei sinagog khou bammei Kurini khatni Alekzandria khou rui guangmei nunc khatni Kilikia lev Asia khou rui guangmei Jihudimei gaanvsaekc thauna Stephen ta agi the.

¹⁰Tiki Stephen khou Bumaengh rui tiiloumei ningting ta tei kaniw agi ngam mak khe.

¹¹Kumna, “Kamei Mousi khatni Ravguangc ta thouhsw makpui lat samei aniw chu the,” twna sa khang kaniw rui meic gaanvsaekc ta lanv the.

¹²Kumna kaniw rui meic nunc, gaanvthaih nunc, khatni Riakdanv dinhpouc nunc rang ntouthaulou the. Kaniw rui Stephen ta nymna pei khou zay guang the.

¹³Khoutei kaniw rui ndiuloumei nunc tei rui damcna sa the, “Mi pu hei nthanmei Ravkai khatni Mousi tuang Riakdanv ta nsicna sa bammeipu e.

¹⁴Mi Nazarethmeipu Jisu hei rui mi Ravkai hei ra ganc puni, kumna Mousi rui tiiloumei riak guay hei tikalaiclou puni twna kamei rui sa bammei aniw chu the.”

¹⁵Peimei guay tei rui Stephen ta miktunna zauc pwkhou kazawpaanv tei kauh baanchara zawpaanv kumc khwan e.