Read Rongmei Naga LATDIUTATMEI 8 Bible Online

LATDIUTATMEI 8 - Rongmei Naga bible

LATDIUTATMEI 8

¹Kumna kata swluaimei khou tei Saul ni nuhna kazauh the. Mi nungc tei rui Jerusalem tuang phwamling khou rai riu daihmei kahouh kan the. Apostal nunc na hamhna, baihmei lwmloumei guay tei thu Judia khatni Samaria ramv kapwm khou pak ntamv ngam kan the.

²Ravning nthukmei nunc gaanvsaekc rui Stephen ta mbeihlouna kap ranvna latlu khwan e.

³Tiki Saul tei thu phwamling ta swmaan khang sw khwan e. Kamei kai kai khou tatna, lwmmei ntumei ta ni, nggaanvmei ta ni zay patna kangkai khou lou khwan e.

⁴Pak phak tat kanmei nunc tei tat lik sikh sikna gaychamv tei dinclou the.

⁵Philip Samaria tuang kaidai khou[8] keyna, kaniw khou Khrista lam dinclou the.

⁶Meic kangdai tei Philip lat chu pwkhou khatni kamei rui sw-nchinmei taanv guay tei how pwkhou, kamei rui samei tei lungh gutna nking the.

⁷Meic mpeyna khou rui ravsic nunc kauc ranvna kauclou ducna pat kan khwan e, khatni kapaektheihmei khatni kaphay chuanchaymei mpeyna ta tigaylou khwan e.

⁸Kumna mi kaidai khou tei neihlamei padik khwan e.

⁹Mi kaidai khou tei katuang duaic ta Samariamei guay ngak sakh sak bammeipu, kazanc Simon twna kawmeipu gaanv khat nai khwan e. Kamei hei meic akhat di the twna karana kata sa bam khwan e.

¹⁰Meicdaihmei ni nthyammei ni, meic naina kata ning kauhna, “Kamei hei ‘Pumtan Daihmei’ twna kawmei rav kiu lungc guang tina di the,” twna kaniw rui sa the.

¹¹Mi kumcna tingsaengc sihna kaduaic rui kaniw ta tingak guang tipui zaeng rui meic nunc tei kakhou lungh gut ngam bam khwan e.

¹²Tiki Philip rui Ravguangc guangcdic tuang gaychamv khatni Jisu Khrista lam khou dinclou pwkhou, lwmlouna kaniw ntumei ni, nggaanvmei ni duilup the.

¹³Simon tei ni lwmlou the, kumna duilup tangna, Philip daeng khou bam khwan e. Philip rui sw-nchinmei khatni charynmei taanvdaih taancloumei guay tei how la khou, kamei ngak the.

¹⁴Samariamei nunc ni Ravguangc lat laalou the twmei Jerusalem khou bammei latdiutatmei nunc chu lana, Pitar lev Jahon ta kaniw daeng thangc ndiulou the.

¹⁵Kaney keyna, lwmloumei nunc tei Bumaengh Nthanmei laatow kan khang huayneylou the.

¹⁶Kalam thu kaniw gaanv khat na khou sini Bumaengh Nthanmei keylou mak he; kaniw ta Poubauhmei Jisu zanc khou duiluploumei na di he.

¹⁷Khoutei kaney rui kaney baanc kaniw ruc khou bouclou pwkhou kaniw Bumaengh Nthanmei laatow the.

¹⁸Latdiutatmei nei tei rui kaniw ruc khou kaney baanc bouclou pw khou, Bumaengh tiilou e twmei Simon tei how the. Kumna kamei rui Pitar lev Jahon khang syan tiina,

¹⁹“Ai rui ni abaanc bouclou pwkhou meic nunc Bumaengh Nthanmei laatow kan khang, mi pumtan hei akhou ni tiilou o,” twna Simon rui sa the.

²⁰Tiki Pitar rui mundawna sa the, “Nang ni, nang syan ni maan tho; Ravguangc tuang kaipat ta syan rui liu ni twna nang ning la bu the!

²¹Mi siamruaimei taanvbamv khou hei nang dam maek ge; kalam thu nang lungning hei Ravguangc hu khou ntwn mak ge.

²²Mi nang tuang simei lungning khou rui nang lungh laic o. Mi kumhmei lungning ning patlou kanmei khang tei kuaklou khang Poubauhmei khou huayney o.

²³Nang khou mamavmei padik the, khatni nang ta paapc rui bangclou bam the twmei ai how the.”

²⁴“Nangney rui sa kanmei tei aruc khou keylou mak khang, akhang Poubauhmei khou huayneylou o,” twna Simon rui Pitar lev Jahon khou sa the.

²⁵Kaney rui Jisu Khrista lam khou thaymei tei dinclou lana khatni Poubauhmei lat dinclou lana Jerusalem thangc ngangh dat the. Kaney ngangh datmei chaenglwan khou, Samariamei namv mpeyna khou Gaychamv dinclou khwan e.

²⁶“Nang thauna dihba[9] thangc, Jerusalem khou rui Gaza tatmei chaeng thangc tei tat ro,” twna Poubauhmei tuang baanchara rui Philip khou sa the. (Mi hei meic tat taanmei chaeng di the.)[10]

²⁷Kamei thauna tat the. Khoutei Etheopiamei liammavpui tuang lanv sinmei meicdaihmei, kapumcsiammeipu gaanv khat, Jerusalem thangc Ravguangc ta kalum tat lana, kakai tat dat khang takuanh gari tuangcna key khwan e. Kamei gari khou tei tuangcna, muhzwng Isaia tuang latrik pac tat bam khwan e.

²⁹Khoutei, “Nang mi gari daeng thangc tei tatna, mi khou tei lay kazauh tho,” twna Bumaengh Nthanmei rui Philip khou sa the.

³⁰Philip tei pak guang pwkhou, kamei muhzwng Isaia tuang latrik tei pac bammei ta chu the. Khoutei, “Nang pac bammei tei kabah thay daih?” twna Philip rui thanv the.

³¹“Meic gaanv khat rui dinclou mak ge thei ai akumhna thay nina cho?” twna mi meicdaihmeipu tei rui daw the. Khoutei Philip ta katuang gari khou ku dungh khang kaw the.

³²Kamei rui pac bammei nthanmei latrik chyam kiu mi hei e: “Dowluai khang zay tat bammei lauziu kumc, kahiw tiap tina rah makmei lauziu kumc, kamei lat khat na sini sa mak ge.

³³Kata sw zaklou the, kakhou nchumhmei swlou mak khe. Kakikta lam khou gaanv khat na sini sa ngam mak khe, kalam thu katuang mbaanv panty laa thau kan the.”

³⁴“Muhzwng rui mi hei thow lam khou sa bam tu cho, dinclou o. Karana kalam khou sa bam tu ni, meic baihmei lam khou sa bam tu cho?” twna meicdaihmeipu tei rui Philip khou sa the.

³⁵Khoutei Philip tei sa thau the; mi nthanmei latrik chyam khou rui kahouhna Jisu tuang Gaychamv kakhou dinclou the.

³⁶Kaney mi kumcna tat key pwkhou, dui asaekc naimei bamv khou key the. Khoutei, “Mi khou hei dui nai the, ata duiluplou nuh makmei tuang tabui nai he cho?” twna mi pu tei rui sa the.

³⁷Kumna, “Nang lung kapwm rui lwmlou e thei, nang duilup nuh the,” twna Philip rui sa ti khou, “Jisu Khrista hei Ravguangc Nac Mpouh e twmei ai lwm the,” twna kamei rui mundaw the.[11]

³⁸Gari tei nthaekc khang meicdaihmeipu tei rui sa the, kumna kaney dui khou tei keyna Philip rui kata duiluplou the.

³⁹Kaney dui khou tei rui ku dat pwkhou, Poubauhmei tuang Bumaengc rui Philip ta laa tat kan the. Mi pu tei Philip ta how dat mak khe; tiki kamei neihlamei rui padikna tat kan the.

⁴⁰Khoutei Philip kamei Azota khou bam khwan the, kumna kamei kaidai kathuic khou Gaychamv dincna Kaisaria khou guang the.