Read Rongmei Naga ROMMEI 1 Bible Online

ROMMEI 1 - Rongmei Naga bible

ROMMEI 1

¹Latdiutatmei akhat khang Ravguangc rui kawlouna, katuang Gaychamv dinc ndauh khang langpatloumei, Khrista Jisu bangc, Paul khou rui:

²Gaychamv kiu, reydouc katuang muczwng nunc rui dincloumei Ravguangc tuang latryan, Nthanmei Latrik khou naimei tei e.

³Mi hei, kamei maansei swmei biak thangc sa e thei David kikta,

⁴nthanmei Bumaengh swmei biak thangc sa e thei, kata theihmei khou rui tiringcthaulou datna kamei hei Ravguangc Nac Mpouh e twmei pumtan kazauhna ndauhloumei, Kanac Mpouh, aniu Poubauhmei Jisu Khrista lam khou e.

⁵Zaatc guay khou rui, meic guay ta lwmmei khou khatni latpiumei khou zaylou khang, Khrista khang latdiutatmei sw khang, Ravguangc rui kapaan rui akhou tiilou the.

⁶Mi nunc pang khou tei, Ravguangc rui Khrista mei sw khang kawloumei, Rom khou bammei nangniw ni kazauh the.

⁷Rom khou bammei Ravguangc rui nzianmei khatni kawloumei nthanmei nunc khou hy tuang e: Aniu Pu Ravguangc khatni Poubauhmei Jisu Khrista rui nangniw khou zauzian khatni chuzaenghmei tiilou diu!

⁸Rey liangmei khou, nangniw tuang ramlum tei mbaanv kapwm khou chu lik bampui zaeng rui, nangniw khang rui ai aRacguangc ta Jisu Khrista paan rui thuancku e.

⁹Ai huayneypui sik, nangniw khang taek makna ningtow bam e twmei, alung kapwm rui Kanac Mpouh tuang gaychamv dincna kasiamruai sw bammei Racguangc rui thay e.

¹⁰Ntaw nkhamh khou, Ravguangc rui nuhloumei thei layna, nangniw daeng khou gayna guang tangclou khang ai huayney bam e.

¹¹Ai nangniw ta how niimei lam kiu thu: ai rui nangniw khou Bumaengh tuang kaipat tiilouna nangniw ta sw ntiplou khang,

¹²twmei thu, aniu khat khat ramlum rui nangniw ta ni ata ni katiu thaulou kary khang e.

¹³Chanathiu, nangniw mi hei thaylou o, twmei thu, Zentelmei baihmei guay pang khou kumcna, nangniw pang khou rui ni Bumaengh lau tay khang ai nangniw khou guang ni twna ning thau katupc sih the; tiki ntaw nganvna achaeng khamv bammei tuang nai e.

¹⁴Ai hei Grikmei nunc khou ni, daicthau makmei nunc khou ni, ningtyng ntakmei nunc khou ni, mpangmei nunc khou ni pow phungc bam e.

¹⁵Hei zaeng rui, Rom khou bammei nangniw khou ni Gaychamv hei dinclou nii the.

¹⁶Gaychamv lam khou ai zak mak ge. Kalam thu gaychamv hei lwmmei kathuic ta kanlou khang Ravguangc rui tiiloumei pumtan e. Mi hei rey liangmei khou Jihudimei khang tiilou the, kumna Zentelmei guay khang ni tiilou the.

¹⁷Akumhna Ravguangc rui meic nunc ta ravchaptatmei tiswlou tu cho twmei mi gaychamv hei rui dinclou e. “Lwmmei paan rui ravchaptatmei swpui mei tei ringc puni,”[1] twna nthanmei latrik khou hyloumei kumcna, mi ravchaptatmei tiswloumei hei kabangbi khou rui katwan nganvna lwmmei paan rui e.

¹⁸Nchumhmei ta thay mak khang kaniw tuang simei taanv rui thingclouna bammei maansei nunc paap khatni simei taanv ruc khou, tingkauh thangc rui Ravguangc lungpuam keylou e.

¹⁹Kalam thu Ravguangc ta thay nuhmei tuang tei nthanna nai de; Ravguangc rui hei tei kaniw khou lyanlou kan de.

²⁰Kalam thu mik rui how makmei katuang lwnlung, twmei thu, katuang kanganv nai dat makmei pumtan khatni kamei hei Ravguangc e twmei kamei rui damcloumei ravsyam guay khou rui, mbaanv damclou rap khou rui nthanna how bam tuang di the. Hei zaeng rui, kaniw ley duak datpui chaeng maek khe!

²¹Kaniw Ravguangc ta thay sini, kaniw rui kata Ravguangc e twna kalum mak ge khatni thuanckulou mak ge. Mi phaan tei kaniw lungning ndy ngam the khatni zingc ngam the.

²²Kaniw rana kaniw ta ningtyngmei e twna ning e; tiki kaniw hei mpangmei nunc e.

²³Kumna theih makmei Racguangc ta kalummei phaan, theic nimei maansei, nruay, khouringh, khatni tuihmei khouringc maengc kasiamhna kalum the.

²⁴Hei zaeng rui, kaniw lung rui kahawmei mphuammei taanv khang tei Ravguangc rui kaniw ta mpatlou tina, meiczak thay makpui taanv kaniw khat khat khou taanc the.

²⁵Ravguangc lam khou dincloumei nchumhmei ta tei kaniw gancna, saraamhmei tuang ta laalou the; tingsaeng thuanc bam nimeipu damcloumeipu ta kalumna kasiamruai sw bam nimei phaan, kamei rui damcloumei puat ta kalum the. Amen

²⁶Hei zaeng rui, Ravguangc rui kaniw ta meic malamei tuang boulahmei khou tei mpatlou tina ntumei nunc kaniw nchamc meic riak hamhpui taanv taanc the.

²⁷Hei tei kumcna, nggaanvmei nunc ni ntu nggaanv meic riak tuang tei ganclouna nggaanvmei nchamc meic riak hamhmei, meiczak thay makpui taanv taanc the. Mi kumna kaniw tuang nkhuaimei taanv tuang latzan tei kaniw rui kaniw ruc khou tiguang the.

²⁸Kalam thu kaniw lung rui Ravguangc ta thay bam zih tina, Ravguangc rui kaniw ta kaniw tuang mphuammei lungning khou tei mpatlou the, kumna kaniw tei taanc lak nimei taanv taanc the.

²⁹Kaniw lung tei simei twmei zaat guay, agaamvmei, karaengmei, mamavmei, meicdowmei, agay agimei, meicguatmei, meickai ta sw kasic niimei, khatni nsuc nraucmei rui padik the.

³⁰Khat khat ta sakasicmei, Ravguangc ta karaengmei, gaengh swmei, liantimei, malamei rui padik the. Kaniw simei taanv taanc mbu khang kakhanh the, kumna pui pu lat piu mak khe.

³¹Kaniw si gay thay mak khe, kaniw lat ngaek mak khe, khatni kaniw meic nzian thay mak khe.

³²Mi kumhmei nunc hei theic biuc the twna Ravguangc tuang Riakdanv rui samei tei kaniw thay e; tiki kaniw mi guay hei taanc katyn bammei na hamhna, mi kumcna sw bammei guay ta katiulou the.